Read Rongmei Naga EPHISIAMEI 2 Bible Online

EPHISIAMEI 2 - Rongmei Naga bible

EPHISIAMEI 2

¹Nangniw tuang twanlyammei khatni paapc guay zaeng rui, nangniw theic bam khwan e.

²Mi douc tei, nangniw mi mbaanv tuang simei chaeng khou tat bam khwan e; tingpuk khou simei bumaengc guayna ta sin bammeipu, Ravguangc lat liammei nunc ta ntaw sinsw bammei bumaengc lat piu bam khwan e.

³Aniu ni kaniw kumcna meic pumc rui kahawmei khou lungc bam khwan e; meic pumc rui khatni lungning rui kahawmei khou tat bam khwan e. Kaniw kumcna aniu ni kalwnlungh khou rui Ravguangc lungpuam keylou nimei nunc swna bammei tuang khwan e.

⁴Tiki Ravguangc zauzian thu heidikamv daic e khatni kamei rui aniu ta heidi kamv nzian e.

⁵Twmei thu, aniw twanlyampui zaeng rui theicna bam khou, kamei rui aniu ta Khrista lev tiringcthaulou dat nchamc the. Nangniw ta kanloumei hei zauzian paan rui e.

⁶Khrista Jisu khou aniu ta kamei lev tiringcthaulou dat nchamcna tingkauh kandic khou tidungc nchamclou the.

⁷Mi hei, kamei rui aniu ta nzianmei Khrista Jisu paan rui ndauhloumei sa dat khang thay makmei kazauzian tei guang nimei ganv guay khou ndauh bam khang swlou tuang e.

⁸Kalam thu zauzian rui nangniw ta lwmmei paan rui kanlou the. Nangniw taanv paan rui hamh e; Ravguangc tuang kaipat de.

⁹Hei zaeng rui mi khang hei meic gaanv khat na sini gaengh sw khang maek ge.

¹⁰Hei zaeng rui, aniu hei, aniu taanh khang chamdaanvloumei gaymei taanv tei taanh khang Ravguangc rui Khrista Jisu khou kasiamhloumei mei nunc e.

¹¹“Gihruamhmei” (mi hei maansei rui kaniw pumc khou taanhmei taanv ta e) twna kawmei Jihudimei nunc rui “gihruamh makmei” twna kawmei Zentelmei swna puancloumei nangniw hei kahu nungc akumhmei mei nunc sw bam khwan cho twmei ningtow o.

¹²Mi douc tei nangniw Khrista ta thay makna bam khwan e, Ravguangc rui kapahpatloumei nunc pang khou kazauh makna tasang tasiucmei swna bam khwan e, khatni Ravguangc rui latryan swna nrianhloumei tei laa khang nangniw dam maekna mi mbaanv khou rigwnmei ni maek, Ravguangc ta ni thay mak twna bam khwan e.

¹³Tiki ntaw thu Khrista Jisu khou guanglou khou rui, ducna bam khwanmei nangniw ta Khrista zei paan rui Ravguangc daeng khou zay guanglou the.

¹⁴Tabui cho tiki, Khrista rui Jihudimei lev Zentelmei ta akhatna tiswlouna aniu khang chuzaenghmei phungc guanglou the. Jihudimei lev Zentelmei kak khou daengc langclou bammei zauczihmei raengc tei kamei theicloumei tei rui swra keyna aniu ta akhat na tiswlou the.

¹⁵Kamei rui Riakdanv tei mi khou tei naimei latdanv khatni riak guay tei kazauhna swmaan lana, mi zaat kanei ti hei kakhou meic thanh akhat tiswlouna chuzaenghmei phungc guanglou the.

¹⁶Zauczihmei sw bammei ta tei, kamei kros khou theicloupui paan rui swmaanlou the; kros paan rui Jihudimei lev Zentelmei ta pumh akhat khou tikariulouna Ravguangc khou zay kariulou the.

¹⁷Kumna Khrista guangna, Ravguangc khou rui ducna bammei Zentelmei khou ni, anana bammei Jihudimei khou ni chuzaenghmei gaychamv hei dinclou the.

¹⁸Hei zaeng rui, Khrista paan rui Jihudimei ni, Zentelmei ni Bumaengh akhat khou Pu khou guang nuh the.

¹⁹Kum thena, Zentelmei nangniw ni guanghdic baihmei mei nunc hamh the, tasang tasiucmei hamh the; Ravguangc mei nunc lev dilung makaamv di the, Ravguangc tuang kaikhunh khou kaikhunh akhatnamei nunc di the.

²⁰Nangniw hei ni Khrista rui kaikwn-tauc swna latdiutatmei nunc khatni muhzwng nunc tuang kaibam khou sw thaumei kai e.

²¹Kai kapwm tei Khrista khou duanc kariulouna, Poubauhmei ta kalumpui kai khang swthau bam tuang e.

²²Ravguangc tuang Bumaengc lungcloupui kai kasiamh thaumei khou tei, Khrista paan rui nangniw ta ni tikazauhlou the.