Read Rongmei Naga 2 KORINMEI 9 Bible Online

2 KORINMEI 9 - Rongmei Naga bible

2 KORINMEI 9

¹Judia khou bammei nthanmei nunc khang syandui nkhavlou nimei lam khou ai hy dat bam khang kage nai rap mak khe.

²Nangniw kaniw ta nkhavlou nii bam e twmei ai thay e, kumna mi lam khou tei ai rui Makidoniamei nunc khou agaengh swna, “Akhaiamei nunc thu nkhavlou khang ntheikwm tei rui chamdaanv bam kan the,” twna salou kan the. Nangniw rui mi kumcna swlou nii bammei tei rui kaniw meic mpeyna ta katiu thaulou kan e.

³Mi kumcna aniw rui gaengh swna salou kanmei tei nsa taan mak khang mi chana nunc ti hei ndiulou tuang the. Tiki, ai sa kanmei tei kumcna nangniw chamdaanvlou bam pungh di the.

⁴Tiki Makidoniamei nunc athei lay guang pwkhou, nangniw chamdaanvlou bam mak khwan e thei, nangniw ta heidi lwmgayna salou lana, aniw ni nangniw ni zak pungh the.

⁵Hei zaeng rui, ai guang mak khou kaniw tat hu lana nangniw rui tii ni twna saloumei kaipat tei chamdaanvlou khang mi chana nunc ti hei ndiulou rey khang kage nai the twmei ai ning the. Kumna ai guang pwkhou nangniw chamdaanvlou bam e thei, hei tei tii mak nuh makna tii tuang hamhna, tii niina tii tuang e twmei thay puni the.

⁶Lingclou raumei nunc tei tay guang rau puni, lingclou geihmei nunc tei tay guang geic puni twmei hei ningtowlou o.

⁷Meic kathuicna kamei kamei rui dingloumei thei layna tii kan diu. Nzavna tii mak nuh mak khe twna tii rio; kalam thu neihlana tiipui mei ta tei Ravguangc nzian e.

⁸Ravguangc thu nangniw khang kage naimei guay tei nai tanh tanmei ruc khou rui gaymei taanv khou sinsw bam khang mphamh mphahna tiilou ngam e.

⁹“Kamei rui lungcsimei khang pariuhna tiilou e; kazauzian thu tingsaeng e,” twna hylouna nai e.

¹⁰Lautaanhmei nunc khang napphwn tiilouna tu zangv khang tiiloumeipu rui, nangniw khang kage naimei phwn guay tiilou puni, kumna nangniw baanc daihmei thai tei kathai geicna tiilou puni.

¹¹Nangniw baanc daicna tii pat tanh tan bam khang kamei rui nangniw ta tilungcgaylou puni, kumna nangniw tuang kaipat aniw rui laatowmei nunc tei rui Ravguangc ta thuancku bam khang e.

¹²Mi kumcna nangniw rui taancloumei hei rui Ravguangc mei nunc khang, kaniw khang kage naimei tei tiiloumei na hamhna, Ravguangc ta thuanckumei ni ti-mbu thau e.

¹³Nangniw rui mi hei kumcna taancloumei paan rui, nangniw rui laaloumei gaychamv tei nangniw piu chuyna bammei khang tei khatni nangniw lungning daicna kaniw khang khatni baih baihmei khang tii pat bammei khang tei meic nunc rui Ravguangc ta thuancku puni.

¹⁴Mi kumcna Ravguangc tuang nkun mbumei zauzian nangniw khou tiiloupui paan rui nkunna nzian mbuna kaniw rui nangniw khang huayneylou puni.

¹⁵Mi sa dat khang thay lakmei katuang zauzian khang hei Ravguangc ta thuancku kho!