Read Rongmei Naga GALATIMEI 2 Bible Online

GALATIMEI 2 - Rongmei Naga bible

GALATIMEI 2

¹Tingkwm ruhna padeih tangv, Barnabas lev Tita ta nduanghna ai Jerusalem thangc ngangh khwan e.

²Hei tei Ravguangc rui tat ro twna akhou ndauhloupui thei layna tat tuang e. Kumna ai rui taanclou kanmei khatni taanc bammei guay hei nsa taan pw ramc e twna, ai rui Zentelmei nunc khou dinc tat bammei gaychamv kiu mi hei e twmei, kapyswmei nunc ta ariwna raclou the.

³Ai nduangh tat bammei Tita kamei hei Grikmei bam khwan sini, kamei gihruamc nina e twna sa mak ge;

⁴tiki meic gaanvsaekc rui thu ruamh khang kahaw the. Mi nunc hei kaniw rui aniw ta bangh tiswlou khang rui, aniw rui Khrista khou nyngswmei ta tei gwanrum khang lwmmei khe swmei, aniw pang khou tiap gutloumei nunc e.

⁵Tiki kalingmei gaychamv hei nangniw khang nai bam khang, aniw kaniw kut matak khat na sini gutlou kan mak ge.

⁶Tiki kapy nunc the tw bammei nunc tei—kaniw tabui kumhpui mei ni bam kan diu; hei tei rui akhang ramhkhat sini hamh e. Ravguangc thu zawkhu zawru zauh mak ge; mi kapy nunc khou tei rui akhang ramhkhat sini dinc kasuanlou tuang maek ge.

⁷Tiki gihruamhmei nunc khou gaychamv dinh khang Pitar khou tiiloumei kumcna, gihruamh makmei nunc khou gaychamv dinh khang akhou tiilou the twmei thu kaniw how kan the.

⁸Kalam thu Pitar khou gihruamhmei nunc khang latdiutatmei swna taanv taancloumeipu rui akhou Zentelmei nunc khang latdiutatmei swna taanv taanclou the.

⁹Tiangdaic kumcna kapy nunc swna bammei Jakob khatni Jhn kaniw rui ni Ravguangc rui mi taanv hei akhou tiilou the twmei thaylouna Barnabas aney ta kaniw tuang baanzat baanc sin kariulouna laalou the. Kumna Barnabas aney Zentelmei khou tat khang khatni kaniw gihruamhmei nunc khou tat khang aniw nuhlou the.

¹⁰Kaniw rui aney khou samei kiu thu lungcsimei nunc khang tei thu ningtowlou bam o twmei hei e. Hei tei thu ai rui taanclou nii chuyna bammei tuang e.

¹¹Tiki Pitar Antiokh khou guang khou ai zaw puanc adyangna kata luh the. Kalam thu kamei baekh baekna nkhuai e.

¹²Jakob rui ndiuloumei nunc mi khou tei guang mak khou thu, kamei Zentelmei nunc lev tu nchamc zangv nchamc bam tuang e. Tiki mi nunc tei guangmei tangv thu, Zentelmei ta ni gihruamc nina de twna samei nunc ta ping lapui zaeng rui, kamei Zentelmei nunc lev tu zangv nchamc dat mak khe.

¹³Kathei layna Jihudimei gaanvsaekc ni ramhsuath swna tat kan the. Kumna kaniw ramhsuath swmei khou tei Barnabas ta ni zay mbiangh tat kan the.

¹⁴Gaychamv kalingmei khou kaniw tat ntwnna tat mak khe twmei ai how pwkhou, meic guayna hu khou ai rui Pitar khou, “Nang Jihudimei e, tiki Zentelmei kumcna lungc kan the, Jihudimei kumcna lungh mak khe. Kum e thei akumhna nang Zentelmei ta Jihudimei kumcna lungc o twna sa nina cho?” twna sa the.

¹⁵Aniw hei pui bungpuak khou rui Jihudimei e, “Paapcmei” twmei Zentelmei nunc tei hamh e.

¹⁶Tiki aniu ta ravchaptatmei tiswloumei hei Riakdanv ngaekpui paan rui hamh e; Jisu Khrista khou lwmloupui paan rui de twmei aniu thay e. Hei zaeng rui, Riakdanv ngaekpui paan rui hamhna, Khrista khou lwmpui paan rui ravchaptatmei tiswlou khang, aniu ni Khrista Jisu khou lwmlou the. Kalam thu Riakdanv ngaekpui paan rui gaanv khat na sini ravchaptatmei sw ngam mak ge.

¹⁷Aniu ravchaptatmei sw khang Khrista khou ngangvlou tiki, aniu ni Zentelmei nunc kumcna paapcmei sw the. Kum e thei Khrista rui sw bammei kiu paapcmei tiswlou khang cho? Kiuc hamh e!

¹⁸Ai rui ra key kanmei tei ai rui kasiamh thau dat re thei, ai hei Riakdanv sw bakmei e twmei arana rui dinc e.

¹⁹Kalam thu Riakdanv biak thangc thu, ai theic the; mi Kariak Latdanv tei rui ata swluai the. Mi hei ai Ravguangc khang ringh khang e. Khrista kros khou theiclou khou tei ai ni lay theic kazauh the.

²⁰Kumna ai thu theic the; tiki Khrista akhou ringc bam e. Ntaw ai mi pumc khou ringc bammei hei ata nzianpui zaeng rui kata akhang tii patloumei Ravguangc Nac Mpouh khou lwmpui paan rui ringc bam tuang e.

²¹Ai Ravguangc zauzian ta nsa swmaan mak ge. Riakdanv paan rui ravchaptatmei sw nuh e thei, Khrista theicloumei hei nsa di the.