Read Rongmei Naga ROMMEI 15 Bible Online

ROMMEI 15 - Rongmei Naga bible

ROMMEI 15

¹Tanhmei aniu rui suanmei nunc tuang puatrith tei phungc nkhavlou nina e. Aniu rui aniu rana ta tipian khang sw lak nina e.

²Aniu thu aniu chana nunc khang gay khang kakhanhna, kaniw ta kasiamh thau khang rui kaniw ta tipian khang karamc nina e.

³“Nang ta sakasicna samei guay tei akhou keylou the,” twna hyloumei kumcna, Khrista thu karana kata tipian khang ning mak ge.

⁴Nthanmei Latrik khou hylou bammei guay hei aniu ta nchamlou khang hylou tuang e, kumna mi paan tei rui aniu khaengvthaymei khatni katiu thauloumei laatowna rigwnmei nai khang e.

⁵Khaengvthaymei khatni katiuloumei tiiloumei Ravguangc rui nangniw khou, Khrista Jisu thei lay nzeicna khat lev khat lungh chamcna lungc bam khang, tiilou pw dio.

⁶Kumna nangniw meic guayna kariuna khwan khat na swna aniu kaipouc Jisu Khrista Pu Ravguangc hym thuanc bam khang e.

⁷Kum thena, Khrista rui nangniw ta laaloumei kumcna, Ravguangc hym tidaih khang, nangniw khat khat ta laalou o.

⁸Ravguangc hei thu suai makmeipu e, kaniw pupouc nunc khou swlou kanmei latryan guay tei tiguang tangclou e twmei lyanna Khrista hei Jihudimei khang siamruaimei swna lungclou the twna ai rui sa tuang e.

⁹Mi hei Zentelmei guay rui ni Ravguangc ta kazauzian khang rui thuancku khang e. Mi kumna hylouna nai e: “Kumna ai nang ta Zentelmei pang khou thuanc puni; ai nang ta thuancna suan puni.”

¹⁰Mi kumna sa dat re: “He Zentelmei, Ravguangc mei nunc lev neihla nchamc o!”

¹¹Mi kumna ni sa dat re: “Poubauhmei ta thuanc o, Zentelmei guay; zaat guayna kata thuanc o!”

¹²Isaia rui ni sa e: “Jessi kikta lungc guang puni; kamei Zentelmei ta sin khang guang puni, kaniw kakhou lwm bam puni.”

¹³Bumaengh Nthanmei pumtan paan rui nangniw tuang rigwnmei tei mbu thau khang, rigwnmei tiiloumei Ravguangc rui, nangniw khou lwmmei paan rui, neihlamei khatni chuzaenghmei nangniw khou tipadiklou diu.

¹⁴Chanathiu, nangniw khou gaymei khatni thaymei mpeyna nai e, kumna nangniw khat khat ta nchamlou ngam the twmei ai nthanna thay e.

¹⁵Tiki mi tatdyn khou hei, ai rui nangniw ta tiningtowlou dat kanmei latbamv asaekc khou tei, ai baucna sa kan the. Ai mi kumcna baucna sa ngammei hei,

¹⁶Zentelmei khang Khrista Jisu tuang siamruaimei sw khang akhou tiiloumei zauzian paan rui e. Zentelmei ti hei Ravguangc rui laalou nuhmei puatkat swna Bumaengh Nthanmei paan rui kakhou katlou khang, ai Ravguangc tuang gaychamv dinhmei hei amuh khat kumcna sw bam e.

¹⁷Hei zaeng rui, ai rui Ravguangc khang taanhmei taanv khang hei, ai Khrista khou gaengh sw bam khang e.

¹⁸Zentelmei ta Ravguangc lat piumei khou zaylou khang Khrista rui ata sinswloumei lam hei ai baucna sa puni. Kamei rui hei tei lat khatni taanv paan rui taanclou e—

¹⁹charynmei khatni sw-nchinmei taanv khatni Ravguangc Bumaengc tuang pumtan rui e. Kumna, ai Jerusalem khou rui thauna Illurikkum nganv tatlouna Khrista tuang gaychamv dinc liklou kan the.

²⁰Ai rui kahawmei thu, meic gaanv khat rui thwanloumei kaiphwn khou taanhmei hamhna, Khrista ta thay makmei bamv bamv khou Gaychamv hei dinc tat khang twmei hei e.

²¹Mi hei, “Kalam khou dinclou makmei nunc tei how puni, chu makmei nunc tei kabah thay puni,” twna hylou bammei tei the.

²²Hei zaeng rui, ai nangniw daeng khou guang khang ning bam sini ata khamv bammei tuang e.

²³Tiki ntaw thu mi ramv gei khou hei ai taanc nimei dwan luai the, kumna ai tingkwm mpeyna nangniw daeng khou guanglou niina bammei tei,

²⁴ntaw thu guang tangc pungh the twmei ai lwm the. Ai Spain kandic thangc tat nimei chaenglwan khou nangniw daeng khou guang khanvlou nii e, kumna ai nangniw daeng khou bam kanaklouna mi thangc tei tat pwkhou nangniw rui ata nkhavlou pw khang lwmgay e.

²⁵Tiki aseic luan thu, Jerusalem khou bammei Ravguangc meic nunc ta nkhavlou khang ai Jerusalem thangc tat kan ni he.

²⁶Kalam thu Makidonia khatni Akhaia kandic tuang phwamling guay rui Jerusalem khou bammei lungc ryanramei, Ravguangc mei nunc khang nzianmei kaipat tiilou khang dinglou tuang nai the.

²⁷Hei tei kaniw taanclou niina taanclou tuang e. Kaling sa e thei, kaniw hei tei swlou nimei thouc rap di the. Jihudimei nunc rui Zentelmei khang Bumaengh tuang suaihiam nzanhlou e thei, Zentelmei guay rui ni kaniw tuang kandih puat tuang suaihiam rui Jihudimei nunc khang ni nkhavlou nipui thouc e.

²⁸Ai mi guay tei kaniw khang tiilou tangna, mi taanv tei luailou kan e thei, Spain kandih thangc tat puni, kumna ai nangniw daeng khou guang khanvlou puni.

²⁹Ai nangniw khou guang pwkhou, Khrista tuang suaihiam padikna guang puni twmei ai thay e.

³⁰Chanathiu, aniu Poubauhmei Jisu Khrista paan rui khatni Bumaengh rui tiiloumei nzianmei paan rui, ai rui nangniw khou zaenghuay e: nangniw ni akhang huayney ranvna lay huayneylou o.

³¹Judia khou bammei lwm makmei nunc khou rui ata kanlou khang khatni Jerusalem khou bammei lwmmei nunc hei ai rui kaniw ta nkhavloumei hei neihlana laalou diu khang huayneylou o.

³²Kumna Ravguangc rui ningmei e thei, ai neihlamei padikna nangniw daeng khou guang khang, khatni nangniw rui achaengc tiringclou khang e.

³³Aniu khang chuzaenghmei tiiloumei Ravguangc rui nangniw guayna ta bam nduanghlou pw diu o. Amen