Read Rongmei Naga 1 KORINMEI 3 Bible Online

1 KORINMEI 3 - Rongmei Naga bible

1 KORINMEI 3

¹Hei zaeng rui, achanathiu, ai rui nangniw khou Bumaengh mei nunc khou samei kumcna sa ngam mak khe; mbaanv tuang mei, Khrista khou ngasatna sw bammei nunc khou samei kumcna sa tuang e.

²Ai nangniw khang noucdui na tii the, naptanh ti mak khe. Kalam thu nangniw laalou ngam mak khe. Ntaw nganvna nangniw naptanh tu ngam mak he.

³Kalam thu nangniw mbaanv tuang mei sw bam di he. Nangniw khat khat ta mamavmei khatni agay agimei nai bammei hei, nangniw mbaanv tuang mei swna mbaanv mei kumcna lungc bam tina hamh nah cho?

⁴Nangniw pang khou gaanv khat rui, “Ai thu Paul mei de,” baihmei gaanv khat rui, “Ai thu Apollo mei de,” twna sa bammei hei mbaanv mei swmei lat hamh nah cho?

⁵Mi kumc bam khang, Apollo kiu thowna cho? Paul kiu thowna cho? Aney thu nangniw ta Khrista khou lwm khang nkhavloumei Ravguangc tuang siamruaimei de. Aney thu kakhou kakhou Poubauhmei rui tiiloumei taanv tei taanc bam tuang na de.

⁶Ai rui lingclou the, Apollo rui kabang tei dui zwanlou the, tiki tidaic thauloumei thu Ravguangc rui de.

⁷Lingcloumeipu khatni dui zwanloumeipu tei thu ramhkhat na sini hamh e; tiki nthukmei thu tidaic thauloumeipu Ravguangc tei de.

⁸Lingcloumeipu tei lev dui zwanloumeipu tei nchamc de; kataanv kataanv thei layna, kaney khang Ravguangc rui zaengphy tii puni.

⁹Aney hei Ravguangc tuang laupuk khou taanv taanc nchamcmei nei e, nangniw hei Ravguangc tuang laupuk ge. Nangniw hei Ravguangc tuang kai ni the.

¹⁰Ravguangc rui akhou tiiloumei kaipat sinswna, taanv thaymei taanvpy akhat kumcna, ai rui kaibam kasiamh thaulou the, kumna meic baihmei gaanv khat rui mi ruc khou tei taanc nsuk thau the. Mi kai tei taanc thau nimei kathuic tei kadanna taanc nina e.

¹¹Kalam thu duanclou kanmei kaibam, Jisu Khrista tei hamhna, baihmei kaibam duanc dat nuh mak khe.

¹²Mi kaibam khou tei thowkumhmei rui kachaekc rui, daandi rui, kamanv kunghmei tauc rui; baihmei gaanvsaekc rui thing rui, ngeic rui, napgou rui swlou bam nuh e.

¹³Tiki mi taanv tei Khrista tuang Tingmik nungc ndauh pwkhou kiu, kataanv kataanv tei thay puni. Kalam thu tabui rui swlou tu cho twmei mai rui nchanv puni.

¹⁴Mi kaibam ruc khou swloumei tei mai rui nchanv pwkhou, nai bam e thei, kai swmeipu tei kataanvphy laa puni,

¹⁵tiki thowkumhmei tuang taanv tei kau ngam kan e thei, kakhang maan the; tiki kameipouc ta thu mai khou rui duak pat kumcna kanlou puni.

¹⁶Nangniw hei Ravguangc tuang ravkai e; nangniw khou Ravguangc Bumaengc bam e twmei nangniw thay mak nah cho?

¹⁷Ravguangc tuang ravkai ta sw kasicpui mei ta tei thu, Ravguangc rui kata ni swmaan puni. Ravguangc tuang ravkai thu nthanmei e, kumna mi ravkai kiu nangniw hei the.

¹⁸Nangniw rana nangniw ta guat riu. Thowkumhmei rui mi kandih mikzaw khou kamei hei ningtyngmei e twna ning e thei, kamei ningtyng changhmei sw khang, kamei mpangmei sw kan diu.

¹⁹Kalam thu mi mbaanv rui ningting e twna chakmei tei Ravguangc mikzaw khou thu mpangmei de. “Ravguangc rui ningtyngmei ta kaniw tuang takh khou timanc e,” twna hylouna nai e.

²⁰“Ningtyngmei nunc tuang latkhanv guay tei nsa tuang de twmei Poubauhmei thay e,” twna ni hylouna nai e.

²¹Hei zaeng rui, nangniw meic nunc lam khou gaengh sw bam dat ri tho. Ramh guayna nangniw khang de:

²²Paul ni, Apollo ni, Pitar ni, mi mbaanv ni, ringhmei ni, theihmei ni, ntaw ni, guang nimei ni—mi guay hei nangniw khang de,

²³kumna nangniw hei Khrista tuang e, Khrista hei Ravguangc tuang e.