Read Rongmei Naga EPHISIAMEI 5 Bible Online

EPHISIAMEI 5 - Rongmei Naga bible

EPHISIAMEI 5

¹Nangniw hei Ravguangc rui heidikamv nzianmei nac nunc di thena, kata luih khang sw nina e.

²Khrista rui aniu ta nzianna, Ravguangc ta tipianloumei namhgaymei agaw nteina katlou kumc, kapanty aniu khang tiipatloumei tei kumcna, nangniw ni khat khat ta nzianna lungc o.

³Nangniw Ravguangc mei nunc pang khou thu lungcmaanv lungcmowmei, mphuam mphamei, agaamv agahmei; mi guay hei lat na sini satow bam lak nina e.

⁴Nkhuc nroucpui lat samei, chapav chalaw swmei, mphuam mphamei kiaula, mi guay hei kazi mak khe; sw lak nina e. Mi phaan tei Ravguangc ta thuancku bam nina e.

⁵Lungcmaanv lungcmowpui mei, mphuam mphapui mei, agaamv agahpui mei (agaamvmei hei ravmaengc kalummei e) tei Khrista khatni Ravguangc guangcdic khou kadam maek ge twmei nangniw thay nina e.

⁶Mpangmei lat rui nangniw ta tiguat riu. Mi guay zaeng rui latliammei nunc ruc khou Ravguangc lungpuam keylou puni.

⁷Hei zaeng rui, mi kumhmei nunc ta tei nangniw duang sw riu.

⁸Nangniw ni kahunungc zinghmei sw bam khwan e; tiki ntaw thu Poubauhmei khou gaanhmei di thena, gaanhmei nac nunc kumcna lungc o.

⁹Kalam thu, gaanhmei[1] thai thu gaymei, ravchaptatmei, khatni nchumhmei e.

¹⁰Poubauhmei rui kahawmei tabui tei cho twmei thay khang karamc o.

¹¹Zinghmei tuang gaeng makmei taanv guay tei lay taanh riu. Mi phaan tei, simei tuang simei taanv guay tei ndauhpat ro.

¹²Kaniw rui nkamhna taanc bammei taanv guay tei sa bam khang sini zakpui tuang e.

¹³Gaanhmei rui tigaanclou pwkhou ramh guayna kalingmei tei how ngam e.

¹⁴Kalam thu ramh guayna tihowlou kanmei tei gaanhmei e. Hei zaeng rui mi kumcna sa e: “Zip bammei nang, zipthau tho; theihmei khou rui thau tho; Khrista rui nang khou gaanclou puni the.”

¹⁵Nangniw akumhna lungc bam tu cho twmei zaucchuy o. Mpangmei nunc kumcna lungh riu, ningtyngmei nunc kumcna lungc o.

¹⁶Kaganv hei gaytaanv khang asutna piu o; ntaw ganv hei sipui ganv e.

¹⁷Mpang ri tho, Ravguangc rui ningmei tei phu tho.

¹⁸Zouh mba riu; hei tei rui nang ta sw kasic puni. Mi phaan tei Bumaengh rui padikna lungc o.

¹⁹Nangniw khat khat khou kalumlu, hymthuanhlu khatni bumaengh lu lat tei sa suan kary o; khatni nangniw lungsyng rui thuancna kalumlu khatni hymthuanhlu Poubauhmei khou suanlou o.

²⁰Aniu Poubauhmei Jisu Khrista zanc khou, ramh guayna khang kaganv kathuicna Pu Ravguangc ta thuancku bam o.

²¹Khrista ta chakhwang swna nangniw khat khat bangc bam o.

²²Nowthiu, nangniw Poubauhmei bangc khou bammei kumcna, nangniw gaanv bangc bam o.

²³Khrista hei kamei rui kanpatloumei kapumc phwamling tuang py swmei kumcna, gaanv hei ni now tuang py e.

²⁴Hei zaeng rui phwamling rui Khrista bangc bammei kumcna, now rui ni kalam katana khou gaanv bangc bam nina e.

²⁵Gaanvthiu, Khrista rui phwamling ta nzianna mi khang kapanty tiipatmei kumcna nangniw now ta nzian o.

²⁶(Mi hei lat khatni dui rui low nthanna reicpatlouna,

²⁷phwamling ta mi mphuam tanacmei, tarat taruaihmei, khatni nthuih makmei maekna, nthanmei, khanvbamv maekmei, howgaymei swna kamei rui kakhang tiilou khang e.)

²⁸Gaanv rui now ta kapumc ta kumcna nzian nina e. Kanow ta nzianpui mei tei kata nzian tuang e.

²⁹Meic gaanv khat na sini kapumc ta karaeng mak ge. Karaengmei phaan, Khrista rui kapumc swmei phwamling khang swloumei kumcna, kamei rui kakhang titu tizangv e khatni kadanlou e.

³⁰Kalam thu aniu hei kapumc nanw the

³¹“Hei zaeng rui, nggaanvmei rui kapui kapu ta mpatlouna kanow khou kariu nina e, kumna kaney gaanv nei tei akhatna sw nina e.”

³²Mi khou hei meic thay tangh makmei nthukmei kabac nai e, kumna mi hei Khrista lev phwamling lam khou sa tuang e.

³³Tiki mi hei nangniw khang ni sa tuang e: gaanv rui now ta kapumc ta kumcna nzian nina e, khatni now rui gaanv ta chakhwang sw nina e.