Read Rongmei Naga 1 KORINMEI 9 Bible Online

1 KORINMEI 9 - Rongmei Naga bible

1 KORINMEI 9

¹Ai anyng sw nuh mak nah cho? Ai latdiutatmei khat hamh nah cho? Ai aniu Poubauhmei Jisu ta howmeipu hamh nah cho? Nangniw hei ai rui Poubauhmei khang taancloumei taanvthai hamh nah cho?

²Ai hei meic baihmei khang latdiutatmei hamh bam sini, nangniw khang thu latdiutatmei e. Ai latdiutatmei e twmei nthanna lyanmei kiu thu, nangniw Poubauhmei khou bammei hei the.

³Ata nsic nimei nunc khou ai mi kumna daw bam tuang e.

⁴Aniw ta titu tizangv nipui thouc hamh nah cho?

⁵Latdiutatmei baih baihmei, Poubauhmei kainac nunc khatni Pitar rui kanow kanow ta nduanghna tat bammei kumncna aniw ni tat bam nuh mak nah cho?

⁶Hamh e thei Barnabas aney thu aney rana aney bung khang ntaanvna tu nina de twpui tuang nai nah cho?

⁷Karana katuang syandui ntingna rihmei sw bammei thow naina cho? drakha lau ruaiclouna kathai rei tu makmei thow naina cho? Lauziu nruaihna kanoudui sunc zangv makmei thow naina cho?

⁸Ai sa bammei hei maansei riak na hamh e. Riakdanv rui ni mi hei kumcna sa muay mak nah cho?

⁹“Nap ni bammei guaic ta tei kamwang karak riu,” twna Mousi tuang Riakdanv khou hylouna nai e. Mi khou hei Ravguangc rui sa bammei hei guaih khang na cho?

¹⁰Mi hei aniu khang sa tu hamh nah cho? Mi hei aniu khang hylou tuang e. Lausuakmeipu tei ni, lautaymeipu tei ni kathai laa puni twna taanc bam tuang rana e.

¹¹Ai rui nangniw khou bumaengh tuang thw nroulou the. Kum e thei nangniw tuang mi mbaanv tuang puat aniw khang tii patmei hei ranv langv bu cho?

¹²Mi hei nangniw khou rui laa nipui thouc e twna meic baihmei nunc rui sini ning e thei, aniw thu mi nunc khang tei suangc mbuna, mi kumcna ning nimei thouc hamh nah cho? Tiki hei tei aney khang tii nina e twna sa mak ge. Mi phaan tei gaychamv chaeng hei sw khamv pw ramc e twna aney ramh lam kathuicna khou khaengv bam tuang de.

¹³Ravkai khou taanvtaanhmei nunc tei kaniw tu zangv khang Ravkai khou rui laa e khatni ravchabamv khou thouhsw bammei nunc tei rui kaniw tu zangv khang ravcha khou tei rui laa e twmei nangniw thay bam tuang di the.

¹⁴Hei tei kumcna, gaychamv dinhmei nunc tei ni gaychamv laaloumei nunc khou tei rui kaniw tu zangv khang laa nina e twna Poubauhmei rui salou the.

¹⁵Tiki ai hei tei nangniw khou rui laa mak ge, khatni hei tei tii khang ai ntaw hy bam tu hamh e. Mi kumna ai gaengh sw bam nimei tuang tei swmaanloumei suangc theic kanmei rui gay e.

¹⁶Ai gaychamv dinc e twna agaengh sw bam khang maek ge; kalam thu mi hei akhou tiiloumei thouc di the. Ai gaychamv hei dinh mak ge thei sansimei e dav!

¹⁷Gaychamv dinhmei taanv hei ai taanclou timc e twna taanh tuang e thei, akhang taanv phy laa biuc e; tiki mi hei ai taanh mak nuh makpui thouc tiiloumei tei ai taanh tu de.

¹⁸Kum e thei atuang taanvphy kiu thu tabui tei cho? Gaychamv dinhmei khou ai laa biuhmei dam guay tei laa makna, kaphy kadam maekna gaychamv dinctowmei hei atuang taanvphy kiu the.

¹⁹Ai meic gaanv khat na bangc sini hamh e, aruc khou anyng de; tiki ngammei kamv khuam guang geic nuh khang rui arana ata meic guayna bangc tiswlou the.

²⁰Jihudimei pang khou ai tat pwkhou, kaniw ta laatow nuh khang, ai Jihudimei kumcna sw the; kumna Riakdanv bangc khou bammei nunc khou tat pwkhou, kaniw ta laatow nuh khang rui, ai ni Riakdanv bangc khou bam mak sini, bammei kumcna sw the.

²¹Hei tei kumcna ai Zentelmei pang khou tat pwkhou, kaniw ta laatow nuh khang rui, Zentelmei kumcna, Jihudimei tuang Kariak Latdanv bangc khou bam makmei swna tat the. Ai Ravguangc tuang Riakdanv tei piu mak ge twna hamh e; ai Khrista tuang Riakdanv bangc khou bam de.

²²Lwmmei khou suanmei pang khou, kaniw ta laatow nuh khang, ai ni kaniw kumcna suanmei sw the. Mi kumcna nuhmei thiak guay sinswna, kaniw gaanvsaekc ta thu kanlou khang, meic guayna khou meic guayna thiak ai lay sw tat the.

²³Gaychamv tuang suaihiam hei nzanhlou khang, mi guay hei ai gaychamv khang rui sw tuang e.

²⁴Pak akhyammei khou meic mpeyna pak ge; tiki kaniw pang khou gaanv khat na swan laa e twmei nangniw thay e. Hei zaeng rui nangniw ni swan laa khang pak go.

²⁵Talic akhyam nimei nunc tei matak khat na tuang thingnuy pykhim khang na rui sini, kaniw pumc heidi sinriapna chada bam e; tiki aniu thu maan dat lakmei swan khang e.

²⁶Hei zaeng rui, ai tangclou nipui ryan tei nzwanna pak bam tuang e. Diangc akhyam nipui mei rui kamei rui diangc patmei tei zi mak khang sw bammei tei kumcna sw bam tuang e.

²⁷Ai hei meic baihmei khou thu dinc tat laki, ai swan laatow mak pw ramc e twna arana ata diangc ndanna khatni apumc sinriapna bam e.