Read Rongmei Naga EPHISIAMEI 3 Bible Online

EPHISIAMEI 3 - Rongmei Naga bible

EPHISIAMEI 3

¹Hei zaeng rui, Zentelmei nangniw khang rui Khrista Jisu zaeng rui kangkai khou bammei Paul akhou,

²mi Ravguangc zauzian taanv hei nangniw khang taanclou khang nsinlou the twmei nangniw chu kan the twna laa the.

³Ravguangc rui katuang meic thay mak bam khwanmei raeng tei ndauh patna akhou tithaylou the. Mi lam khou tei samna ai hylou kan the.

⁴Kumna ai rui hylou kanmei tei nangniw pac e thei Khrista tuang meic thay mak bam khwanmei, ai thaymei hei nangniw ni thay puni.

⁵Kahunungc thu hei tei meic nunc khou tithaylou mak bam khwan e, tiki ntaw thu Ravguangc rui Bumaengh paan rui katuang nthanmei latdiutatmei nunc khatni muhzwng nunc khou ndauhlou the.

⁶Mi kiu thu, gaychamv paan rui Zentelmei ni, Jihudimei lev Ravguangc suaihiam laa nchamc puni the. Kaniw hei ni pumh khat di the, kumna Khrista Jisu paan rui tiilou nimei nrianhloumei tei lay laa puni the.

⁷Ravguangc rui katuang zauzian kaipat swna akhou katuang kaipat tiilouna gaychamv tuang siamruai taanv hei akhou nsinlou the.

⁸Ai hei Ravguangc mei nunc pang khou nthyammei khou rui nthyam liangmei bam khwan sini, kanganv nai dat makmei Khrista tuang lanv tuang gaychamv hei Zentelmei nunc khou dinc ndauh khang,

⁹khatni Ravguangc rui taanclou nimei meic thay bam mak khwanmei raeng hei meic guay khou dinc ndauh khang akhou nsinlou the. Ramh katana damcloumeipu Ravguangc rui mi hei kahunungc thu ndauh pat makna lou bam khwan e.

¹⁰Mi kiu ntaw hei, phwamling paan rui, kalam katana thay ngammei Racguangc ningting tei tingkauh kandic tuang kaipouc nunc khatni ngamvsinmei nunc thay kan khang e.

¹¹Mi kiu Ravguangc rui reynungc rui raengc guangmei raeng thei layna, Poubauhmei Jisu Khrista paan rui taanc pat kanmei taanv e.

¹²Khrista khou bammei paan rui khatni kakhou lwmmei paan rui, aniu baucna, rouh tuang maekna Ravguangc daeng khou guang nuh the.

¹³Hei zaeng rui, ai nangniw khang rui ryanra khaengv bammei khou hei nangniw lungh tangkhyn mak khang huay e. Mi hei nangniw hymdaih khang e.

¹⁴Hei zaeng rui kandih khou ni, tingkauh thangc ni, kalingmei kaikhunc guay tuang zancphuakh tiiloumeipu, Pu hu khou ai khuksun key e.

¹⁶Gaat tuang nai dat makmei katuang hymdaihmei khou rui, kabumaengc paan rui, nangniw khou pumtan tiilouna, nangniw tuang kalungcmei mei ta tei titanc thau khang ai Ravguangc khou ney e.

¹⁷Lwmmei paan rui nangniw lung khou Khrista lungclou bam khang ai huayney e. Nangniw nzianmei khou kamaan zangc ntip keyna ding ntipna,

¹⁸Khrista ramzian kasaanv, kadiat, kathukh, kakau Ravguangc mei baihmei guay lev nangniw ni thay ngam khang ai huayney e.

¹⁹Ngguay, kasyng thay tangc ngam makmei Khrista ramzian hei thay khang, kumna Ravguangc tuang lwnlung nangniw khou padik sikh sik bam khang e.

²⁰Aniu khou taanv sw bammei katuang pumtan paan rui, aniu rui neymei suangc khatni ning tanghmei suangc mbuna taanclou ngammeipu,

²¹Ravguangc hei phwamling khou khatni Khrista khou tingsaengzaeng hymdaic bam kan diu! Amen.