Read Rongmei Naga 2 KORINMEI 12 Bible Online

2 KORINMEI 12 - Rongmei Naga bible

2 KORINMEI 12

¹Gaeng mak sini, ai agaengh rac puni; Poubauhmei rui tiiloumei ndawman khatni ndauhloumei lam khou ai sa puni:

²Tingkwm ruhna padeih hu thangc Khristamei gaanv khat ta kathumhmei tingkauc khou phungc kuloumei ta ai thay e. (Hei tei kapumc kahak ku tu ni, ndawman ni ai thay mak ge; Ravguangc rui thay e.)

³Mi pu ta tei Paradais khou phungc kulou the twmei ai thay e. (Tiki hei tei kapumc kahak ku tu ni, ndawman ni ai thay mak ge; Ravguangc rui thay e.)

⁴Khoutei rac dat kadai nuh makmei, maansei rui sa pat nuh makmei tuang kamei chu khwan e.

⁵Mi pu lam khou hei ai gaenghsw puni; tiki alam khou thu aram suan khou na tei hamhna ai gaenghsw lak ge.

⁶Ai gaenghsw nii e thei ni, hei tei rui ata mpangmei tisw rap ni tu hamh e; kalam thu ai sa nimei hei kalingpui lat re. Tiki ai gaenghsw nii mak ge. Kalam thu ai rui taanhmei ta howna khatni samei ta chuna ata thaymei khang tei suangc kauhna meic gaanv khat na rui sini ata ningloumei ta ai laa nii mak ge.

⁷Charynmei tuang mpeyna akhou ndauhloumei zaeng khou tei rui ai agaengh sw twan pw ramc e twna, apumc khou sauh akhat tiilou the, mi ta tei Seitaan tuang latdiumei swna sinswna ata gaenghsw mak khang rai bam e.

⁸Mi hei akhou rui laa ganclou khang ai Poubauhmei khou huayney luan thumh the.

⁹Tiki “Nang khang tiilou bammei azauzian hei nang khang biuhmei the, kalam thu nang suan pwkhou atuang pumtan hei tanc e,” twna kamei rui dawlou the. Hei zaeng rui aram suan lam khou ai neihlana gaengh sw e. Hei tei Khrista tuang gaekloumei tuang pumtan akhou nai bam khang e.

¹⁰Hei zaeng rui Khrista khang rui ai suan khou, ata tizaklou khou, ryanramei ariw khou, rai riu khou, kunghmei ariw khou ai neihla e. Kalam thu ai suan pwkhou, ai tanc the.

¹¹Ai hei mpangmei kumcna sw bam e—mi hei nangniw rui tiswlou tuang e. Alam khou thaymei nunc thu nangniw hei e. Kalam thu ai hei ramhkhat sini hamh khwan sini, nangniw tuang “latdiutatmei daihmei nunc” khang tei suangc keymei thu hamh e.

¹²Latdiutatmei akhat re twmei nchinmei tuang charynmei khatni sw-nchinmei taanv mpeyna nangniw pang khou mpeyna khaengvmei lev kazauhna ai taanclou kan the.

¹³Ai rui nangniw khou syandui lam khou puatcrith tiilou makmei na tei hamhna, nangniw ta baihmei phwamling nunc ta suangc keyna swlou tuang nai bwna cho? Mi gancsamloumei khang tei rui ata kuaklou o!

¹⁴Ai nangniw daeng khou luan thumhmei swna guang khang sw bam e, kumna ai rui nangniw khang puatcrith tiilou ni tu hamh e. Ai rui kahawmei thu nangniw tuang syan lanv ta hamh e; nangniw ta de. Alauc nunc rui kapui kapu khang kaphianhlou nina hamh e, kapui kapu rui kanac nunc khang kaphianhlou nipui thouc de.

¹⁵Nangniw tuang bumaengc khang rui atuang naimei guay khatni apumc kahak hei ai neihlana piulou puni. Ai nangniw ta nzian ti hay nangniw ata nzian mak hay hay bam nina cho?

¹⁶Ai rui nangniw khang puatcrith tiilou kan mak ge twmei nangniw ni nuh puni de. Tiki ai hei arouc si e, kumna guatna nangniw ta manh khang sw e twna gaanvsaekc rui sa e.

¹⁷Mi kiu akumhna cho? Ai rui nangniw khou latdiumei ndiu guang kanmei nunc khou tei rui nangniw khou rui guattu khang sw kanmei tuang naina cho?

¹⁸Ai rui Tita ta tat ro twna ndiulou kan tuang e, kumna chana baihmei gaanv khat ta ni kathei ndiulou kan tuang e. Tita rui nangniw ta guattu kan the twna nangniw ningna cho? Tita lungning tei ni alungning lev akhat na de, kumna aney rui sw bammei akhat na de.

¹⁹Aniw ta nangniw hu khou sa nchumh khang sw bam tuang e twna nangniw ning bam lana cho? Nzianmeithiu, aniw rui sa bammei guay hei Khrista khou bamna Ravguangc hu khou samei tuang e, khatni aniw rui taanc bammei guay hei nangniw khang e.

²⁰Ai pingmei thu nangniw daeng khou guang pwkhou nangniw hei ai rui ningmei kumh mak pw ramc e, khatni ai hei nangniw ningmei kumh mak pw ramc e twmei hei e. Ai guang pwkhou nangniw agay agina, mamavna, lungh puamcna, kakhang khang na ningna, khat khat ta sakasicna, nsuc nraucna, daic nii akhyamna, khatni latgeic lugeicna bam pw ramc e twna ping e.

²¹Ai guang dat pwkhou, Ravguangc rui ata nangniw hu khou tizaklou pw ramc e, kumna nthah boulahna tat kanmei ganv khou lungc kanmei nunc tei kaniw taanc kanmei paap guay khou tei rui kaniw lungh laih makna kaniw ruc khou ata tikaplou pw ramc e twna ai ping e.