Read Rongmei Naga 2 KORINMEI 11 Bible Online

2 KORINMEI 11 - Rongmei Naga bible

2 KORINMEI 11

¹Ai mpangmei kumcna sa pwsini nangniw khaengvlou pungh e twna ning e.

²Ai nangniw ruc khou Ravguangc tuang lungh geic kadanmei tuang nai e. Kalam thu ai nangniw ta Khrista khang nthanmei nowpeic ta kumcna tiilou khang sw bam tuang e.

³Ai pingmei kiu thu, Ev ta karouc simei nrui tei rui guat kanmei tei kumcna, nangniw lung nthanna Khrista ta na nzianna bam nimei khou tei rui nangniw lungning tei zay mbiangh pw ramc e twna e.

⁴Kalam thu aniw rui dincloumei Jisu tei hamhmei Jisu lam khou dinhmei nunc guang ti ni nangniw neihlana nuhlou e. Aniw khou rui laaloumei Bumaengc khatni gaychamv tei hamhmei bumaengc khatni gaychamv phungc guang ti ni nuhlou e!

⁵Nangniw rui latdiutatmei daihmei nunc the twna sa bammei nunc khang tei suangc ai keymei e twna khat sini ning mak ge.

⁶Ai lat samei khou sa thay mak bam sini, thaymei khou thu thay makmei hamh e. Mi hei kalam kathuicna khou meic guayna khou aniw lyanlou kan the.

⁷Ai nangniw khou Ravguangc tuang gaychamv dincloumei khang tei kaphy kadam khat sini laa kan mak ge. Nangniw ta tidaiclou khang ai nthyam key the. Hei tei ai nkhuai bu cho?

⁸Ai nangniw khang taanv taanc bam khou tei phwamling baihmei guay rui ata makuat the. Hei tei nangniw khang taanclou khang rui kaniw khou rui asut laa tuang kumh tuang e.

⁹Ai nangniw daeng khou bammei ganv khou tei akhang syandui kage naipui ganv khou, nangniw ta sw katuakc kan mak ge; Makidonia thangc rui guangmei chana nunc rui akhang kage naimei guay phungc guang e. Tat kanmei ganv khou kumcna, guang nimei ganv khou ni ai nangniw khou apuatrith tiilou ni tu hamh e.

¹⁰Khrista tuang nchumhmei tei akhou naina samei tuang e: ai mi hei kumcna gaenghswna samei hei Akhaia khou meic gaanv khat na rui sini kiuc hamh e twna sa dat ngam pu lak khe.

¹¹Mi hei ai nangniw ta nzian makpui zaeng rui cho? Ai nangniw ta nzian e twmei Ravguangc rui thay e.

¹²Baihmei “Latdiutatmei nunc” ta tei, aniw rui sw bammei kumcna kaniw ni sw bam de, twna kaniw gaengh swna sa bammei tei tisa mak khang aniw ntaw sw bammei hei kumcna sw bam muay puni.

¹³Mi kumhmei mei nunc tei latdiutatmei ling hamh e—kaniw hei ravtaanv taanhmei khe swmei, Khrista tuang latdiutatmei khe swmei meic guatmei latdiutatmei nunc e.

¹⁴Mi khou hei ngak khang maek ge. Seitaan nganvna gaanhmei kauh baanchara khe sw ngam de.

¹⁵Kumna kabangc nunc rui thu ravchaptatmei bangc nunc khe swmei hei kadath datpui tuang hamh e. Nkhamh khou thu kaniw taanv thai kaniw laa puni.

¹⁶Ai sa kanmei tei kumcna, ai hei mpangmei e twna meic gaanv khat na sini ning mak kan diu. Tiki nangniw mi kumcna ning e thei, ai gaenghsw khath tw nuh khang ata mpangmei lana e twna laalou o.

¹⁷Ai rui ntaw samei hei Poubauhmei rui ata tisa niipui lat hamh e; mi kumcna arana ata sathuancna bammei hei ai hei kachangcna mpangmei kumcna sa tuang e.

¹⁸Mei mpeyna rui mbaanv tuang khang rui gaenghsw bammei kumcna, ai ni sw puni.

¹⁹Nangniw thu ningtyng lapui zaeng rui mpangmei nunc ta neihlana khaengvlou e.

²⁰Nangniw ta bangh tiswlou ti ni, nangniw ta nym tu bam ti ni, nangniw ta sintu bam ti ni, nangniw ta mala bam ti ni, nangniw ta kaphi bam ti ni nzuhlou dyng the.

²¹Zakna zakna sa tuang e: aniw thu hei tei kumcna sw ngam mak dyng e. Tiki thowkumhmei rui gaenghsw bammei lam khou tei thu, mpangmei kumcna sa tuang e: ai ni gaenghsw ngam de.

²²Kaniw Ibrimei cho? Ai ni e. Kaniw Isaraelmei cho? Ai ni e. Kaniw Abraham kik cho? Ai ni e.

²³Kaniw Khrista siamruaimei cho? Ai mpangmei kumcna sa tuang e: kaniw khang suangc ai mbumei de; kaniw khang suangc ai taanc ranv de; kaniw khang suangc ai kangkai gut geic de; kaniw khang suangc ai baimei zam suc gei de, theihpui tadiucmei bamv kaniw suangc ariw geic de.

²⁴Jihudimei rui bai luan tamvrucna chakiumei luan panguh ai ariw the;

²⁵Rommei rui ata bai luan kathumh e; ata ntauh kwam luan guai the. Rungh kalaimei ariw luan thumh the, kumna duipui khou zingbangc akhat kalaanv akhat bamlou guai the.

²⁶Ai nggin geicna tat bammei chaenglwan khou, duidai khou, kwamtumei nunc baanc khou, Jihudimei nunc baanc khou khatni Zentelmei nunc baanc khou theic duak theic duaklou the; kaidai khou, ramvpuk khou, duipui khou, saraamhmei chana nunc baanc khou theic duak theic duaklou the.

²⁷Lakna taanc the; zip makmei ganv mpeyna ariw the; ndaapc tarimei ariw the; tu khang ni, bamloupui bamv ni, pheybaan ni maekpui ganv mpeyna ariw the.

²⁸Mi guay ruc khou rui phwamling guay khang kadanmei rui atuang puatrith sw bam e.

²⁹Thowkumhmei suan key pwkhou ai ni suan key e; thowkumhmei ta zay bowlou pwkhou, ai ni alung kabiu e.

³⁰Ai gaengh sw ni tw e thei, aram suan lyanmei bamv khou tei ai gaengh sw puni.

³¹Tingsaeng kazanc thuanc bam nimeipu, Poubauhmei Jisu Pu Ravguangc rui ai saraamh mak ge twmei thay e.

³²Ai Damaskas khou bam khou, Guangh Areta bangc khou guanghkhyn rui kaidai tuang raengckat guay tei tirigaanvna ata nym khang sw khwan e.

³³Tiki ata giupaekc khou louna, kaidai raengc tuang kailat akhat khou rui mpat keyna ai kabaanc khou rui duak the.