Read Rongmei Naga 2 KORINMEI 2 Bible Online

2 KORINMEI 2 - Rongmei Naga bible

2 KORINMEI 2

¹Hei zaeng rui lungh kabiupui zaeng rui ai guang dat lak khe twna alung ding tuang e.

²Ai rui nangniw lung tikabiulou pwkhou, thow rui alung tineihla lou dat nimei naina cho? Ai rui kaniw lung tikabiulou kanmei nunc tei rui tineihlalou dat khang de.

³Ai guang tina, ata tineihlalou nimei nunc tei rui alung tikabiu lou nimei suangc thu, guang makmei rui gay the twna ai mi tatdyn tei hy kanmei tuang e. Kalam thu ai neihla pwkhou nangniw ni neihla e twmei ai thay e.

⁴Ai mi tatdyn tei lungning mpeyna kabiuna khatni lungh ryanrana, mikdui keyna hy kanmei tuang e. Hei tei nangniw lung tikabiulou khang twna hy tu hamh e; ai nangniw ta adih nzian cho twmei nangniw thay khang e.

⁵Thowkumhmei rui meic gaanvsaekc lung tikabiuloumei tei ata hamh e, nangniw guayna ta de; meic guayna lung tikabiu liklou ngam the. (Ai mi hei samei kabac kiu thu ai kakhou lat tanc langvmei sa nii makpui zaeng rui e.)

⁶Nangniw meic guayna rui kata hei tei kumcna riaploumei hei rui biuc the.

⁷Nangniw, ntaw thu, kamei kalung kabiu langvna simei rui ngam kan mak khang, kata kuaklou o khatni katiu thaulou o.

⁸Kumna nangniw kata nzian changh bam de twmei kakhou lyanlou o.

⁹Nangniw nchanvmei khou ding ngam di ny khatni ai rui samei tei piu nii bam di ny twmei thay niina mi tatdyn tei ai hy tuang e.

¹⁰Nangniw rui kuakloupui mei ta tei ai ni kuaklou the. Ai rui kuaklou khang kage naipui thei layna kuaklou e thei, nangniw khang rui Khrista hu khou kuaklou tuang e.

¹¹Mi hei Seitaan rui aniu ruc khou kadouchamei laa mak khang e. Kalam thu aniu kathiak tei thay e.

¹²Ai Khrista tuang Gaychamv dinh khang Troa khou guang pwkhou, mi khou tei Poubauhmei rui akhang kaikhamv laanclou the twmei ai how the.

¹³Tiki mi khou tei chana Tita ta ariw makna alung mpeyna katuakc the. Kumna mi khou tei kaniw ta ramvnavlou duc lana Makidonia thangc tat the.

¹⁴Ravguangc ta thuancku e! Kalam thu Khrista khou bammei aniu rihngammei, Khrista tuang kangmei nunc kanglwan gutmei chaenglwan khou, kamei rui chaengzaylou bam e, khatni Khrista chamv hei kabamv kathuic khou namh gaymei rym zin lik kumc tithay liklou khang kamei rui aniu ta sinswlou bam e.

¹⁵Kalam thu aniu hei kanlou bammei nunc khou ni, maan bammei nunc khou ni, lik sikh sik bammei Khrista rui Ravguangc khang katloumei namh gaymei agaw rym tei e.

¹⁶Kalam thu maan bammei nunc khang thu mi hei theihmei khou rui theic luaic luaicmei rym e; tiki kanlou bammei nunc khang thu ringhmei khou rui tiringc katynloumei rym e. Kum e thei, mi kumhmei taanv hei thow rui taanc ngam nina cho?

¹⁷Aniw hei thu Ravguangc lat ta alipui puat swna sinsw bammei baih baihmei nunc tei kumhmei hamh e; tiki Ravguangc rui aniw ta ndiuloupui thei layna, Khrista mei swna aniw lungsyng khou rui Ravguangc hu khou lat tei dinc e.