Read Rongmei Naga GALATIMEI 3 Bible Online

GALATIMEI 3 - Rongmei Naga bible

GALATIMEI 3

¹He mpangmei Galatimeithiu! Nangniw lung thow rui swchamamv thena cho? Khrista ta kros khou thaengcluailou kanmei tei nangniw khou nthanna lyanlou kan the.

²Nangniw Ravguangc Bumaengc laatowmei tei Riakdanv piupui paan rui ny, gaychamv tei chuna lwmpui paan rui cho, ai thay nii e.

³Nangniw adih mpang bam tu cho! Nangniw Bumaengh paan rui kahouh lana ntaw thu nangniw rana pumtan rui luailou dat nii the twna cho?

⁴Nangniw laatow kanmei guay tei nsa di the nah cho? Kiuc hamh e!

⁵Nangniw khou Ravguangc rui katuang Bumaengc tiilouna nangniw pang khou charynmei taanv mpeyna taancloumei tei nangniw Kariak Latdanv piupui paan rui ny, gaychamv hei chuna lwmpui paan rui cho?

⁶Abraham ta tei kakhanh o: “Kamei Ravguangc khou lwm the, kum tina kata ravchaptatmei twna chaklou the,” twna nthanmei latrik rui sa e.

⁷Hei zaeng rui, Abraham nac nunc ling kiu thu lwmmei nunc tei e twmei nangniw thay nina e.

⁸Ravguangc rui Zentelmei ta lwmpui paan rui ravchaptatmei tiswlou puni twmei how rey lana, “Nang paan rui zaatc guayna ta suaihiamlou puni,” twmei gaychamv hei Abraham khou dinc kasuakcloumei nthanmei latrik khou salou the.

⁹Abraham tei lwm the, kumna kakhou suaihiamlou the. Kumna lwmmei guay khou ni Abraham khou tiiloumei suaihiam tei tiilou the.

¹⁰Riakdanv ngaekmei khou ngangvlou bammei guay tei thu syang bangc khou bam e. Kalam thu “Riakdanv khou hyloumei guayna tei piu tanh tan bam makpui mei ruc khou tei syang nai e!” twna nthanmei latrik rui sa e.

¹¹Riakdanv piumei paan rui gaanv khat na ta sini ravchaptatmei tiswlou mak ge twmei nthan the. Kalam thu, “Lwmmei paan rui ravchaptatmei swpui mei tei ringc puni,”[3] twna nthanmei latrik khou hylouna nai e.

¹²Tiki Riakdanv hei thu lwmmei tuang hamh e, kalam thu “Mi guay hei piupui mei tei ringc puni,” twna sa e.

¹³“Thing khou thaengcloupui mei tei syang phunghpui mei e,” twna samei kumcna, Khrista rui aniu syang phungclouna, Riakdanv tuang syang khou rui kamei rui aniu ta thuakpatlou the.

¹⁴Mi hei, Abraham khou tiiloumei suaihiam tei Khrista Jisu paan rui Zentelmei guay ni laa nuh khang kamei rui taancloumei taanv e— nrianhloumei Bumaengc tei lwmpui paan rui laa khang e.

¹⁵Chanathiu, meic tatpui riak tei champancna sa puni: meic gaanv nei rui ramh lam khat khou chwn chamcna latryan swlou kan e thei, hei tei gaanv khat na rui sini swbak dat nuh mak khe; haap ni haap dat nuh mak khe.

¹⁶Mi latryan hei Abraham khatni kakikta khou swlou tuang e. “Nang kikta guay” twna, meic mpeyna ta sa mak ge; “nang kikta” twna gaanv khat na ta sa tuang de. Mi kiu Khrista ta sa tuang e.

¹⁷Ai rui sa bammei kiu thu mi hei e: Tingkwm phay padeih tamruc tangv rui tii guang datmei Riakdanv tei rui Ravguangc rui Abraham khou swlou kanmei latryan ta tei swbakna nsa titaan mak ge.

¹⁸Ravguangc kaipat hei Riakdanv piupui paan rui laa ni tuang khwan e thei, latryan tei thu nsa di the. Tiki Ravguangc rui Abraham khou tiilou kanmei tei thu latryan thei layna tiilou kanmei tuang de.

¹⁹Kum e thei Riakdanv hei thu tabui khang cho? Mi hei haaplou datmei thu twanlyammei kiu tabui tei cho twmei lyan khang e. Mi hei kakhou latryan swloumei Abraham kikta kiu guang mak saanv na khang de. Riakdanv hei kauh baanchara nunc rui chakak tatmei gaanv khat khou tii guang tuang e.

²⁰Tiki gaanv khat na rui taanhmei taanv khou tei thu chakak tatmei kage maek ge; Ravguangc karana de.[4]

²¹Kum e thei, Riakdanv hei Ravguangc latryan guay ta nuh makmei cho? Kiuc hamh e! Kalam thu ringhmei tiilou nuhmei Kariak Latdanv tiilou bam khwan e thei, hei tei piuna ravchaptatmei sw bam kan ni tuang e.

²²Tiki mbaanv kapwm hei paapc pumtan bangc khou bam e twna Nthanmei Latrik rui sa e. Hei zaeng rui, Jisu Khrista khou lwmmei guay khang tiilou nimei nrianhloumei kaipat hei lwmmei guay khang tiilou khang e.

²³Mi lwmmei paan rui ravchaptatmei tiswloumei tuang hei guang makmei hu khou, Riakdanv hei rui aniu ta kangmei nunc ta kumcna, mi lwmmei tuang hei ndauh pat mak saanv bangclou bam tuang e.

²⁴Kumna lwmmei paan rui aniu ta ravchaptatmei tiswlou khang rui, Khrista guang mak saanv, Riakdanv hei rui aniu ta nachaicpeic kumcna makav bam tuang e.

²⁵Ntaw thu lwmmei tuang hei guang thena, aniu Riakdanv rui makav bammei bangc khou bam dat mak khe.

²⁶Lwmpui paan rui Khrista Jisu khou nangniw guayna Ravguangc nac nunc di the.

²⁷Kalam thu Khrista khou duiluplou kanmei nangniw guayna hei Khrista rui pheybaan kumcna duam liamlou the.

²⁸Hei zaeng rui, Jihudimei khatni Zentelmei, bangh khatni nyngswmei, nggaanvmei khatni ntumei twmei nai dat mak khe; Khrista khou bammei nangniw guay akhat na di the.

²⁹Nangniw Khrista tuang e thei, nangniw Abraham nac nunc the, kumna Ravguangc rui nrianhloumei tei laa nimei nunc the.