Read Rongmei Naga 2 KORINMEI 6 Bible Online

2 KORINMEI 6 - Rongmei Naga bible

2 KORINMEI 6

¹Kum thena, Ravguangc zauzian tei nsa swmaan mak khang, kamei lev taanv taanc nchamcmei nunc swna aniw rui nangniw khou zaenghuay e.

²Ravguangc rui sa e: “Ai rui nangniw ta laalou nipui ganv khou tei, Ai nangniw lat chulou the. Nangniw ta kanlou nipui tingmik khou tei, Ai nangniw ta nkhavlou kan the.” Zauclo! Laalou nipui ganv kiu ntaw hei the; kanlou nipui tingmik kiu aseic hei the!

³Thowkumhmei aniw tuang taanv khou rui phaysuy kan pu ramc e twna, aniw taanv khou hei khanc lanclou nuhmei tuang nai mak khang karamc bam e.

⁴Mi phaan tei, ryanramei, suc nucmei khatni kunghmei azuh ariwpui ganv khou, aniw Ravguangc siamruaimei nunc swna khaengvna lungc lyanlou e.

⁵Aniw ta bai the, kangkai khou bangclou the, meic kangdai rui kwam the, aniw taanv ranvna taanc the, zip makna khatni tu zangv makna lunghpui ganv nai the.

⁶Aniw tuang Nthanmei panty, kabahthaymei, khaengvmei, khatni nzianthaymei rui aniw hei Ravguangc siamruaimei e twmei lyanlou kan the. Mi hei Bumaengh Nthanmei paan rui, nzianmei paan rui,

⁷kachangcmei latchamv dinc ndauhmei paan rui, khatni Ravguangc pumtan paan rui e. Adow khang khatni akhangv khang ravchaptatmei hei baansyn e.

⁸Aniw ta chakhwang swlou e, malana ni swlou e; aniw ta swzaklou e, thuanckuloumei ni nai e. Aniw ta lat saraamhmei nunc ta kumcna ni swlou e; kum sini aniw latling sa bam tuang de.

⁹Aniw ta meic rui thaylou makmei nunc kumcna swlou e, tiki meic guayna rui thay bam de; theic kan nimei nunc kumcna ning e, tiki nangniw how the—aniw ringc bam e. Riaplou khwan sini aniw theih mak ge;

¹⁰aniw lung tiryanralou khwan sini aniw neihla tanh tan bam e; aniw hei lungcsi tu kumc khwan sini, meic mpeyna ta tilungcgaylou e; aniw tuang ramhkhat na sini maek tu kumc khwan sini, aniw khang katana nai e.

¹¹Korinmei nunc lev, aniw rui sa nimei tei nangniw khou daeklou makna salou kan the; aniw lung kapwm rui nangniw ta nzian e.

¹²Aniw rui nangniw ta nzian makpui tuang hamh e; nangniw rui aniw ta nzian makpui tuang de.

¹³Ai rui nangniw ta anac nunc ta kumcna sa tuang e: aniw rui nangniw ta nzianmei kumcna nangniw ni aniw ta nzian o. Nangniw lung laanc daic patlou o.

¹⁴Lwm makmei nunc lev nangniw boudu nchamc nuh mak ge. Akumhna ravchaptatmei lev ravchaptat makmei kariu nuh nina cho? Akumhna zinghmei lev gaanhmei bam kariu nuh nina cho?

¹⁵Akumhna Khrista lev ravsic kariu nuh nina cho? Akumhna lwmmei lev lwm makmei kariu nuh nina cho?

¹⁶Akumhna Ravguangc tuang ravkai lev ravmaengc tuang ravkai kariu nuh nina cho? Aniu hei Ravguangc tuang ravkai e! Kalam thu Ravguangc rui sa e: “Ai meic nunc pang khou lungc bam puni, kumna tat nchamc bam puni; Ai rui kaniw tuang Racguangc sw puni, kumna kaniw amei nunc sw puni.”

¹⁷Kumna Poubauhmei rui sa e: “Nangniw kaniw ta mpatlou nina e kumna kaniw khou rui baic taph tap nina e. Nthan makmei ta kahi lak nina e, kum pwkhou ai nangniw ta laalou puni.

¹⁸Ai rui nangniw pu sw puni, kumna nangniw anac mpouh aluh sw puni, twna Ngamparimei Poubauhmei rui sa e.”