Read Rongmei Naga ROMMEI 7 Bible Online

ROMMEI 7 - Rongmei Naga bible

ROMMEI 7

¹Chanathiu, ai rui sa nimei hei nangniw kabah thay puni; kalam thu kariak lam khou nangniw thay e. Kariak rui gaanv khat ta karakcmei thu kamei ringc bam saanv na tei de.

²Sa kidana, mihmei ntumei khat tei kagaanv ringc bam saanv, kariak thei layna kamei mi pu now tei e; tiki mi pu tei theic kan e thei, kamei mi pu now tei de twna kariak rui karak dat mak khe; kanyng di the.

³Kumna kagaanv ringc bam khou kamei nggaanvmei baihmei lev lungc e thei, kata lungcmaanvmei pui twna sa puni. Tiki kagaanv theic kan e thei, kariak thei layna kamei kanyng di the; kamei meickai now sw dat sini lungcmaanvmei hamh the.

⁴Chanathiu, nangniw ni hei tei kumhmei tuang e. Riakdanv khou thu nangniw theic tang the; kalam thu nangniw thu Khrista tuang pumc dam akhat di the, khatni Ravguangc khang kathai nthai khang ntaw thu nangniw hei theihmei khou rui ringcthau dat kanmeipu tuang di the.

⁵Aniu pumc rui kahawmei thei layna aniu lungc bammei douc tei, Riakdanv tei rui paapc taanc niimei lungning aniu pumc khou tipatlouna, theihmei thai nthai nimei taanv aniu taanc bam khwan e.

⁶Tiki ntaw thu aniu ta Riakdanv khou rui riclou the; aniu ta bangclou bammei Riakdanv khou tei rui thu aniu theic ntamv the. Kum thena, ntaw aniu Ravguangc siamruai sw nimei hei karaanmei hyloumei latdanv thei tei layna hamhna, Bumaengh tuang riakthanh thei tei layna sw nina the.

⁷Kum e thei, Riakdanv hei paapc cho? Kiuc hamh e! Tabui tei paapc cho twmei akhou dincloumei thu Kariak Latdanv rui e. “Nang meickai tuang kahaw lak nina e,” twna Riakdanv rui sa mak khwan e thei, meickai tuang kahawmei hei simei e twmei ai thay lak ni tuang e.

⁸Tiki mi Riakdanv khou phaypan swna paapc rui alung khou meickai tuang ta laa niipui tuang lungning tipat re. Kariak Latdanv maek khou thu paapc hei theihmei de.

⁹Ai hei ni kaganv akhat khou akhang Riakdanv maekna ringc bam khwan e; tiki akhang Riakdanv nai guang pwkhou paapc ringcthau the,

¹⁰kumna ai theic the. Ringhmei phungc guang khang tiiloumei Kariak Latdanv tei rui akhang thu theihmei phungc guang the.

¹¹Paapc tei kakhang kadouchamei laana Riakdanv tei sinswna ata guat the, kumna ata Riakdanv tei rui swluai the.

¹²Kumna, Riakdanv khatni latdanv hei nthanmei e, nchumhmei e, khatni gaymei e.

¹³Tiki gaymei tei rui ata swluai tuang e twna sa tu cho? Kiuc hamh e! Mi hei sw bammei thu paapc rui de; gaymei ta tei sinswna paapc rui katuang kalingmei lwnlung tei ndauhna akhou theihmei phungc guang the. Mi kumcna, paapc hei heidikamv si e twmei, Kariak Latdanv paan rui lyanlou the.

¹⁴Riakdanv hei thu Bumaengh tuang e twmei aniu thay e; tiki ai hei thu paapc bangc swmei maansei e.

¹⁵Ai rui taanc bammei ti hei ai kabah thay mak ge; kalam thu ai taanc niimei tei ai taanh mak ge, ai karaengmei tei ai taanc e.

¹⁶Ai taanc bammei hei ai taanc zihmei e. Mi hei rui lyanmei thu Riakdanv hei thu nchumhmei e twmei ai nuh the twpui tuang e.

¹⁷Mi hei taanc bammei hei kaling thu ai rui hamh e; akhou nai bammei paapc tei rui e.

¹⁸Akhou, twmei thu apumc khou gaymei taanc ngammei tuang maek ge twmei ai thay e. Kalam thu gaymei taanc niimei tuang akhou nai sini, hei tei ai taanc ngam mak ge.

¹⁹Ai rui taanc niimei gaymei tei ai taanh mak ge; ai rui taanc zihmei simei tei ai taanc e.

²⁰Ai rui taanc zihmei tei ai taanc bammei hei rui lyanmei thu, hei tei taanc bammei tei ai rui hamh e; akhou nai bammei paap tei rui e.

²¹Gaymei taanc niimei chwn akhou nai sini, ai rui taanhmei thu simei taanc rap bammei tuang nai e.

²²Alung syng khou thu Ravguangc tuang Riakdanv ta kahaw e;

²³tiki kalwnlung tuang baihmei latzan akhat akhou taanv sw bammei ta ai thay e. Mi kiu thu alung rui gaymei e twna laaloumei latzan ta tei adow bammei latzan e. Mi hei rui ata apumc khou taanv sw bammei paap tuang latzan bangc tisw the.

²⁴Ai hei ramh sw thui lakpui mei di the! Ata theihmei khou zaylou nimei, mi pumc khou hei rui thow rui ata kanlou nina cho?

²⁵Aniu Poubauhmei Jisu Khrista paan rui Ravguangc ta thuanc e! Kumna mi hei atuang lwnlung the: ai alungning rui Ravguangc tuang Riakdanv bangc sw the, kumna akhou naimei mei hei rui paapc tuang riakdanv bangc sw the.