Read Rongmei Naga 1 KORINMEI 14 Bible Online

1 KORINMEI 14 - Rongmei Naga bible

1 KORINMEI 14

¹Nzianmei hei nangniw khou nai khang karamc o; kumna Bumaengh kaipat khang, nkunna, ravmundinh khang kahaw o.

²Kadath datmei lat rui sa bammei tei thu Ravguangc khou sa bam tu de, maansei nunc khou hamh e; kalam thu kamei rui sa bammei tei meic rui kabah thay mak ge. Kamei meic thay makmei tuang tei Bumaengh paan rui sa bam tu de.

³Tiki ravmundinhmei tei thu tidaic thau khang, katiulou khang, khatni swmlou khang meic nunc khou sa bam tuang e.

⁴Thay makmei lat sa bammei tei thu karana kata kasiamh bam tuang e, tiki ravmundinhmei tei rui phwamling ta tidaic thau khang e.

⁵Nangniw meic guayna thay makmei lat samei ta ai kahaw e, tiki nangniw ravmundinhmei ta kahaw ranv e. Phwamling kapwm khang gaeng nuh khang lat kabah dincloumei maek ge thei; thay makmei lat samei khang suangc thu, ravmundinhmei rui nthuk ge.

⁶Hei zaeng rui, chanathiu, ai nangniw khou guangna ramhkhat ndauhloumei, tithayloumei, ravmundincloumei khatni nchamloumei tuang maekna, thay makmei lat na sa nganvna tat dat kan ti thei, ai guangmei tei nangniw khang tabui gaengna cho?

⁷Kabumaengc maekmei alim, nrah na tei sini kakhwan key key ku ku na dow ti mak ge thei, akumhna alim muan e hamh e thei nrah dow e twmei thay nina cho?

⁸Bianggun muanmei tei kalwan chana muan ti mak ge thei, thow rui rih adow khang chamdaanv thay nina cho?

⁹Hei tei kumcna kadath datpui lat sa bammei tei ni kabah thay nuhmei tuang hamh e thei, mi kumhmei lat sa bam tu e twmei akumhna thay nina cho? Nang lat tei mpwan khou na samc maanna taan kan ni tuang de.

¹⁰Mi mbaanv khou hei lat baih baihmei mpeyna nai e, kumna mi guay tei kabah maekmei lat khat na sini mak ge.

¹¹Meic gaanv khat rui sa bammei lat tei ai kabah thay mak ge thei, kamei tei akhang meic lat thay makmei tasang tasiucmei di the; kamei rui ni ata hei tei kumcna ning puni.

¹²Nangniw Bumaengh kaipat laa niina bammei thei layna, phwamling ta tidaic thau nimei tuang kaipat tei mbu thau khang karamc nina e.

¹³Hei zaeng rui, meic thay makpui lat samei kamei tei mi kabac tei dinc ngam khang ni huayney nina e.

¹⁴Ai meic thay makmei lat rui huayney e thei, abumaengc rui thu huayney the, tiki hei tei alungning khang thu kabah maek khe.

¹⁵Kum e thei, ai tabui kumhna sw nina cho? Ai abumaengc rui huayney puni, kumna alungning ni kazauhna huayney puni; abumaengc rui ai lu suan puni, kumna alungning ni kazauhna suan puni.

¹⁶Nangniw rui thay makmei lat rui Ravguangc ta thuancku bam khou, nang rui sa bammei lat kabac tei thay makmei kamei tei rui akumhna, “Amen” twna nang thuanckumei suai khou tei salou nina cho?

¹⁷Nang rui thu thuancku chuy sihna thuancku bam nuh e; tiki hei tei meic baihmei khang thu gaeng mak ge.

¹⁸Ai Ravguangc ta thuancku e, kalam thu nangniw suangc sini ai thay makmei lat sa geic de.

¹⁹Tiki phwamling kariumei khou thu, thay makmei lat rui latkaeng ching ching sa bammei suangc, latkaeng panguh na sini thaymei lat sana nchamlou kan ni de.

²⁰Chanathiu, nangniw lungning tei alauc lungning sw riu. Simei biak thangc mu alauc sw o; tiki kakhanhmei khou thu gaanvthaih sw o.

²¹“Thay makmei lat samei nunc khou rui, ai rui amei nunc khou sa puni, twna Poubauhmei rui sa e. Ginramdic thangcmei nunc mwang khou rui ai rui sa puni; kum tisini amei nunc alat nking ni tu hamh e,” twna Nthanmei Latrik khou hylouna nai e.

²²Hei zaeng rui, thay makmei lat samei hei lwm makmei nunc khang sw-nchinmei tuang e; lwmmei nunc khang hamh e. Tiki ravmundinhmei hei thu, lwm makmei nunc khang hamh e; lwmmei nunc khang e.

²³Phwamlingmei guay guang kariuna meic guayna thay makmei lat sa bam khou, kapaengc thangcmei nunc, hamh e thei ravningmakmei nunc guang e thei, nangniw mba ngam the twna sa pw lak nah cho?

²⁴Tiki meic guayna ravmundinc e thei, kumna mi khou tei ravningmakmei, hamh e thei kapaengc thangcmei guangna, kaniw lat tei chuna kapaap lam khou kamei thay pat nuh e. Kumna kamei rui chuloumei lat tei rui kata latzan sw puni,

²⁵kumna meic thay makmei, kalung tei ndauh patlou tina, “Nangniw pang khou Ravguangc bam changh dyng e!” twna sa ndauhna kamei nkhum keyna Ravguangc ta kalum puni.

²⁶Mi kum e thei, chanathiu, aniu akumhna sw kho cho? Nangniw ravkalum khang guang kariupui ganv khou, gaanv khat khou lu suan khang nai the, gaanv khat khou dinclou khang nai the, gaanv khat khou Ravguangc rui ramhkhat ndauhlou tuang nai the, gaanv khat khou thay makmei lat sa khang nai the, khatni gaanv khat khou mi kabac tei dinclou khang nai the. Mi guay tei rui meic guay ta tidaicthau khang sw nina e.

²⁷Thay makmei lat sa nimei nai e thei, geic nganv gaanv nei gaanv thumh rui liangc swna sa kan diu, kumna kaniw samei tei gaanvsaekc rui kabah hanclou nina e.

²⁸Tiki mi kabac tei hanclou nimei meic maek ge thei, kaniw tei reih reina kaniw lev Ravguangc kak khou na sa bam kan diu.

²⁹Ravmundinhmei gaanv nei, gaanv thumh rui lat sa e thei, baihmei guay tei rui kiuc ni, kiuc hamh ni kaphianh kan diu.

³⁰Tiki dungc bammei pang khou tei thowkumhmei khou ramhkhat ndauhloumei tuang nai e thei, lat sa bam reymei tei nthaekc kan diu.

³¹Kumna nangniw meic guayna khat khat swna ravmundincna meic guayna thay khang e khatni meic guayna ta katiulou khang e.

³²Mi kumna ravmundinhmei nunc rui kaniw tuang bumaengc ta sin nina e.

³³Kalam thu, Ravguangc thu kasuakc kaguakcmei ta kahawmeipu hamh e; manimna nchu nrina swmei ta kahawmeipu de. Ravguangc mei nunc tuang phwamling guay khou sw bammei kumcna,

³⁴ntumei guay thu phwamling kariumei khou tei reih reina bam nina e. Kaniw ta lat sa khang nuhlou mak ge; Riakdanv rui samei kumcna, latpiumei swna bam kan diu.

³⁵Kaniw thay nii tuang nai e thei, kaniw gaanv gaanv khou kaniw kai khou thanv kan diu. Ntumei rui phwamling khou lat samei thu zakpui tuang e.

³⁶Mi hei nangniw nuh zih bo? Ravguangc lat hei nangniw khou rui pat tuang dina cho? Hamh e thei, Ravguangc lat tiiloumei kiu nangniw khou na di nah cho?

³⁷Thow pw ni kamei ravmundinhmei e, hamh e thei, kakhou bumaengh kaipat nai e twna ning e thei, ai rui nangniw khou hy bammei hei Ravguangc lat re twna kamei laa nina e.

³⁸Tiki kamei rui mi lat hei laalou mak ge thei, kalat ni laa lak nina e.

³⁹Hei zaeng rui, chanathiu, ravmundinh khang lungh gut ro, kumna thay makmei lat samei ta ni khaam riu.

⁴⁰Kumna ramh guayna gay nimei thiak khou thei hu naina taanc o.