Read Rongmei Naga 1 KORINMEI 12 Bible Online

1 KORINMEI 12 - Rongmei Naga bible

1 KORINMEI 12

¹Ntaw Bumaengh Nthanmei kaipat lam khou tei, chanathiu, nangniw thay mak bammei ta ai laa nii mak ge.

²Nangniw ravningmakmei sw bammei douc tei, nangniw ta kalam mpeyna khou, lat sa thay makmei ravmaengc guay khou zay mbiangh tat bam khwan e twmei nangniw thay e.

³Kumna Ravguangc Bumaengc rui zayloupui mei rui, Jisu ta siang ngam ni tu hamh e, khatni Bumaengh Nthanmei rui zaylou makna meic gaanv khat na sini, “Jisu hei Poubauhmei e,” twna sa ngam ni tu hamh e twmei nangniw thay o.

⁴Kaipat kazaat mpeyna nai e; tiki mi guay tei tiimei Bumaengc thu akhat na de.

⁵Siamruai taanv thu kazaat mpeyna nai e, tiki aniu rui siamruai swmei Kaipouc thu akhat na de.

⁶Siamruai tuang taanv khou hei kamei kamei rui taanc ngammei baic baicna nai e; tiki hei tei tiiloumei Racguangc thu akhat na de.

⁷Bumaengh bam e twmei, mathiuc khang gay nimei thei layna, meic kathuic khou kathiak baic baicna ndauh pat re.

⁸Bumaengh tei rui gaanv khat khou ningting lat sa khang tiilou e, khatni mi Bumaengc tei rui gaanv khat khou thaymei lat sa khang tiilou e.

⁹Mi Bumaengc tei rui gaanv khat khou lwmmei tiilou e, baihmei khou tigayloumei kaipat tiilou e;

¹⁰gaanv khat khou Ravguangc pumtan taanc ndauh khang, baihmei khou ravmundinh khang, baihmei khou kaipat tei Bumaengh Nthanmei tuang ny, baihmei tuang ny thay khang tiilou e. Gaanv khat khou thay makmei lat zaat sa khang tiilou e, khatni baihmei gaanv khat khou mi lat kabac tei dinh khang tiilou e.

¹¹Mi guay hei Bumaengh akhat na rui, kamei rui ningmei thei layna tiilou tuang e.

¹²Meic pumc khou hei nanw mpeyna nai e; tiki mi guay tei pumh akhat na de. Khrista hei ni hei tei kumh tuang e.

¹³Kalam thu aniu meic guayna ta Jihudimei ta ni, Zentelmei ta ni, bangh ta ni, nyngswmei ta ni Bumaengh tei rui pumh akhat khou lup kariulou the; kumna aniu meic guayna khou, mi Bumaengc tei tiilou nchamc de.

¹⁴Pumh akhat hei nanw akhat na rui sw mak ge, mi khou tei nanw mpeyna nai e.

¹⁵Phay rui, “Ai thu baanh hamh dina, pumh tuang hamh e,” twna sa tina, hei tei pumh tuang nanw sw taan mak ge.

¹⁶Khatni nukuanc rui, “Ai thu mik hamh dina, pumh tuang hamh e,” twna sa tina hei tei pumh tuang sw taan mak ge.

¹⁷Meic pumc hei mik khwan e thei, akumhna chu nina cho? Meic pumc hei nukuanc khwan e thei, akumhna ramh rym namh nina cho?

¹⁸Ravguangc kamei rui ningmei thei layna meic pumc tuang nanw guay hei nai bammei hei kumcna duanc kariulou the.

¹⁹Kapwmna hei nanw akhat na rap khwan e thei, pumh swna akumhna nai nina cho?

²⁰Nai bammei hei kumcna, aniu pumc khou nanw mpeyna nai e, tiki pumh akhat na de.

²¹Kumna, mik rui baanh ta, “Nang akhang kage maek ge,” twna sa nuh mak ge. Py rui ni phay ta, “Nang akhang kage maek ge,” twna sa nuh mak ge.

²²Meic pumc khou ramh sw ngam lak ni kumhmei nanw tei ni kage nai de;

²³aniu rui gaeng thuai rap makmei de twna ningmei nanw guay tei aniu rui kadan ranvna swloumei nanw sw de; howsimei nanw ta tei ni howsi mak khang swlou e;

²⁴kumna howgaymei nanw khou thu hei tei kumcna swlou khang kage maek ge. Kumna Ravguangc rui tichingkhiuhlou khang kage naimei nanw ta tei tichingkhiuhlou khang meic pumc nanw guay ta, mi kumna duanc kariulou e.

²⁵Mi kumna, meic pumc nanw guay hei khak langh tuang maekna, khat khat khang kadan karyna lungc e.

²⁶Meic pumc nanw akhat suc ti thei, baihmei guay tei ni lay suc e; nanw akhat ta thuanckulou ti thei, baihmei guay tei ni lay neihla e.

²⁷Nangniw meic guayna hei Khrista tuang pumc e, kumna gaanv khat khat hei nanw khat khat re.

²⁸Ravguangc rui phwamling khou rey liangmei khou latdiutatmei nunc lou the; kaneimei khou ravmundinhmei nunc, kathumhmei khou latdinhmei nunc; mi tangv charynmei pumtan taanv taanhmei nunc; mi tangv tigayloumei nunc; nkhavloumei nunc; taanvpy sinmei nunc; thay makmei lat samei nunc tiilou the.

²⁹Kaniw guayna tei latdiutatmei rana hamh e; muhzwng rana hamh e; latdinhmei rana hamh e. Meic guayna Ravguangc pumtan taanv taanhmei nunc rana hamh e;

³⁰tigaymei kaipat naimei rana hamh e; thay makmei lat samei rana hamh e; khatni mi kabac tei dinc ngammei rana hamh e.

³¹Kumna nangniw gay liangmei kaipat tei kahaw o. Gay liangmei kiu ai nangniw khou dinclou puni.