Read Rongmei Naga 1 KORINMEI 2 Bible Online

1 KORINMEI 2 - Rongmei Naga bible

1 KORINMEI 2

¹Achanathiu, ai nangniw khou Ravguangc lat[1] dinc ndauh khang guang khou tei ai lat nthuk thukmei sana ningting tuang lat sa kan mak ge.

²Kalam thu ai nangniw daeng khou bam khou tei, Jisu Khrista lam, nkunna kamei kros khou theicloumei lam na hamhna baihmei lam guay thu thay makmei sw kan ni the twna alung dinglou the.

³Ai nangniw daeng khou bam khou tei, ai suanmei swna, ping kadunhna bam tuang e;

⁴kumna ai rui sa bammei khatni dinc ndauh bammei lat guay tei maansei tuang ningting rui munthyam gayna sa kan mak ge; tiki Ravguangc Bumaengc pumtan nchinlou kan e.

⁵Mi hei rui, nangniw ramlum hei maansei ningting khou hamhna, Ravguangc pumtan khou ngangvlou khang e.

⁶Tiki lwmmei khou alauc hamhmei nunc khou thu aniw ningting lat ni sa e; tiki mi ningting hei kandih tuang hamh e, hamh e thei maan kan nimei mi kandih sinmei nunc tuang ningting hamh e.

⁷Aniw rui sa bammei ningting hei thu kandih damclou mak khou rui aniu ta tihymdaiclou khang chamdaanvloumei, rylou bammei, meic thay makmei, Ravguangc tuang ningting e.

⁸Mi ningting hei mi kandic tuang dihsinpouc gaanv khat na sini thay mak ge. Kaniw thay khwan e thei, hymdaihmei Poubauhmei ta kaniw kros khou thaengcluai lak ni tuang e.

⁹Kum e tiki, “Mik rui how zat kan makmei, nu rui chu zat kan makmei, lungning rui ni ning tangc kan makmei, Ravguangc rui kata nzianmei nunc khang chamdaanvlou the,” twna hylouna nai e.

¹⁰Tiki[2] Ravguangc rui hei tei katuang Bumaengc paan rui aniu khou ndauhlou the. Bumaengh tei rui ramh guayna phu e, kumna Ravguangc tuang kasyng thangc naimei ta nganvna thay tangc e.

¹¹Maansei akhat lungning guay thaymei thu kakhou naimei katuang bumaengc na tei de, hei tei kumcna, Ravguangc lungning guay thaymei thu Ravguangc Bumaengc na tei de.

¹²Aniu laatowmei hei mbaanv tuang bumaengc hamh e, Ravguangc rui aniu khang tiiloumei kaipat guay tei kabah thay khang, Ravguangc rui ndiuloumei Bumaengc tei de.

¹³Kumna, aniw maansei ningting rui dincloumei lat tei sa mak ge, tiki Bumaengh naimei nunc khou[3] bumaengh tuang lam guay tei, Bumaengh rui dincloumei lat tei rui dinclou tuang e.

¹⁴Kakhou Bumaengh maekpui mei tei thu Ravguangc Bumaengc khou rui guangmei kaipat guay tei laa ngam mak ge; kamei mi guay tei kabah thay mak ge; mi guay tei kakhang thu mpangmei tuang de. Kalam thu Bumaengh tuang kabac tei thu kakhou Bumaengh naipui mei na rui thay ngam nina de.

¹⁵Kakhou Bumaengh naipui mei tei thu ramh guayna si gay latzan sw ngam e; tiki maansei rui thu kata latzan sw ngam mak ge.

¹⁶“Thow rui Poubauhmei lungning thayna cho? Thow rui kata ncham ngamna cho?” twna hylouna nai e. Tiki aniu khou thu Khrista tuang lungning nai the.