Read Rongmei Naga PHILIPIMEI 2 Bible Online

PHILIPIMEI 2 - Rongmei Naga bible

PHILIPIMEI 2

¹Nangniw Khrista khou bammei panty hei rui nangniw ta titanclou e thei, khatni kamei rui nangniw ta nzianmei hei rui nangniw ta katiuthaulou e thei, Bumaengh rui lungc nduanghloumei[2] tei nangniw laatow e thei, kumna nangniw khou khat khat khang kadanmei khatni nzianmei nai e thei,

²mi lungning kahak tei nai nchamcna, mi ramzian kahak tei rui khat khat ta nzianna, lungh khat chwn khat swna aram neila tipadiklou khang zaenghuay e.

³Nangniw kakhang khang na ningna gaeng makmei tuang daic niimei chwn khou rui ramhkhat sini taanh riu; tiki niamh o. Meickai ta nang khang suangc mbumei dyng e twna ning o.

⁴Khat khat khang zauclou thay o; kakhang khang na zauh riu.

⁵Khrista Jisu tuang lungning hei nangniw khou ni nai nina e.

⁶Kakhou Ravguangc lwnlung nai bam sini, kamei Ravguangc lev nchamc ni de[3] twna ning mak khwan e.

⁷Tiki kachwnphuakh khou rui, katuang guay ganclouna bangh lwnlung laa the, kamei maansei guanhna lungc guang the.

⁸Kamei niamh keyna maansei pumc swna latpiulou the, kros khou theicloumei nganvna piulou the.

⁹Mi zaeng rui Ravguangc rui kata kauh liangmei bamv khou tikulou the, zanh guay pang khou daic liangmei zanc kakhou tiilou the.

¹⁰Kum thena, tingkauh, kandih khatni kandih bangc khou bammei[4] katana, kazanc ta chakhwang swna khuksun key puni.

¹¹Khatni Pu Ravguangc hym khou, meic kathuic rui, Jisu Khrista hei Poubauhmei e twna sa puni.

¹²Nzianmeithiu, ai bam khou nangniw latpiuna bammei tei kumcna, ai bam mak khou ni latpiu chuy diangcna bam o. Nangniw ta kanloumei tei ti-nthuihlou khang, pingkadunhna karamc bam o.

¹³Kalam thu Ravguangc kamei rui ningmei tei piu nii khang khatni piu ngam khang kamei nangniw khou taanv taanclou bam e.

¹⁴Nangniw ramh guayna khou khat khat ta khanc lanc tuang, hamh e thei khat khat ta agay agi tuang maekna taanc o.

¹⁵Kum pwkhou nkhuai mbamei khatni simei mei kin khou hei, nangniw khuay maekmei khatni nthanmei swna nthuihmei Ravguangc nac nunc sw khang e. Gaanchuangcna kumc nangniw mbaanv khou gaanc o.

¹⁶Ringhmei lat tei sin ntip bam o. Kum pwkhou ataanv hei nsa hamh the twna Khrista tingmik nungc kiu ai gaengh sw khang e.

¹⁷Nangniw ramlum tei Ravguangc khang katlou khang apanty zei hei ravcha swna bunlou e thei, ai neihla e, kumna nangniw lev neihla nchamc e.

¹⁸Hei tei kumcna, nangniw ni neihla nina e, kumna ata ni tineihlalou o.

¹⁹Ravguangc rui chwnmei e thei, asaanh makmei lungc khou Timothi ta nangniw daeng khou ndiu guang puni, kumna kamei rui nangniw chamv phungc guang datna ata tineihlathaulou khang e.

²⁰Ai lev lungh tamzuanmei khatni nangniw khang kadan changh bammei Timothi kumhmei meic baihmei maek ge.

²¹Baihmei guay thu kakhang khang na phuna, Jisu Khrista khang thu ninglou mak khe.

²²Timothi ramgai tei nangniw thay e. Gaychamv taanv khou aney hei punav kumcna taanc nchamc bammei tei nangniw thay e.

²³Ai akumhmei lwnlung khou bam dat puni cho twmei thaypui lev Timothi ta nangniw daeng khou ndiu guang khang ning bam e.

²⁴Ai kahak ni asaanh mak khou nangniw daeng khou guang khang Poubauhmei khou lwmgay bam e.

²⁵Ai lev taanv taanc nchamcmei, rihmei sw nchamcmei, nangniw tuang latdiumei, ata siamruai swloumei achana Epaphrodita ta nangniw daeng khou ndiu guang khang kage nai e twna ning the.

²⁶Kamei nangniw ta how dat niina bam e khatni kamei mpeyna lungh katuakcna bam e. Kalam thu kamei nnau kanmei tei nangniw chu kan the.

²⁷Kamei nnauna theic ni kumclou the. Tiki Ravguangc rui kata na hamhna ata ni nzianlouna zaengsimei khou rui tizaengsi katynlou nimei khou rui tiduaklou the.

²⁸Kumna ai rui kata nangniw daeng thangc ndiulou nii ranv the. Kalam thu nangniw kata how e thei neihla puni the, kumna alung ryanramei ni kuak puni the.

²⁹Kumna nangniw kata Khrista khou neihlana laalou o. Mi kumhmei mei nunc ti hei chakhwang swlou o.

³⁰Kamei Khrista tuang taanv khou rui, nangniw taanc tangc ngam makmei ata nkhavloumei taanv khou rui kamei theic duaklou the.