Read Rongmei Naga 1 KORINMEI 11 Bible Online

1 KORINMEI 11 - Rongmei Naga bible

1 KORINMEI 11

¹Ai Khrista thei lay nzeicmei kumcna nangniw ni athei lay nzeic o.

²Nangniw ata ningtow tanh tan bammei khatni ai rui dinclou kanmei latdyn guay tei piu bammei khang tei ai nangniw ta thuancku e.

³Tiki Khrista hei nggaanvmei py e, nggaanvmei hei kanow py, khatni Ravguangc hei Khrista py e twmei nangniw thaymei ta kahaw e.

⁴Nggaanvmei rui huayney khou hamh e thei ravmundinh khou kapy gum e thei, hei tei kapy singhmei Khrista ta chakhwang sw mak tuang e.

⁵Ntumei rui huayney khou hamh e thei, ravmundinh khou kapy gum mak ge thei, kapysinghmei kagaanv ta chakhwang sw mak tuang e. Kamei hei kapy guatmei lev nchamc di the.

⁶Kapy gum zihmeipui tei thu kapy tiap nina e; tiki ntumei kapy tiapmei, hamh e thei kapy guatmei hei zakpui tuang e thei, kapy gum nina e.

⁷Nggaanvmei thu Ravguangc ta luicna damcloumei khatni Ravguangc hym tiiloupui mei pui zaeng rui, kapy gum lak nina e. Ntumei thu nggaanvmei tuang hym laamei mei e;

⁸kalam thu ntumei hei nggaanvmei khou rui damh tuang e; nggaanvmei hei ntumei khou rui damh tuang hamh e.

⁹Nggaanvmei hei ntumei khang damclou tuang hamh e, tiki ntumei hei thu nggaanvmei khang damclou tuang e.

¹⁰Hei zaeng rui, kauh baanchara guay zaeng rui, ntumei rui kagaanv bangc khou bammei lyanna kapy gum nina e.

¹¹Kum e tiki, aniu Poubauhmei khou bammei panty khou hei, ntumei ni nggaanvmei kazauh makna nuh mak ge, nggaanvmei ni ntumei kazauh makna nuh mak ge.

¹²Kalam thu ntumei ta nggaanvmei khou rui damh tuang e, kumna nggaanvmei hei ntumei khou rui puanc e. Kumna ramh guayna hei Ravguangc khou rui e.

¹³Ntumei rui kapy gum makna Ravguangc khou huayneymei hei kazi ny kazi mak ny, nangniw rana kakhanh o.

¹⁴Nggaanvmei khang sam saenghmei hei zakpui tuang e,

¹⁵tiki ntumei khang thu sam saenghmei hei zauc gaypui tuang e twmei kalwnlungh rui ni aniu khou dinclou the. Ntumei khang sam saenghmei tiiloumei hei gum khang e.

¹⁶Tiki thowkumhmei rui mi lam khou hei agi nii di he thei, aniw rui ni, Ravguangc phwamling rui ni mi lam khou hei kariak baihmei sa dat khang maek khe.

¹⁷Tiki kabangc khou latbamv hei sa nimei khou hei thu, ai nangniw ta thuancku khang maek ge. Kalam thu nangniw guang kariumei tei gay khang hamhna, si khang di the.

¹⁸Rey liangmei khou, nangniw guang kariu bammei khou tei lungh chamc makmei kang nai e twmei ai chu e. Hei tei nchumhmei asaekc nai khuangh the twmei lwm the.

¹⁹(Nchumhmei khou bammei nunc ta nthanna thay pat khang nangniw pang khou kalangv thu nai ni tina the.)

²⁰Nangniw guang kariu khou tu bammei tei Poubauhmei taektw tu tu hamh e.

²¹Kalam thu nangniw tupui ganv khou khat khat ta nkhwan makna, kakhang kakhang tu the, kumna gaanvsaekc thu ndaapc bam, gaanvsaekc thu zangv mba bam the.

²²Nangniw tu zangvpui bamv khang nangniw kai maekna cho? Hamh e thei, Ravguangc tuang phwamling ta thouhsw makna lungcsimei nunc ta swzak bam tu cho? Mi lam khou hei ai tabui tuang lat sa o twna cho? Ai nangniw ta sathuanc bam kho cho? Ai nangniw ta sathuanh khang maek ge!

²³Ai rui nangniw khou dinclou kanmei tei Poubauhmei rui saloupui lat re. Mi kiu thu: Poubauhmei Jisu, kata tinym nimei zingbangc tei, ntyan dwm akhat laana,

²⁴Ravguangc ta thuanckulouna, hei tei by bakna, sa the: “Mi hei nangniw khang tiipatloumei apumc the. Ata ningtow khang mi hei tu o.”

²⁵Hei tei kumcna, zingbangc naptw tu tang pwkhou, kamei rui buangh akhat laana, “Mi hei azei rui swloumei latdyng thanh tuang buangc e. Nangniw mi hei zangvpui kathuic ata ningtow khang taanc o,” twna sa the.

²⁶Mi kiu thu, nangniw mi tyan hei tupui kathuic khatni mi buangc hei zangvpui kathuic, Poubauhmei theicloumei ta tei, kamei guang mak saanv dinc ndauh bam tuang e.

²⁷Mi ruc khou rui, thow pw ni Poubauhmei tuang tyan tei tu biuh makna tupui mei khatni katuang buangc tei zangv biuh makna zangvpui mei tei, Poubauhmei pumc khatni kazei ruc khou nkhuaipui mei e.

²⁸Hei zaeng rui, meic kathuicna kalam kalam khou kakhanh rey lana ntyan tei tu kan diu khatni buangh tei zangv kan diu.

²⁹Kalam thu kamei rui Poubauhmei pumc tuang kabac tei thay makna ntyan tei tu pwkhou khatni buangh tei zangv pwkhou, kamei hei tei tumei khatni zangvmei tei rui karana karuc khou latzan phungc guang bam tuang e.

³⁰Hei zaeng rui, nangniw meic mpeyna nnau suc nuc bam tuang e, kumna meic gaanvsaekc thu theic kan the.

³¹Aniu rana aniu ta latzan sw rey e thei, aniu khou Ravguangc latzan keylou mak puni.

³²Tiki mi mbaanv ta ganc pat pwkhou, aniu kazauh mak khang, Poubauhmei rui aniu ta latzan sw e, kumna riaplou e.

³³Hei zaeng rui, achanathiu, Poubauhmei tuang taektw tu khang nangniw guang kariupui ganv khou, khat khat ta nkhwan o.

³⁴Nangniw guang kariumei tei rui nangniw ta latzan khou zaylou mak khang, thow pw ni ndaapc e thei, kakai kakai thangc tu o. Kalam baih baihmei tei thu, ai guang pwkhou rui dinclou puni.