Read Rongmei Naga EPHISIAMEI 4 Bible Online

EPHISIAMEI 4 - Rongmei Naga bible

EPHISIAMEI 4

¹Hei zaeng rui, Poubauhmei khang rui kang bammei ai rui nangniw khou huay e: Ravguangc rui nangniw ta kawloumei panty lwnlung khou tei lungc o.

²Kaganv kathuicna niamhna, lungh zaenghna, khatni khaengvthayna bam o. Khat khat khou akhaengvlou karyna nzianmei lyanlou o.

³Chuzaenghmei paan rui nangniw ta bang kariulou bammei, Bumaengh rui tiimei akhatna swmei tei nai tanh tan bam khang ngammei kasang karamc o.

⁴Nangniw ta kawloumei tuang rigwnmei hei akhatnamei kumcna, pumh akhat nade, Bumaengh ni akhat nade.

⁵Poubauhmei akhat de, lwmmei akhat nade, duilupmei akhat nade;

⁶Ravguangc akhat nade. Kamei hei aniu guayna pu e, aniu guayna kaipouc e, aniu guayna khou taanv taanclou e, khatni aniu guayna khou bam e.

⁷Tiki Khrista rui aniu khou dam swna nzanhlouna aniu kathuic khou kaipat tiilou e.

⁸Nthanmei latrik rui sa e: “Kamei kauh thangc kupui ganv khou kangmei mpeyna ta nduangh ku kan e; kamei rui meic nunc khou kaipat tiilou the.”

⁹“Kamei ku kan e” twmei kiu tabui kabac cho? Mi kabac thu kamei kandih kabangc kasyng thangc key the twmei tuang e.

¹⁰Kumna key kanmeipu tei tingpuk kandih khou bam lik sik khang tingpuk ruc kauh thangc ku kan the.

¹¹Kaipat tiimeipu kiu kamei hei e. Gaanvsaekc ta latdiutatmei khang, gaanvsaekc ta muhzwng khang, gaanvsaekc ta gaychamv dinh khang, gaanvsaekc ta gaenghpouc khatni dinhpouc khang kamei rui tiilou the.

¹²Mi hei kaniw hei kaniw rui Ravguangc mei nunc ta siamruai taanv khang kasiamhthaulouna Khrista tuang pumc tidaic thau khang e.

¹³Kum pwkhou, aniu lwmmei khou khatni Ravguangc Nac Mpouh ta thaymei khou akhatna swna nchamcna guang tangclou khang, aniu meicphamei swna Khrista tuang hyang ryan daic tangh khang e.

¹⁴Kum pwkhou, kaniw rouc rui meic nunc ta nchumh makmei khou zay mbianghlou tat bammei meicguatmei nunc tuang latdyn rui dui kamuatc kumc, pwanzingh kumc, kaniw ta phungc pat, phungc gut tat bammei alauc nunc kumhmei tei aniu sw dat mak khang e.

¹⁵Mi phaan tei, nzianna nchumhmei lat sana, aniu kalam katana khou kapyswmei Khrista khou daicthau khang e.

¹⁶Kapumc nanw guay tei kapy Khrista khou nsuk alamvlouna, nanw kathuic kathouc kathouc taancna, kapumc tei daicthau khang nzianmei paan rui kasiamh thau khang e.

¹⁷Poubauhmei zanc khou ai rui nangniw khou sa e: gaeng makmei chwn khou rui patmei thei layna lungc bammei ravning makmei nunc tei kumcna lungc dat ri tho.

¹⁸Kaniw lungning zingc the; Ravguangc tuang ringhmei tei kaniw khou maek ge. Kalam thu kaniw lung tanhmei rui kaniw ramhkhat sini thay mak khe.

¹⁹Kaniw khou zakmei nai dat mak khe. Nthah boulahmei khou luplou lana kasut tuang nai dat makna simei, mphuammei taanv guay taanc the.

²⁰Khrista khou rui nangniw khou nchamloumei tei thu mi kumhmei tei hamh e!

²¹Nangniw Khrista lam khou chu kan the khatni kakhou naimei nchumhmei tei nangniw khou dinclou kan the.

²²Guatmei tuang kahawmei rui sw kasicloumei nangniw tuang meic raan tuang lwnlung tei luak ganc o.

²³Nangniw lung khatni lungning tei tikalaic patna,

²⁴Ravguangc ta luicna kasiamhloumei, kalingmei khou rui ravchaptatmei khatni nthanmei panty lungc ndauhpatmei meic thanh tei pheybaan piu kumcna piu o.

²⁵Hei zaeng rui, saraamc dat ri tho! Khat khat khou latling sa o. Kalam thu aniu pumh akhat tuang nanw nchamc di the.

²⁶Nangniw lungh puamc sini paapc taanh riu; neihmaryn puamc zingh rio.

²⁷Diabol khang bam tii riu.

²⁸Kaihouhmei nunc tei houc dat ri tho; maekmei nunc khang tiipat ngam khang, alinghna kabaanc rui taanc dat kan di tho.

²⁹Nangniw mwang khou rui sw kasic nimei lat sapat riu; tiki chuloumei nunc khang suaihiam sw nimei, kaniw ta kasiamhthaulou nimei kage naimei lat tei sa o.

³⁰Nangniw hei Ravguangc tuang di the twna thuakloumei tingmik nganv khang nangniw khou tiiloumei Ravguangc tuang Bumaengh Nthanmei tuang lung tikabiu riu.

³¹Lungning nkhucmei, reihsimei khatni lungh puamhmei hei ganc o. Kaudu kaudangmei, sakasic karoucmei, karaengmei lungning, mi kumhmei guay hei ganc o.

³²Mi phaan tei khat khat khou nzianthayna, lungh niamhna, Ravguangc rui Khrista khou nangniw ta kuakloumei kumcna khat khat ta kuaklouna lungc o.