Read Rongmei Naga ROMMEI 3 Bible Online

ROMMEI 3 - Rongmei Naga bible

ROMMEI 3

¹Kum e thei, Jihudimei swmei tuang tabui gaeng tuang naina cho? Gihruamhmei rui tabui gaengna cho?

²Kalam kathuicna khou mbu e! Rey liangmei khou, Ravguangc rui kalat Jihudimei khou nsinlou the.

³Tiki kaniw meic gaanvsaekc tei lwm nuh makpui zaeng rui, Ravguangc hei lwm nuh makmei de twna sa nina cho?

⁴Kiuc hamh e! Meic guayna saraamc ngam kan sini, Ravguangc thu saraamc ni tu hamh e. “Nang sa pat pwkhou, nang nchumh e twmei thay puni; latzan khou nang ngam puni.” twna hylouna nai e.

⁵Aniu simei taanhmei rui Ravguangc rui gaymei taanhmei ta tihow nthanlou e thei, aniu akumhna sa kho cho? Ravguangc rui kalungpuam aniu ruc khou tikeylou bammei hei kamei nkhuai e twna sa kho cho? (Maansei riak thei layna ai sa tuang e.)

⁶Kiuc hamh e! Ravguangc kamei nchumhmei taanh mak ge thei, akumhna kamei mbaanv ta latzan sw ngam nina cho?

⁷Ai saraamhmei hei rui Ravguangc thu saraamh makmeipu e twmei nthanna lyanlouna, hei tei rui Ravguangc hym tidaiclou e thei, tabui swna ata paapcmei e twna latzan sw bam nina cho?

⁸Kum e thei, “Gay khang aniu simei taanv taanc di kho,” twna aniu sa kho cho? Mi hei kumcna ai rui sa e twna meic gaanvsaekc rui akhou nkhamlouna ata sw zaklou the. Kaniw mi kumcna samei hei nkhuaimei e twmei hei nchumhmei latzan the.

⁹Kum e thei, aniu Jihudimei hei Zentelmei suangc gay mbumei tuang[2] nai bu cho? Kumc mak ge! Jihudimei ni, Zentelmei ni paapc ngamv bangc khou bam e twmei ai lyanlou kan the.

¹⁰Nthanmei Latrik rui sa e: “Ravchaptatmei gaanv khat na sini maek ge,

¹¹ningtyngmei gaanv khat na sini maek ge, Ravguangc ta phumei gaanv khat na sini maek ge.

¹²Meic guayna Ravguangc khou rui duc tat kan the; kaniw guayna chaeng tat maanv ngam the; meic gaanv khat na sini gaymei taanh mak khe, gaanv khat na sini maek khe.

¹³Kaniw mwang tei laancloumei tarou kumc the; kaniw baley khou rui simei, saraamhmei luangc pat the, kaniw chy khou rui meic theic nimei nrui khay luangc pat the;

¹⁴Kaniw mwang tei nkhucmei syang rui padik the.

¹⁵Meic swluai swtiat khang kaniw phay nthaan the;

¹⁶Kaniw tatloupui bamv kathuic khou sw kasic karoucna ganclou the.

¹⁷Kaniw hei chuzaenghmei chaeng thay mak khe;

¹⁸Kaniw khou Ravguangc ta pingmei maek khe.”

¹⁹Riakdanv khou hyloumei guay tei Riakdanv bangc khou bammei nunc khang e twmei aniu thay e. Hei tei rui maansei mwang guay ta thingclou khang khatni Ravguangc rui mbaanv kapwm ta latzan sw khang e.

²⁰Kalam thu meic gaanv khat na sini Riakdanv ngaekpui paan rui Ravguangc mikzaw khou ravchaptatmei sw ngam mak ge. Kariak Latdanv tuang taanv thu maansei ta nang paapc taanc the twmei dinh khang de

²¹Ntaw thu, Riakdanv kazauh makna ravchaptatmei swpui chaeng Ravguangc rui ndauhlou the. Mi lam khou hei Mousi tuang Kariak Latdanv khatni Muhzwng nunc rui ni salou the.

²²Mi kiu thu, Jisu Khrista khou lwmmei guay ta Ravguangc rui ravchaptatmei tiswlou the. Kakhakh kalangv nai dat mak khe.

²³Kalam thu meic guayna paapc taanc ngam the, kumna Ravguangc tuang hymdaihmei tei guang tangh mak khe.

²⁴Tiki Ravguangc rui, kazauzian paan rui kapha kaphy maekna kaniw ta ravchaptatmei tiswlou the. Mi hei kaniw ta tinyngswloumei Khrista Jisu paan rui e.

²⁵Kazei rui paapc khaeng kuaklou khang, Ravguangc rui Khrista Jisu ta tii pat the; mi kuakloumei hei kakhou lwmpui paan rui laa khang e. Mi hei Ravguangc kamei thu nchumhmeipu e twmei lyan tuang e. Tat kanmei ganv khou tei thu, akhaengvlouna meic nunc paap guay tei zauc samlou the; tiki ntaw thu kamei hei thu nchumhmei taanhmeipu e twmei lyanna, kamei rui kaniw paap guay nsa ganclou dat mak khe. Kumna Jisu khou lwmmei guay ta ravchaptatmei tiswlou the twmei kamei rui lyanlou the.

²⁷Kum e thei, aniu gaengh sw nuhpui lam tabui tuang naina cho? Khat sini maek ge! Mi kiu tabui zaeng rui cho? Aniu Riakdanv piupui paan rui cho? Kiuc hamh e! Lwmpui paan rui de!

²⁸Kum thena, Riakdanv piupui paan rui hamhna, lwmpui paan rui aniu ta ravchaptatmei tiswlou the twmei thay the.

²⁹Ravguangc hei Jihudimei Racguangc na dina cho? Zentelmei Racguangc ni hamh nah cho? Ngguay, kamei Zentelmei Racguangc ni de.

³⁰Ravguangc thu akhat na de, kumna Jihudimei ta ni, Zentelmei ta ni kaniw lwmpui paan rui ravchaptatmei tiswlou puni.

³¹Kum e thei, lwmmei hei rui Riakdanv ti hei ganc thah? Ganh mak ge! Aniu Riakdanv ta nthukna sw bam de.