Read Rongmei Naga ROMMEI 14 Bible Online

ROMMEI 14 - Rongmei Naga bible

ROMMEI 14

¹Lwmmei khou suanmei mei ta tei laalou o; kamei rui sw bammei ta tei nsic nangh e.

²Meic gaanvsaekc rui ramh guayna tu nuh de twna lwm e; tiki karam lum suanmeipu rui gannuy paannu na tu e.

³Khav zanh thiangh makmeipu tei rui thianghmeipu ta loukey mak kan diu, khatni gannuy paannu na tumeipu tei rui khav zanh tumeipu ta tei latzan sw mak kan diu; kalam thu Ravguangc rui kata ni laalou the.

⁴Meickai bangc ta latzan sw khang nang thouc hamh e. Kataanv tei laalou nuhmei, laalou nuh makmei twmei hei kakaipouc nyng de. Laalou puni de, kalam thu Poubauhmei rui kata laalou ngam de.

⁵Meic gaanvsaekc rui tingmik akhat ta baihmei ta suangc nthukmei swna kakhanh e, khatni meic gaanvsaekc rui tingmik guayna nchamc de twna kakhanh e. Meic kathuicna katuang katuang lungning khou kakhanh chuyna kakhanh o.

⁶Thow pw ni tingmik akhat ta nthukna ningpui mei tei Poubauhmei ta chakhwang swna swpui tuang e; ramh katana tupui mei tei ni Poubauhmei ta chakhwang swna tu tuang e, kalam thu kamei mi taektw khang tei Ravguangc ta thuancku e. Thowkumhmei thiangc bammei tei ni, Ravguangc ta chakhwang swna thiangc bam tuang e, kumna kamei Ravguangc ta thuancku e.

⁷Aniu gaanv khat na sini kakhang khang na ringh mak ge, kakhang khang na ni theih mak ge.

⁸Aniu ringc e thei, aniu ringc bammei hei Poubauhmei khang e; aniu theic e thei, aniu theihmei hei Poubauhmei khang e. Kumna aniu hei ringc pw ni, theic pw ni Poubauhmei khang e.

⁹Kalam thu Khrista hei theic kanmei nunc tuang ni, ringc bammei nunc tuang ni, kaipouc sw khang kamei theiclouna ringcthau dat kan the.

¹⁰Kum e thei, tabui swna nang chana ta nang latzan sw bam tu cho? Tabui swna nang chana ta loukey bam tu cho? Aniu meic guayna Ravguangc tuang latzan bamvpaeng hu khou ding puni.

¹¹Kalam thu mi kumna hylou e: “Ai hei ringhmei Racguangc e twmei suai makmei kumcna, meic kathuicna ahu khou khuksun key puni khatni ai hei Ravguangc e twna meic kathuicna rui sa puni, twna Poubauhmei rui sa e.”

¹²Hei zaeng rui, meic kathuic katuang katuang taanv chakh Ravguangc khou tii puni.

¹³Hei zaeng rui, aniu khat khat ta latzan sw taan di kho; kumna aniu chana khat ta tiphaysuy nimei tuang hamh e thei tibow nimei tuang ramhkhat sini taanh mak khang lungning ding kho.

¹⁴Poubauhmei Jisu khou bammei akhat swna, taektw khou thu nthan makmei puat maek ge twmei ai nthanna thay e. Tiki thowkumhmei rui taektw asaekc ta nthan makmei e twna lwm e thei, hei tei kakhang nthan makmei the.

¹⁵Nang taektw rui nang rui nang chana khat ta tikabiulou e thei, hei tei nzianmei taanv hamh e. Nang tumei taektw rui, kakhang rui Khrista theicloumei gaanv khat ta swmaanlou riu!

¹⁶Nangniw rui gaymei de twmei puat ta tei meic nunc rui sina sa mak khang sw o.

¹⁷Kalam thu Ravguangc Guangcdic hei thu tu zangvmei tuang latbamv hamh e; tiki Bumaengh Nthanmei rui tiimei ravchaptatmei, chuzaenghmei, khatni neihlamei latbamv de.

¹⁸Mi hei kumcna, Khrista siamruai swpui mei ta tei Ravguangc rui pianlou e khatni maansei rui lwanlou e.

¹⁹Mi kumna, chuzaenghmei phungc guang nimei tuang khatni khat khat ta kasiamh thau nimei tuang tei sw khang aniu karamc nina e.[16]

²⁰Ravguangc taanv ta tei taektw zaeng rui sw kasic dat ri kho. Taektw guayna gay bam nuh de, tiki meic gaanv khat ta tiphaysuy nimei taektw tumei thu nkhuai e.

²¹Zanh tu makmei, zouh zangv makmei, tabui pw ni nang chana ta tiphaysuy nimei tuang tei taanc makmei hei rui gay e.

²²Mi lam khou hei nang rui lwmmei tei, Ravguangc nangney kak khou na lou bam o. Kamei rui nchumh de twna ningna taanhmei tei kalungning rui nkhuai e twna salou makpui mei tei sangaymei e!

²³Tiki kamei tumei tei lwmsina tu e thei, hei tei nkhuai e; kalam thu kamei lwmmei thei layna taanh mak khe. Lwmmei thei layna taanh makmei taanv guay paapc be.