Read Rongmei Naga ROMMEI 6 Bible Online

ROMMEI 6 - Rongmei Naga bible

ROMMEI 6

¹Kum e thei, aniu akumhna sa kho cho? Ravguangc zauzian mbu hay hay bam khang aniu paapc taanc bam kho na cho?

²Kiuc hamh e! Aniu hei paapc biak thangc thu theic tang the; akumhna aniu paapc taanc bam dat ni hena cho?

³Duilupna Khrista Jisu khou kariu kanmei aniu hei kamei theihmei khou tei lay theic kanmei tuang di the twmei nangniw thay mak nah cho?

⁴Pu tuang hymdaihmei pumtan paan rui Khrista ta theihmei khou rui tiringcthaulou kanmei tei kumcna, aniu ni panty kathanc khou lungh khang, aniu duilup khou tei kamei lev tarou khou mbeihlou kazauhna kamei theihmei khou tei lay theic kazauh the.

⁵Aniu ni mi hei kumcna, kamei theihmei khou tei lay theic e thei, mi hei kumcna kamei ringcthau datmei khou tei ni lay ringcthau puni.

⁶Aniu paapc bangc sw dat mak khang rui, paapc pumtan tei swmaan khang, aniu tuang karaanmei mei ta tei Khrista lev kros khou thaengcluai kan the twmei aniu thay e.

⁷Kalam thu, mi kumna theic kanpui mei tei thu kamei paapc khou rui duak the.

⁸Aniu Khrista thei lay theic e thei, aniu Khrista thei lay ringc dat puni twmei aniu lwm e.

⁹Kalam thu Khrista ta tei tiringcthaulou dat kan thena, kamei theic dat lak khe— theihmei rui kata ngam dat lak khe twmei aniu thay e.

¹⁰Kumna, kamei theic kan thena, paapc rui kata ngam dat mak khe; kumna kamei Ravguangc lev lungc nchamcmei panty khou lungc bam the.

¹¹Hei tei kumcna, nangniw hei paapc biak thangc thu theic the, tiki Khrista Jisu khou Ravguangc lev ringc nchamc bam the twmei ning nina the.

¹²Hei zaeng rui, pumh rui kahawmei tei titaanc dat mak khang, paapc ta nangniw pumc tuang kaipouc tisw dat lak nina the.

¹³Simei khou sinsw khang nangniw pumc nanw akhat na ta sini paapc khou tiilou dat lak nina the. Mi phaan tei theihmei khou rui tiringcthaulou datmei mei swna nangniw ta Ravguangc khou tiilou nina e; khatni ravchaptatmei khou sinsw khang nangniw pumc nanw guay Ravguangc khou tiigutlou nina e.

¹⁴Paapc ta nangniw tuang kaipouc tisw dat lak nina the; kalam thu nangniw Riakdanv bangc khou bam dat mak khe; zauzian bangc khou bam di the.

¹⁵Kum e thei, aniu Riakdanv bangc khou hamhna Ravguangc zauzian bangc khou bam di thena, aniu paapc taanc di kho twna cho? Kiuc hamh e!

¹⁶Nangniw ta gaanv khat khou bangh swna tiilou pwkhou, nangniw hei kalat piu bammei nangniw kaipouc bangc tei the twmei nangniw thay e. Nangniw hei theihmei khou zayloumei paapc bangc hamh e thei ravchaptatmei khou zayloumei latpiumei bangc sw bam nuh e.

¹⁷Tiki Ravguangc ta thuancku kho! Kalam thu kaganv akhat khou nangniw paapc bangc sw bam khwan sini, ntaw thu nangniw khou dincloumei latdyn tei nangniw lungh gutna piu the.

¹⁸Nangniw ta paapc ngamv khou rui laa duaklouna ravchaptatmei bangc sw the.

¹⁹Nangniw khou meic pumc tuang suanmei naipui zaeng rui, maansei tuang riak khou sa tuang e. Kaganv akhat khou nangniw rana nangniw ta simei taanv taanh khang mphuammei khatni simei bangc swna tiilou bam khwan e. Hei tei kumcna nangniw ta sw nthanloumei panty khou zaylou khang, nangniw ta ravchaptatmei bangc swna tii gutlou nina e.

²⁰Nangniw paapc bangc sw bammei douc tei, ravchaptatmei khou rui nangniw nyngsw bam khwan e.

²¹Nangniw ntaw zak datna bammei taanv guay tuang thai nangniw khang tabui tuang nai tha? Mi tuang taanv thai tei thu theihmei e.

²²Tiki ntaw thu nangniw ta paapc khou rui laaduaklou the, kumna nangniw Ravguangc bangc nunc di the. Mi tuang thai kiu thu nangniw ta nthanmei khou zayloumei, kumna ringcsuangmei laamei hei the.

²³Kalam thu paapc taanv phy thu theihmei e; tiki Ravguangc kaipat thu Poubauhmei Khrista Jisu khou ringcsuangmei e.