Read Rongmei Naga 2 KORINMEI 8 Bible Online

2 KORINMEI 8 - Rongmei Naga bible

2 KORINMEI 8

¹Chanathiu, Makidoniamei tuang phwamling guay khou Ravguangc rui tiilou bammei zauzian tei nangniw ni thaymei ta laa nii e.

²Kaniw khou nchanvmei ranv sihna guangna kaniw ryanramei mpeyna ariw kan e; tiki kaniw khou neihlamei heidikamv daicna nai e; twmei kaniw kanganv tangcna lungcsi khwan sini tiipatmei khou thu kaniw baanc daic e.

³Ai mi hei nthanna sa ngam e twmei thu, kaniw ngammei kasang tiimei na hamhna kaniw tii ngammei suangc sini mbuna tii e. Kaniw tii niina,

⁴Judia khou bammei Ravguangc mei nunc khang nkhavloumei khou tei kaniw ni lay kazauh ni twna kaniw rui aniw khou sa tuang de.

⁵Mi hei aniw ningmei paengc thangc de! Kaniw hei rey liangmei khou kaniw ta Ravguangc khou tiilou the; mi tangv Ravguangc rui ningmei thei layna kaniw ta aniw khou ni tiilou the.

⁶Kumna mi taanv hei kahouhloumei Tita ta mi nkunna nzianmei taanv hei nangniw ta taanv nkhav suaklou khang aniw rui salou kan the.

⁷Ramh lam guayna khou: lwmmei khou, latsav khou, thaymei khou, nkhavlou niimei khou khatni aniw ta nzianmei khou[4] nangniw mbu de. Hei tei kumcna mi nzianmei taanv khou hei ni nangniw lung daiclou o.

⁸Ai nangniw khou latdanv swna sa tu hamh e. Tiki meic baihmei nunc ni mi kumcna nkhavlou niina bam e twmei lyanlouna, nangniw tuang kalingmei nzianmei tei thay niina sa bam tuang e.

⁹Aniu Poubauhmei Jisu Khrista zauzian tei nangniw thay e; kamei lungcgay khwan sini, nangniw khang rui kamei lungcsimei swlou khwan e. Hei tei karam lungsi paan rui nangniw lungcgaymei sw khang e.

¹⁰Mi lam khou hei ai rui nangniw khou sa niimei thu, ntheikwm nangniw kahouh kanmei tei ntaw thu luailoumei gay the. Mi taanv tei taanc niimei lungning ning pat reymei ni, taanc thau reymei ni nangniw de.

¹¹Kum thena nangniw mi taanv tei luailou tho. Nangniw rui taanclou niina kahouhmei tei tiguang nthuihlou khang, nangniw ngammei thei layna, tii patna taanc suaklou tho.

¹²Nangniw rui tii niina tii ti thei, nangniw rui tii khang naina tiimei tei laalou puni; maekmei tei tii o tw tuang hamh e.

¹³Ai rui nangniw khou puatcrith tiphungclouna meic gaanv khat puat sw nthaanlou me tw tuang hamh e. Ntaw thu nangniw khang thu nai geihpui zaeng rui, maekmei nunc khang tei nkhavloumei gay e twpui tuang de. Nangniw ni maek datpui ganv khou, kaniw khang nai geic dat re thei, kaniw ni nangniw ta nkhavlou dat puni. Mi kumna sakzakna lungh khang the.

¹⁵Nthanmei latrik rui samei kumcna, “Laalou geihmei tei ni nai geih mak ge; laalou raumei tei ni nai rau mak ge.”

¹⁶Aniw rui nangniw khang kadanmei lungning kahak hei Tita khou ni tiiloumei khang rui Ravguangc ta thuancku e.

¹⁷Kata aniw rui swlou o twna samei tei neihlana piuloumei na hamhna, kamei rui kahaw ranvna kamei nangniw daeng thangc tat kan tuang the.

¹⁸Gaychamv dinhmei khou kata phwamling guay rui thuancna bammei chana gaanv khat ta ni kamei lev tat nchamc khang ndiulou kan e.

¹⁹Mi ruc khou tei rui, kamei hei aniw rui nkhavlou nii changhmei lev kazauhna Poubauhmei hym khang mi nzianmei taanv taanc bammei dwan khou hei aniw lev tat nchamcna nkhavlou khang phwamling guay rui kapah patna ndiuloumeipu ni e.

²⁰Mi lungning daicna tiipatmei syandui tamzanhmei khou hei, meic nunc rui khanc lanclou mak khang twmei aniw kadanna sw bam e.

²¹Aniw rui ningmei thu Poubauhmei mikzaw khou na hamhna, meic nunc mikzaw khou ni nchumhmei taanh khang twmei hei e.

²²Mi kumcna aniu chana kati hei kaniw thei ndiulou kan the. Aniw kata kaganv mpeyna zauc the kumna kakhou nkhavlou nii changhmei nai e. Kamei ntaw nangniw ta lwm lapui zaeng rui nkhavlou nii katyn the.

²³Tita lam khou thu, kamei hei ai lev taanv taanc nchamcmei khatni nangniw ta nkhavloumei khou ata nkhavloumeipu e. Kamei lev tat nchamc kanmei chana nunc lam khou ni, kaniw hei phwamling tuang latdiu tatmei nunc e, Khrista hym tidaihmei nunc e.

²⁴Aniw rui nangniw lam khou gaengh sw bammei hei kachangc dyng e twmei phwamling guay rui ni thay kan khang kaniw ta nangniw rui nzianmei tei lyanlou tio.