Read Rongmei Naga GALATIMEI 1 Bible Online

GALATIMEI 1 - Rongmei Naga bible

GALATIMEI 1

¹Meic nunc rui ni hamh, meic nunc khou rui ni hamh, tiki Jisu Khrista khatni kata tiringcthaulou datmeipu Ravguangc kahak rui Latdiutatmei swna ndiuloumei Paul,

²khatni ai lev bam nchamcmei chana guay khou rui Galati phwamling guay khang hymei:

³Mi mbaanv tuang simei khou rui aniu ta kanlou khang, aniu Pu Ravguangc rui ningmei piulouna aniu paap khang karana kata tiipatloumeipu Poubauhmei Jisu Khrista khatni aniu Pu Ravguangc rui zauzian khatni chuzaenghmei nangniw khou tiilou diu.

⁵tingsaeng aniu Pu Ravguangc hymdaic diu. Amen.

⁶Khrista zauzian[1] paan rui nangniw ta kawloumeipu ta nangniw guayna asaanh makmei dak na khou rui mpatlouna baihmei gaychamv laalou dat bammei khang tei ai ngak ge.

⁷Kaling thu, gaychamv baihmei maek ge; tiki Khrista tuang gaychamv tei sw mbianghna nangniw ta sw kaguakc khang sw bammei nunc naipui zaeng rui sa tuang e.

⁸Aniw rui pw ni, kauh baanchara tingkauh thangc rui keyna pw ni, aniw rui nangniw khou dinclou kanmei gaychamv tei hamhna baihmei dinc e thei, karuc khou syang keylou kan diu!

⁹Aniw rui sa kanmei tei ai ntaw sa kaluaih dat re: nangniw laalou kanmei gaychamv tei hamhna baihmei nangniw khou dinhpui mei khou tei syang keylou kan diu!

¹⁰Ai rui sa bammei hei maansei rui lwanlou pw khang sa bam tu cho? Kiuc hamh e! Ai rui kahawmei thu Ravguangc rui lwanloumei ta de! Meic nunc rui lwanlou pw khang sw bam tu cho? Ai mi khang tei sw bam tuang e thei, ai Khrista bangc sw bam ngam khang hamh e.

¹¹Chanathiu, ai rui nangniw khou dinclou kanmei gaychamv tei maansei khou rui hamh e twmei nangniw khou tithaylou nii e.

¹²Mi hei ai meic gaanv khat na khou rui sini laa mak ge, meic gaanv khat na rui sini akhou nchamlou mak ge. Hei tei Jisu Khrista kamei kahak rui akhou dinclou tuang e.

¹³Ai Jihudimei ravchap khou bammei douc, ai rui sw kanmei tei nangniw chu kan the. Ai Ravguangc tuang phwamling ta raikasicna raina, mi ti hei swmaan khang ngammei kasang karamc khwan e.

¹⁴Ai Jihudimei ravchap khou akinmei guay pang khou rui tat suc diangc bam khwan e, khatni pupouh riak khou lungh gut diangc bam khwan e.

¹⁵Tiki Ravguangc rui ata apui nacbamv khou rui kazauzian paan rui kapahlouna kawlou the.

¹⁶Zentelmei khou Khrista tuang gaychamv dinh khang kamei rui kanac mpouh ta akhou ndauhlou pwkhou, ai meic gaanv khat na daeng khou sini tatna kaphianh mak ge;

¹⁷Jerusalem thangc asuangc latdiutatmei sw bam reymei nunc ta ni ariw tat mak ge. Ai Arabia ramv thangc tatna, Damaskas khou guang dat the.

¹⁸Mi tangv, tingkwm kathumh tangv, Pitar ta ariw khang Jerusalem thangc nganghna kadaeng khou zaeng ruhna panguh bamlou e.

¹⁹Poubauhmei kainac Jakob ta na hamhna latdiutatmei baihmei nunc ta ai ariw mak ge.[2]

²⁰Ntaw ai nangniw khang hy bammei hei Ravguangc mav khou hy bam tuang e; ai saraamh mak ge!

²¹Mi tangv tei ai Suria khatni Kilikia ramv thangc tat khwan e.

²²Mi ganv khou tei Judia tuang phwamling guay tuang mei nunc ata zawthay mak khwan e.

²³Kaniw rui ata thaymei kiu, “Aniu ta raikasic bammeipu tei, ntaw thu kamei rui swmaan ni twna sw bammei Khrista khou lwmmei lam tei kamei dinc bam dat the,” twna meic nunc rui sa bammei ta na khwan e.

²⁴Kumna kaniw azaeng rui Ravguangc ta thuanc bam khwan e.