Read Rongmei Naga ROMMEI 10 Bible Online

ROMMEI 10 - Rongmei Naga bible

ROMMEI 10

¹Chanathiu, Isaraelmei nunc hei ni kanloumei laa kan tu laa niina ai Ravguangc khou huayney bam e.

²Kaniw khou Ravguangc khang lungh gutmei nai e twmei ai thay e; tiki hei tei kaniw kabahthayna sw bam tu hamh e.

³Ravguangc tuang ravchaptatmei tiswloumei chaeng hei kaniw thay mak khe; kaniw rana rui kasiamhmei chaeng khou kaniw tat the; kumna Ravguangc tuang ravchaptatmei tiswloumei chaeng khou tei kaniw gut mak khe.

⁴Kalam thu Riakdanv hei Khrista khou nganvlou the, kumna lwmmei kathuic ta ravchaptatmei swna chaklou the.

⁵Riakdanv piuna ravchaptatmei lam khou Mousi rui dincna, “Riakdanv piupui mei tei Riakdanv paan rui ringc puni,” twna sa e.

⁶Tiki lwmpui paan rui ravchaptatmei lam khou, nthanmei latrik rui sa e: “Thow tingkauh thangc ku nina cho twna nang thanv bam nangh e.” (Mi hei Khrista ta kaw key khang twna e.)

⁷“Thow taruaih thangc key nina cho twna ni thanv bam nangh e.” (Mi hei Khrista ta theihmei khou rui kaw ku dat khang twna e.)

⁸Mi hei sa bammei kabac kiu thu, “Ravguangc lat nang daeng khou nai the, nang mwang khou khatni nang lung khou nai the,” twpui tuang e. Mi kiu thu lwmmei lam khou aniw rui dinc ndauh bammei lat hei the.

⁹Mi kiu thu, Jisu hei Poubauhmei e twna nang mwang rui sa ndauh pat re thei khatni Ravguangc rui kata theihmei khou rui tiringcthaulou dat kan the twmei nang lung rui lwm e thei, nang ta kanlou puni.

¹⁰Kalam thu lwmpui paan rui aniu ta ravchaptatmei swna chaklou the; khatni aniu rui sa ndauh patpui paan rui aniu ta kanlou the.

¹¹“Kakhou lwmpui mei ta tei tichangamclou lak ge,” twna nthanmei latrik rui sa e.

¹²Mi hei meic katana khang sa tuang e; kalam thu Jihudimei ta ni, Zentelmei ta ni baih mak ge; Ravguangc thu meic guayna tuang Kaipouc de, kumna kakhou huaymei kathuicna ta geicna suaihiamlou e.

¹³Kalam thu, “Poubauhmei ta kawmei kathuicna ta gulou puni,” twna nthanmei latrik rui sa e.

¹⁴Tiki akumhna, kaniw lwm makpui mei ta kaniw kaw nina cho? Kalam khou chu makpui mei ta kaniw akumhna lwm nina cho? Dincloupui mei maekna akumhna chu nina cho?

¹⁵Chamvdinhpui mei ndiulou ti makna akumhna chamv tei dinc tat nina cho? “Gaychamv phungc guangmei nunc phaykaamv tei adih how gay tu cho!” twna nthanmei latrik rui samei tei e.

¹⁶Tiki gaychamv hei meic guayna rui laalou mak ge. “Poubauhmei, thow rui aniw lat lwmlouna cho?” twna Isaia rui samei tei the.

¹⁷Kumna lwmmei hei chumei khou rui guang tuang e, chumei hei Khrista ta dinc ndauhmei khou rui guang tuang e.

¹⁸Kaniw chu lamc makna cho? Kaniw chu kan the. Nthanmei lat rui sa e: “Kaniw khwan kandih kapwm tat lik kan the, khatni kaniw lat mbaanv tintou tangc kan the.”

¹⁹Isaraelmei nunc hei kabah thay lamc makna cho? Daw reymei swna Mousi rui sa e: “Amei nunc ta Zentelmei nunc ruc khou timamavlou puni; mpangmei mei nunc ruc khou tilunghpuamclou puni.”

²⁰Baucna Isaia rui sa e: “Ata phu makmei nunc rui ata ariw the; ata kakhi makmei nunc khou ai rui ata lyanlou the.”

²¹Tiki, “Latliammei khatni kanu tanhmei mei nunc ta abaanc haamv patna neihmaryn riu bam e,” twna Isaraelmei lam khou kamei rui sa e.