Read Rongmei Naga ROMMEI 5 Bible Online

ROMMEI 5 - Rongmei Naga bible

ROMMEI 5

¹Lwmpui paan rui aniu ta ti-nzihlouna Poubauhmei Jisu Khrista paan rui Ravguangc lev aniu kak khou chuzaenghmei nai dat the.[3]

²Khrista rui aniu ta ntaw aniu laatowna bammei Ravguangc zauzian khou, lwmpui paan rui phungc guanglou the. Kumna Ravguangc tuang hymdaihmei tei aniu ni lay laa punimei khang tei lwmgayna neihla bam e.[4]

³Mi na hamh e, aniu ryanramei ariwmei khang tei neihla bam e,[5] kalam thu ryanramei rui khaengvthaymei tiguang e;

⁴khaengvthaymei rui Ravguangc rui laalou nuhmei kheiliak tiguang e; kumna Ravguangc rui laalou nuhmei kheiliak rui rigwnmei tiguang e.

⁵Mi rigwnmei hei rui aniu ta tichangamclou ni tu hamh e, kalam thu aniu khou tiiloumei Bumaengh Nthanmei paan rui Ravguangc rui karam zian aniu lung khou bun keylou the.

⁶Kalam thu aniu ramh swthuy lakna bam khou, kaganv tangc pwkhou, meicsimei aniu khang, Khrista theiclou the.

⁷Ravchaptatpui mei gaanv khat khang sini theiclou khang kungc sih tuang e. Meicgaymei khang thu theiclou diwmei ni nai bam nuh e.

⁸Tiki aniu paapcmei sw bam khou, Khrista aniu khang theiclouna, Ravguangc kamei aniu ta adih nzian cho twmei lyanlou the!

⁹Kazei paan rui aniu ta ravchaptatmei swna chaklou the, kum thena kapaan rui aniu ta Ravguangc lungpuam khou rui kanlou rap puni di the.

¹⁰Aniu hei Ravguangc khang howmumei sw bam khwan e, tiki Kanac Mpouh theicloumei paan rui aniu Ravguangc lev guatcsw dat the. Ntaw thu aniu Ravguangc lev guatcsw dat thena, kamei ringhmei paan rui aniu ta kanlou rap puni the.

¹¹Mi na hei hamh e, ntaw aniu ta Ravguangc khou zay kariulou datmei Poubauhmei Jisu Khrista paan rui aniu Ravguangc khou neihla bam e.

¹²Meic gaanv khat khou rui mbaanv khou paapc guang the, khatni paapc khou rui theihmei guang the, Mi kumna theihmei hei meic guayna khou guanglou the; kalam thu meic guayna paapc taanc the.

¹³Riakdanv tiilou makmei hu khou rui mbaanv khou paapc nai bam khwan di the; tiki kariak maek ge thei paapc tei kachakh chaklou mak ge.

¹⁴Tiki Adam kumcna Ravguangc latdanv liamna kaniw paapc taanh mak khwan sini, Adam khou rui thauna Mousi nganv ni meic nunc ruc khou theihmei rui guanghtu bam khwan di the. Adam hei guang punimei Jisu Khrista kumhmei tuang e.

¹⁵Tiki Adam lev Khrista thu nchamc mak ge; kalam thu Ravguangc tuang kaipat hei thu Adam paap lev nchamc mak ge. Adam paap zaeng rui meic mpeyna theic the. Tiki Ravguangc zauzian thu daic ranv the, kumna Jisu Khrista zauzian paan rui katuang katy kamanv maekmei kaipat meic peyna khang tiilou the.

¹⁶Ravguangc tuang kaipat lev Adam paap thu nchamc mak ge. Adam paap khou rui “nkhuaimei the” twmei latzan keylou the; tiki paapc heizumei tangv “nkhuaimei hamh the” twmei katy kamanv maekmei kaipat hei tiilou dat the.

¹⁷Adam paap zaeng rui, kakhou rui theihmei rui zyn the. Tiki Jisu Khrista tuang taanv thai thu adih daic kan tha! Ravguangc tuang kanganv maekmei zauzian kaipat khatni kamei rui tiiloumei ravchaptatmei kaipat laatowmei guay thu Khrista paan rui ringc puni.

¹⁸Kum thena, Adam rui twan lyammei khou rui meic guayna ruc khou latzan keyloumei kumcna, Khrista tuang ravchaptatmei taanv paan rui meic peyna khuay laa ganclou the, kumna ringhmei tiilou the.

¹⁹Adam latliampui zaeng rui meic peyna ta paapcmei tiswloumei kumcna, Khrista latpiupui paan rui meic peyna ta ravchaptatmei tiswlou puni.

²⁰Riakdanv tiiloumei thu khuay geih khang de; tiki paapc mbu thaupui thei layna Ravguangc zauzian ni mbu ranv de.

²¹Mi kumna, paapc rui ngamna theic bam khwanmei khou rui zauzian rui ngamna ravchaptatmei tiswlouna, Poubauhmei Jisu Khrista paan rui aniu khang ringcsuangmei tiilou the.