Read Rongmei Naga 2 KORINMEI 5 Bible Online

2 KORINMEI 5 - Rongmei Naga bible

2 KORINMEI 5

¹Aniu tuang pheykai kumhmei mbaanv pumc hei ra key kan pwkhou, baanh rui kasiamh makmei, Ravguangc rui kasiamhloumei tingsaeng zaeng kai, tingkauh thangc aniu khang nai e twmei aniu thay e.

²Tingkauh thangc aniu lungc nipui kai tabui nungc rui aniu khou piulou nina cho twna aniu huay bam e.

³Hei tei aniu khou piulouna pumtang bam lak ge.

⁴Aniu mi pheykai khou lungc bam khou hei, puatcrith phungcna kahui kasing bam e. Aniu mbaanv pumc hei luak ganc kan nii the twna hamh e; tiki tingkauh tuang tei piu nii the twna de. Mi kiu theic nimei pumc hei theic dat lakmei pumc sw khang e.

⁵Ravguangc kamei rui mi hei aniu khang chamdaanvlou tuang e, kumna kamei rui aniu khang Bumaengh Nthanmei tiiloumei hei rui aniu khang bumaengh kai tii puni twmei tuang e.

⁶Kumna aniu kadan dat mak khe. Aniu mbaanv pumc khou lungc bam saanv, aniu Poubauhmei daeng khou rui ducna bam e twmei aniu thay e.

⁷Kalam thu aniu lwmna tat bam tuang e, howna hamh e.

⁸Aniu ping dat mak khe, kumna mbaanv pumc hei mpatlouna Poubauhmei daeng khou lungc bam kan nii the.

⁹Kumna mbaanv tuang kai khou bam pw ni, tingkauh tuang kai khou bam pw ni, aniu rui tamhmei kiu thu kata tipianlou khang twmei hei e.

¹⁰Kalam thu aniu meic guayna Khrista tuang latzan bamv khou guang puni. Simei pw ni, gaymei pw ni aniu mi mbaanv pumc rui taancloumei taanv thay meic kathuicna laa puni.

¹¹Hei zaeng rui, Poubauhmei ta pingmei lam khou, aniw khou thaymei naipui zaeng rui, aniw rui meic baihmei guay ta ni nthiam guang khang karamc bam tuang e. Ravguangc rui aniw ta nthanna thay e, kumna nangniw ni ata nangniw lungsyng khou rui thay kan de twmei lwm e.

¹²Aniw rana aniw ta sathuancna nangniw khou sa bam khang sw mak ge; tiki meic lungc zauh makna, kapaengc zaucna gaengh sw bammei nunc khou tei nangniw latdau khang nai nuh khang, aniw khou nangniw gaengh sw bam nuh khang aniw karamc bam e.

¹³Aniw hei mbamei nunc e thei, hei tei Ravguangc khang rui e; aniw hei mba makmei nunc e thei, mi hei nangniw khang e.

¹⁴Aniw ta thu Khrista ramzian tei rui sin the, kumna gaanv khat rui meic guayna khang theiclou the twmei aniw thay the. Kumna meic guayna kamei theihmei khou tei lay theic kazauh the.

¹⁵Kamei meic guayna khang theiclou the. Hei zaeng rui, ringc bammei guayna hei kaniw rana khang ringc dat nina hamh the; kaniw khang theiclouna ringcthau dat kanmeipu khang ringclou khang the.

¹⁶Ntaw thu aniw meic gaanv khat na ta sini maansei ramchak kumcna chak dat mak khe. Kaganv akhat khou aniw mi kumcna Khrista ta chak bam khwan sini, aniw mi kumcna chak dat mak khe.

¹⁷Hei zaeng rui, thow pw ni Khrista khou bampui mei tei, kamei meic kathanc di the; karaan tei tat kan the; kathanc guanh dat the.

¹⁸Mi guay hei, Khrista paan rui aniu ta kakhou guatc tiswlou datmeipu khatni mi guatc tiswlou datmei taanv hei taanh khang aniw khou nsinloumeipu Ravguangc kamei rui taancloumei taanv e.

¹⁹Aniw dinc nimei chamv kiu Ravguangc rui mbaanv maansei ta Khrista paan rui[3] kamei lev guatc sw dat the twmei hei e. Ravguangc rui kaniw paap chak dat mak khe, kumna Ravguangc lev guatcsw dat nimei chamv hei dinh khang kamei rui aniw khou nsinlou the.

²⁰Kumna mi guatcswmei lat hei sa khang Ravguangc rui aniw ta ndiuloumei thei layna, ntaw thu aniw hei Khrista tuang chaguatpouc nunc e. Hei zaeng rui, aniw rui Khrista phaan nangniw khou zaenghuay e: nangniw Ravguangc khou guatc sw o.

²¹Kapaan rui aniu Ravguangc tuang ravchaptatmei tei laa khang paapc maekmeipu Khrista khou aniu paap mphunlou kan the.