Read Rongmei Naga GALATIMEI 4 Bible Online

GALATIMEI 4 - Rongmei Naga bible

GALATIMEI 4

¹Ai rui samei kiu thu, kapu tampy laa nimei nac tei kamei alauc bam saanv thu, kapu tampy tei katuang bam khwan sini, bangh kumcna bam tuang di he.

²Kapu rui saloumei ganv tangh mak saanv, langloumei nunc rui kata ni, katuang lanv ta ni sin bam tuang e.

³Hei tei kumcna aniu ni, angana sw bammei douc tei mbaanv tuang puat guay riak bangc khou bam khwan e.

⁴Tiki kating tangc pwkhou Ravguangc rui kanac mpouh ta ndiu guang the. Kamei ntumei gaanv khat khou rui puancna Riakdanv bangc khou lungclou khwan the.

⁵Hei tei Riakdanv bangc khou bammei aniu ta thuaklouna, aniu Ravguangc nac nunc sw khang e.

⁶Nangniw kanac nunc tipui zaeng rui,[5] Ravguangc rui Kanac Mpouh tuang Bumaengc, Ravguangc ta “Abba, Apu” twna kawmei Bumaengc tei aniu lung khou ndiu guanglou the.

⁷Hei zaeng rui, ntaw thu nangniw bangh hamh the, kanac mpouh di the. Kanac mpouh tipui zaeng rui Ravguangc rui kanac nunc khang tii nimei dam tei nangniw khang ni tii puni the.

⁸Tat kanmei ganv khou, nangniw Ravguangc ta thay makmei douc tei, rav hamhmei ta rav swna mi kumhmei bangc tei sw bam khwan e.

⁹Tiki nangniw ntaw thu Ravguangc ta thay the, hamh e thei Ravguangc rui nangniw ta thay the. Akumhna nangniw ramh sw ngam makmei suanmei riak khou tei karih tat dat niina ning pat bam tu cho? Nangniw mi kumhmei nunc tuang bangc tei sw dat nii di hena cho?

¹⁰Nangniw tingmik, bw, kakwm kaganv khatni tingkwm ta ngaek bam e.

¹¹Nangniw khang ntingloumei azaeng guay hei nsa maan nina ny twna lungh kadan tuang nai e.

¹²Chanathiu, ai rui nangniw khou zaenghuay e: ai nangniw kumhmei swmei kumcna nangniw ni ai kumcna sw o. Nangniw akhou ramhkhat na sini nkhuaimei tuang swlou mak ge.

¹³Nangniw khou gaychamv dinclou rey liangmei tei apumc khou suc numei naipui zaeng rui e twmei nangniw thay e.

¹⁴Atuang su nu tei nangniw ta nchanvmei tuang sw khwan sini, nangniw ata karaengna, hamh e thei malana ganc pat mak ge. Mi phaan tei nangniw rui ata kauh baanchara khat ta kumc, Khrista Jisu ta kumc laalou e.

¹⁵Nangniw ramneila tei tabui sw kan thena cho? Nangniw mik lat patna akhang tii nuh tuang ti thei, nangniw tii kan ni tuang dyng the twna ai sa ngam e.

¹⁶Latling samei hei rui ai hei nangniw khang zauczihmei sw thena cho?

¹⁷Kaniw tei nangniw khang mamav hakna karamh bam e; tiki hei tei gay khang hamh e. Kaniw rui kahawmei thu nangniw ta akhou rui sw ntamv patna kaniw biak thangc lungh gut bam dat khang tw tuang e.

¹⁸Ai bam khou na hamhna, kaganv kathuicna khou, gay nimei lam khou thu hei tei kumcna lungh gutna bam e thei gay e.

¹⁹Ai nzianmei alaucthiu, nangniw khou Khrista tuang lwnlung kasiamh thau mak saanv, ai nangniw khang rui meicpui narui kumcna ryanra bam e.

²⁰Ai ntaw nangniw daeng khou bam e thei gay ni tuang e; ai nangniw ta mi kumcna sa bam nii mak ge. Nangniw khang alung mpeyna ryanra e.

²¹Riakdanv bangc khou bam niimei nunc nangniw khou ai rui mi kumcna thanv nii e: Riakdanv rui samei tei nangniw chu mak he nah cho?

²²Mi kumna hylou e: Abraham nac mpouh gaanv nei nai e. Gaanv khat rui banghpui nac e, baihmei gaanv khat tei rui nyngswmeipui nac e.

²³Banghpui rui puanhmei nac tei maansei riak thei layna puanhmei nac e; tiki nyngswmeipui rui puanhmei nac tei thu Ravguangc tuang latryan thei layna puanh tuang e.

²⁴Mi hei latgiam e: Mi meicpui gaanv nei hei latdyng kanei tei e. Kanac nunc ta bangh swna puancloumeipui Hagar hei Sinai chyng khou swloumei latdyng tei e.

²⁵Arabia tuang Sinai chyng Hagar[6] hei ntaw tuang Jerusalem hei e. Kalam thu Jerusalem hei kakhou bammei mei guay lev bangh sw bam e.

²⁶Tiki tingkauh Jerusalem hei thu nyngswmei e. Kamei hei aniu pui e.

²⁷Kalam thu nthanmei latrik khou mi kumcna hylou e: “Nakamcpeic, nang neihla o! Naruimei ariw zat makmeipui, nang neihlana kauc o! Kalam thu ganc nruloumeipui rui kagaanv rui mpatlou makmeipui suangc kanac geic puni the.”

²⁸Chanathiu, aniu hei thu Isak kumcna kalatryan thei layna puanhmei nac nunc e.

²⁹Mi maansei riak thei layna puanhmei nac hei rui Bumaengh paan rui puanhmei nac ta tei sw kasic khang sw kanmei kumcna, ntaw ni sw bam muay e.

³⁰Tiki nthanmei latrik rui akumhna sa bu cho? “Banghpui ta tei kanac tei lev alay ganc o. Kalam thu banghpui nac tei nyngswmeipui nac tei rui kapu tuang tampy laanimei dam tei lay laa nuh mak ge,” twna sa e.

³¹Hei zaeng rui, chanathiu, aniu thu banghpui nac nunc hamh e; nyngswmeipui nac nunc de.