Read Rongmei Naga 2 KORINMEI 13 Bible Online

2 KORINMEI 13 - Rongmei Naga bible

2 KORINMEI 13

¹Aseic luan ai nangniw daeng khou guang nimei hei guang luan kathumh nimei the. Hylouna naimei kumcna, “Tabui bui khuay puni nkham guangmei guay tei gaanv nei, gaanv thum rui kiuc dyng the twna sa pwkhou rui lat tat key nina e.”

²Tat kanmei ganv khou paapc taanc kanmei nunc khatni baihmei guay khou ai sa nii e; ai nangniw daeng khou guang kaneimei khou tei ni ai mi hei sa kan the; tiki ai ntaw nangniw daeng khou bam makpui ganv khou hei ni ai sa dat puni. Mi kiu thu: ai guang dat pwkhou thu meic gaanv khat na ta sini daeklou dat makna latzan tat key puni the.

³Ai rui sa bammei hei Khrista rui sa tuang e twmei hei kaling ni, kaling hamh ni nang thay niina bammei tei thay puni the. Kamei nangniw khou taanv sw khang pumtan maekmei hamh e: kamei rui katuang pumtan nangniw khou lyanlou e.

⁴Suanmei swlouna kata kros khou tiswluai khwan sini, Ravguangc tuang pumtan rui kamei ringc bam e. Aniu ni Khrista kumcna suan khwan sini, aniw ni Khrista kumcna Ravguangc pumtan paan rui ringc bam e twmei nangniw khou taanv swmei khou nai e.

⁵Nangniw lwmmei khou bam di ny twmei nangniw rana nangniw ta kakhanhna zauc o. Khrista Jisu nangniw khou bam e twmei nangniw thay makna cho? Kum mak ge thei, nangniw lwmmei nunc hamh the.

⁶Aniw hei thu kalingmei nunc e twmei nangniw thay puni twmei ai lwm e.

⁷Nangniw nkhuaimei taanh mak khang aniw rui Ravguangc khou huayney e. Aniw ta ti-nzih khang tw tuang hamh e; aniw hei kalingmei nunc hamh e twna meic nunc rui ninglou khwan sini, nangniw thu nchumhmei sw kan khang e.

⁸Kalam thu, nchumhmei ta aniu thingc ngam mak ge; nchumhmei khang tei taanc ni tuang de.

⁹Aniw suanna nangniw tanc pwkhou aniw neihla e. Hei zaeng rui, nangniw nthuihmei sw khang aniw huayney e.

¹⁰Hei zaeng rui ai nangniw khou rui ducna bam khou mi hei ai nangniw khou hy tuang e; kumna ai guang pwkhou Poubauhmei rui akhou tiiloumei ngamv— nangniw ta sw ra key khang hamhna tidaicthau khang tiiloumei ngamv tei sinswna nangniw ta mphut luhna sw mak khang e.

¹¹Ntaw thu, chanathiu, neihlana bam o. Nthuih khang karamc o; ai rui sa kanmei guay tei laalou o; nangniw chwn chamc o; chuzaenghna bam o. Nzianmei khatni chuzaenghmei Racguangc rui nangniw ta bam nduanghlou puni.

¹²Chana swmei tuang nzianmei lyanna khat khat ta kaputna dwan gay kady o. Mi khou hei bammei nthanmei guay rui nangniw khang dwan gay kady e.

¹³Poubauhmei Jisu Khrista tuang zauzian, Ravguangc tuang nzianmei, khatni Bumaengh Nthanmei rui bam nduanghloumei tei nangniw khou nai diu!