Read Rongmei Naga 1 KORINMEI 13 Bible Online

1 KORINMEI 13 - Rongmei Naga bible

1 KORINMEI 13

¹Ai maansei tuang lat guay khatni kauh baanchara tuang lat guay sa ngam bam nuh e; tiki akhou nzianmei maek ge thei, ai rui sa bammei guay tei kakhing bammei mbang khatni syamtuaic tei kumh tuang de.

²Ai ravmundinc bam nuh e; meic thay makmei tei thaymei akhou nai bam nuh e; chyngbut ta nganvna tikalaic ngammei ramlum akhou nai bam nuh e; tiki akhou nzianmei maek ge thei, ai hei nsa de.

³Atuang naimei guay ai tii pat bam sini, khatni mai ntei khang[9] apumc ti hei tii pat bam sini, akhou nzianmei maek ge thei, hei tei rui akhang gaeng tuang maek ge.

⁴Nzianmei rui akhaengvlou e khatni zauc nzianlou e. Nzianmei rui mamav mak ge khatni daihlwn sw mak ge;

⁵nzianmei rui meic nzi mak ge, kakhang na ning mak ge, ningsumh mak ge; nzianmei rui nkhuaimei ta kasing phuh mak ge;

⁶nzianmei rui simei khou neihla mak ge, nchumhmei khou neihla e.

⁷Nzianmei rui kaguayna ta khaengvlou e, kapwmna lwm e, kapwmna lwmgay e, kalam kapwmna khou khaengv saengc e.

⁸Ravmundinhmei dinc taan kan ni de, thay makmei lat samei nthaekc kan ni de, thaymei ni maan kan ni de; tiki nzianmei hei thu maan dat mak khe.

⁹Kalam thu aniu thaymei hei kalangv asaekc na thay e, khatni aniu ravmundinhmei hei kalangv asaekc na de;

¹⁰tiki kapwm tei guang pwkhou, kalangv asaekc na hei thu maan kan ni de.

¹¹Ai alauc sw bammei douc tei, alatsav, achwn khatni alungning hei alauc tuang khwan e; ntaw thu ai gaanvdaih di the, kumna alauc douc tuang guay tei akhou nai dat mak khe.

¹²Ntaw aniu howmei hei thu maengzau paek khou meic maengc tamih mina howmei tei kumh tuang de; tiki zaw lev zaw how puni. Ai ntaw howmei thu kalangv asaekc na de; tiki ata thay nthan thiakmei kumcna ai ni thay nthan thiak puni.

¹³Tiki ntaw mi lwmmei, rigwnmei khatni nzianmei hei thu nai bam puni; kumna mi guay khou hei daic liangmei thu nzianmei e.