Read Rongmei Naga ROMMEI 13 Bible Online

ROMMEI 13 - Rongmei Naga bible

ROMMEI 13

¹Meic guayna kandih kaipouc nunc bangc khou bam nina e, kalam thu kaniw ngamv phungc bammei tei Ravguangc rui nuhlou tina e khatni kamei rui tiiloupui tuang e.

²Hei zaeng rui, thowkumhmei kandih kaipouc nunc bangc khou bam zihpui mei tei Ravguangc rui suamloumei ta laa zihpui mei e; kumna mi kumhpui mei tei karana karuc khou latzan law guang puni.

³Kalam thu kandih kaipouc nunc ta tei kataanv gaymei nunc rui ping khang hamh e; kataanv simei nunc rui ping khang de. Nang kandih kaipouc ta ping makna lungc nii bu cho? Kum e thei, gaymei taanv taanc o, nang ta thuanckulou puni.

⁴Kalam thu kamei hei nang khang gay khang taanc bammei Ravguangc bangc e. Tiki nang simei taanv taanc e thei, kata ping o, kalam thu kamei baengsaeng sin bammei tei nsa khang hamh e. Kamei Ravguangc bangc e, kumna simei taanv taanhmei nunc ruc khou Ravguangc tuang latzan kamei rui tii puni.

⁵Hei zaeng rui, Ravguangc lungpuam keylou puni twmei zaeng na rui hamhna, piu nimei thouc e twmei thayna kandih kaipouc nunc bangc bam nina e.

⁶Hei zaeng rui nangniw dihkhav tii bam tuang e, kalam thu kandih kaipouc nunc rui kaniw thouc taanc bammei tei Ravguangc taanv taanc bam tuang e.

⁷Nangniw rui tii nimei dam guay tei tii o: dihkhav tii zimei khang tii o; ramvpuan tii zimei khang tii o; chakhwang sw zimei ta chakhwang sw o; ping zimei ta ping o.

⁸Nangniw khat khat ta nzian nimei pow na hamhna meic gaanv khat na khou sini pow phungh riu. Kalam thu meickai ta nzianpui mei tei Riakdanv piu the.

⁹“Lungcmaanv lak nina e; meicdow lak nina e; kaihouc lak nina e; meickai tuang puat kahaw lak nina e,” twmei khatni baihmei latdanv guay ni, “Nang rana nang ta nzianmei kumcna nang tuang kaigei kainingmei guay ta nzian o,” twmei latdanv khou nai ngam the.

¹⁰Nang nang kai kainingmei ta nzian e thei, nang kakhang si khang swlou ni tu hamh e. Hei zaeng rui, meickai ta nzianmei twmei hei Riakdanv kapwm tei piumei the.

¹¹Kaganv ti hei thayna nangniw mi hei kumcna lungc tho. Ntaw thu zip bammei khou rui zipthaupui ganv tangc the. Kalam thu aniu lwm reymei douc tei suangc ntaw thu aniu ta kanlou nimei tingmik ana the.

¹²Zingbangc luai zaic kan ni the, tinggaanc zaic puni the. Zinghmei tuang taanv guay ganc di kho; kumna gaanhmei khou adow nimei rih na guay sin thau di kho.

¹³Kalaanv gaanh khou lunghmei kumcna aniu chakhiw chakhey thayna lungc di kho. Mba nlauna, tu mba zangv mbana, lungcmaanv lungcmowna, kheiliak sina, abay adapna, ntian nzauna lungh ri kho.

¹⁴Khrista ta rihpwan piu kumcna piu tho, kumna meic pumc tuang kahawmei tiguang tangh khang sw dat ri tho.