Read Rongmei Naga 2 KORINMEI 7 Bible Online

2 KORINMEI 7 - Rongmei Naga bible

2 KORINMEI 7

¹Nzianmeithiu, mi latryan guay hei aniu khang e. Hei zaeng rui, aniu pumc ta ni, bumaengh ta ni sw mphuam nimei guay khou rui nthanna bam di kho, khatni Ravguangc ta pingna nthan thiakh thiakna lungc di kho.

²Nangniw lung aniw khang laanc patlou o. Aniw gaanv khat na khou sini nkhuailou kan mak ge. Aniw gaanv khat na ta sini sw kasiclou kan mak ge, khatni aniw gaanv khat na ta sini guattulou kan mak ge.

³Mi hei ai nangniw ta latzan swna sa tu hamh e; ai rui sa kanmei tei kumcna nangniw hei aniw khang heidikamv nzianmei nunc e, theic nchamc ringc nchamc nimei nunc e.

⁴Ai nangniw ta lwmgay de; ai nangniw zaeng rui azawgay bam tuang e! Ryanramei azuh guang bam sini ping mak ge; ai neihlamei rui padik bam e.

⁵Aniw Makidonia khou guangmei tangv nganvna aniw khang zaengswloupui ganv maek ge. Kabamv kathuicna khou katuakcmei rana, agay agimei rui padik, aniw lung khou pingmei rui padik ge.

⁶Tiki lungh tangkhynna bammei nunc ta katiu thauloumei Racguangc rui Tita ta ndiu guangna, aniw ta katiuthaulou e.

⁷Aniw ta tineihla thauloumei kiu kamei guangmei na tei hamh e; nangniw rui akumhna kata katiuthaulou cho twmei kamei rui racloumei tei rui ni e. Nangniw ata how niina bam e, nangniw lungh kabiuna bam e, nangniw akhang lungh sucna bam e twmei hei kamei rui aniw khou raclou pwkhou, ntaw thu ai neihla mbu thau the.

⁸Atuang tatdyn tei rui nangniw lung swkabiulou khwan sini, hei tei kumcna hy kanmei tei maanv the twna ning mak ge. Hei tei rui nangniw lung matak khat na swkabiulouna taanmei tuang e thei, ai maanv the tw ni tuang e.

⁹Tiki ntaw thu ai neihla e. Nangniw lung swkabiulou kan the twna hamh e; tiki nangniw lung kabiumei khou tei rui lungh laic kanpui zaeng rui e. Mi lung ramkabiu khou tei Ravguangc rui taanv swlouna aniw rui nangniw ta sw kasiclou kan mak ge.

¹⁰Kalam thu Ravguangc rui taanv swloumei lungc ramkabiu tei rui lungh tilaiclouna kanloumei tiguang e—kumna mi khou tei lungh kabiu khang maek ge. Tiki mbaanv lung ramkabiu tei rui thu theihmei tipat re.

¹¹Nangniw lungh kabiu kanmei khou tei Ravguangc rui akumhna taanv swlou bu cho zauc tho: hei tei rui nangniw khou kadanthaymei tiilouna khuay maekmei sw niimei lungning tiilou the. Hei tei rui nangniw khou lungh puamhmei khatni pingmei tipatlou kan the; ata how niimei ni tipatlou kan the. Hei tei rui nangniw khou kadanmei khatni nkhuaimei ta riaplou niimei tuang tiilou kan the. Ramh lam guayna khou nangniw nkhuai mak ge twmei lyanlou the.

¹²Kum thena, mi tatdyn hymei tei nkhuaimei taanhmei nunc zaeng rui ni hamh, meic nunc rui kaniw khou nkhuaimei taancloumei nunc zaeng rui ni hamh e; tiki nangniw Ravguangc hu khou aniw ta adih ning nthuk bam cho twmei nangniw khou tithaylou khang hy tuang e.

¹³Hei zaeng rui aniw ta mpeyna katiuthaulou e. Aniw ta katiuthauloumei na hamhna, nangniw rui Tita ta tineihlalou tina kamei neihla bammei tei rui aniw ta tineihlalou dat re.

¹⁴Ai nangniw lam khou kakhou agaengh sw bam tuang e, kumna nangniw ata tizaklou mak khe. Aniw rui nangniw khou sa kanmei guayna tei kalingmei lat rana the; hei tei kumcna aniw rui Tita khou nangniw lam khou gaengh swna sa kanmei tei ni kalingmei lat re.

¹⁵Kamei rui nangniw khou nchamloumei guay tei piu niina piu bammei khatni nangniw rui kata ping kadanna laaloumei, mi guay hei kamei ningtowna kamei nangniw ta nzian ranv ranv bam e.

¹⁶Nangniw hei lwm nuhmei nunc di the twna ai mpeyna neihla the.