Read Rongmei Naga 1 KORINMEI 1 Bible Online

1 KORINMEI 1 - Rongmei Naga bible

1 KORINMEI 1

¹Ravguangc rui ningmei thei layna Khrista Jisu tuang latdiutatmei khang kawloumei Paul khatni chana Sostheni rui—

²Korinmei kaidai khou naimei Ravguangc tuang phwamling khou, kabamv kathuic khou bammei aniu Kaipouc Jisu Khrista zanc saanhmei guay lev Ravguangc mei sw nchamc khang, Khrista Jisu khou bammei paan rui sw nthanloumei nunc khou:

³Aniu Pu Ravguangc khatni Poubauhmei Jisu Khrista khou rui zauzian khatni chuzaenghmei nangniw khou tiilou pw diu.

⁴Khrista Jisu khou bammei paan rui nangniw khou tiilou bammei Ravguangc zauzian khang tei ai Ravguangc ta thuancku bam e.

⁵Kalam thu Khrista khou bammei paan rui nangniw kalam kathuic khou latsav khou ni, thaymei khou ni mbu thau the.

⁶Khrista lam khou nchamloumei tei nangniw khou ntipna kamaan tizangclou the.

⁷Twmei thu, aniu Kaipouc Jisu Khrista guang nimei ta chaengphaengcna nkhwan bam khou, nangniw Bumaengh kaipat laatow ntangh the.

⁸Jisu Khrista tuang tingmik nungc kiu, nangniw khuay maekmei sw khang, nangniw katwan nganvna ntipna bam khang Ravguangc rui nkhavlou puni.

⁹Kanac Mpouh, aniu Kaipouc Jisu Khrista lev lungc nchamc khang nangniw ta kawloumei Racguangc hei kalat suai makmeipu e.

¹⁰Chanathiu, aniu Kaipouc Khrista Jisu zanc khou ai nangniw khou zaenghuay e: nangniw meic guayna lat nchamc o, nangniw pang khou kalangv pat riu; nangniw lungh chamc chwn chamcna lungc o.

¹¹Achanathiu, nangniw pang khou agay agimei nai e twna Kloi kaikhuncmei gaanvsaekc rui akhou raclou e.

¹²Ai rui samei kiu thu: nangniw gaanv khat rui, “Ai thu Paul mei de,” baihmei rui, “Ai thu Apollo mei de,” baihmei rui, “Ai thu Pitar mei de,” hamh e thei baihmei rui, “Ai thu Khrista mei de,” twna sa e twpui tuang e.

¹³Khrista ta kalangv tipat the nah cho? Nangniw khang kros khou theicloumei tei Paul cho? Nangniw ta Paul zanc khou duiluplou bw nah cho?

¹⁴Krispa lev Gaia ta na hamhna nangniw gaanv khat na ta sini ai duiluplou kan mak ge; mi khang tei ai Ravguangc ta thuancku e.

¹⁵Kum mak ge thei, azanc khou duiluplou e twna nangniw gaanvsaekc rui sa nuh tuang e.

¹⁶(Ai rui Stephena kai kaikhunc ta ni duiluplou kan e; baihmei ta thu ai swlou kanmei ta thay mak ge.)

¹⁷Khrista rui ata ndiuloumei thu duilup khang hamh e; Gaychamv dinh khang de; maansei tuang ningting latsav rui Khrista tuang kros pumtan swmaan makna dinh khang e.

¹⁸Kalam thu kros tuang lat hei maan bammei nunc khang thu kabah maekpui lat re; tiki Ravguangc rui kanlou bammei aniu khang thu mi hei Ravguangc tuang pumtan e.

¹⁹“Ningtyngmei nunc tuang ningting ai rui swmaanlou puni, ntakmei nunc tuang takh tei nsa tiswlou puni,” twna hylouna nai e.

²⁰Kum e thei, ningtyngmei tabui thangc tha? Riakdanv dinhpouc tabui thangc tha? Mi kandic tuang latsathaymei nunc tabui thangc tha? Mi mbaanv tuang ningting thu mpangmei de twmei Ravguangc rui lyanlou the.

²¹Kalam thu Ravguangc rui katuang ningting khou, mbaanv tuang ningting rui Ravguangc kata thay khang swlou mak ge. Mi phaan tei, “mpangmei lat” de twna sa bammei aniw rui dinc bammei latchamv paan hei rui, lwmmei guay ta kanlou khang Ravguangc rui ningmei e.

²²Lwm khang Jihudimei rui sw-nchinmei taanv khou ngangvlou e, Grikmei rui ningting khou ngangvlou e.

²³Tiki aniw thu, Jihudimei nunc khang phaysuy bamv khatni Zentelmei khang mpangmei lat swmei kros khou thaengcluaimei Khrista chamv dinc e.

²⁴Tiki Ravguangc rui kawloumei nunc khang thu, Jihudimei khang ni, Grikmei nunc khang ni Khrista hei Ravguangc tuang pumtan khatni Ravguangc tuang ningting e.

²⁵Kalam thu Ravguangc tuang mpangmei tei maansei tuang ningtyngmei suangc ningtyng e, khatni Ravguangc tuang suanmei tei maansei tuang pumtan suangc tanc e.

²⁶Achanathiu, nangniw ta Ravguangc rui kawmei hei zauc o. Mbaanv mikzaw khou, nangniw pang khou, ningtyngmei azuh mak ge, saengc daihmei azuh mak ge, lungcgaymei azuh mak ge.

²⁷Tiki ningtyngmei nunc ta tizak khang Ravguangc rui mbaanv mikzaw khou mpangmei nunc ta kapah the, khatni tanhmei nunc ta tizak khang mbaanv mikzaw khou suanmei nunc ta kapah the.

²⁸Mbaanv rui nthukmei e twna ning bammei ta tei timaan khang, mbaanv rui malana ramh sak makna, ramhkhat sini hamhmei khang ninglou bammei nunc ta tei kamei rui kapah the.

²⁹Mi hei gaanv khat na sini Ravguangc hu khou gaengh sw mak khang e.

³⁰Tiki Ravguangc rui nangniw ta Khrista Jisu khou tikariulou the, kumna Khrista hei aniu khang ningting the. Kapaan rui aniu ta ravchaptatmei tiswlou the, nthanmei tiswlou the, khatni aniu ta thuaklou the.

³¹Hei zaeng rui, hylou bammei kumcna, “Thow pw ni gaengh sw nii e thei, Poubauhmei rui taanclou kanmei khang tei rui gaenghsw nina e.”