Read Rongmei Naga GALATIMEI 6 Bible Online

GALATIMEI 6 - Rongmei Naga bible

GALATIMEI 6

¹Chanathiu, thowkumhmei nkhuaimei khou keylou bammei ta ariw e thei, bumaengh khou bammei nangniw rui lungh zaenghna kata zay ntwnlou dat ro. Nangniw ta ni nthiam pw ramc e twna ramhthay o.

²Nangniw khat khat puat phungc nkhav karyna Khrista tuang latdanv tei piu nina e.[7]

³Thowkumhmei kamei ramhkhat sini hamh lana, kamei ramhkhat di the twna ning e thei, karana kata guat bam tuang e.

⁴Meic kathuicna karana katuang taanv ta tei zauc nina e. Gay e thei, kamei rui taanclou kanmei khang tei gaenghsw nuh e; hei tei meickai taanv ta lev kida khang hamh e.

⁵Meic kathuicna kara karana katuang puat phungc nina e.

⁶Nangniw khang nchamlou bammei nunc khang tei nangniw tuang nai naimei piu nzanh o.

⁷Nangniw rana nangniw ta guat riu. Ravguangc ta kiauc lac nuh mak ge. Kamei kamei rui nrouloumei tei tay dat puni.

⁸Meic pumc rui kahawmei thei layna taanhpui mei tei theic puni; Bumaengh rui kahawpui thei layna taanhpui mei tei ringcsuangmei laa puni.

⁹Hei zaeng rui, gaymei taanh khang liat lak ri kho; aniu tut makna bam e thei, kathai laa nimei ganv guang puni.

¹⁰Hei zaeng rui, aniu khang kadouchamei ariwpui kathuic, aniu meic kathuicna khou, nkunna lwmmei kaikhuncmei nchamc pang khou gaytaanv taanclou kho.

¹¹Abaanc kahak rui kahiak daicna hymei hei nangniw how the.

¹²Nangniw ta gihruamh khang sa bammei nunc tei mpaeng mikzaw khou na how gay khang sw lyan bammei nunc e. Hei tei kaniw ta Khrista tuang kros zaeng rui rai mak khang twna sw bam tuang e.

¹³Mi gihruamhmei nunc tei ni Riakdanv piumei nunc hamh e; nangniw ta gihruamh tu laa niimei kiu, nangniw gihruamc the twmei khou na tei kaniw gaenghsw nii lana e.

¹⁴Tiki akhang thu, ai gaenghsw nimei kiu aniu Poubauhmei Jisu Khrista tuang kros lam khou na de. Kalam thu mi kros paan rui atuang mbaanv tuang swmei theic the; ai mi mbaanv khou theic the.

¹⁵Gihruamhmei, gihruamh makmei rui ramhkhat sini hamh e; tiki nthukmei thu meic kathanc swmei hei de.

¹⁶Mi riak thei layna tatmei mei nunc, Ravguangc tuang Isaraelmei nunc khou chuzaenghmei khatni zauzian naimei sw diu!

¹⁷Nkhamh khou ai rui sa nimei thu: meic gaanv khat na rui sini ata sw katuakclou dat mak kan di tho. Apumc khou nai bammei achin guay hei rui ai hei Khrista bangc e twmei lyanmei tuang the.

¹⁸Chanathiu, nangniw khou aniu Poubauhmei Jisu Khrista tuang zauzian nai diu tho! Amen.