Read Rongmei Naga PHILIPIMEI 3 Bible Online

PHILIPIMEI 3 - Rongmei Naga bible

PHILIPIMEI 3

¹Nkhamh khou, achanathiu, Poubauhmei khou neihlana bam o. Ai hy kanmei tei hy kaluaih dat datmei akhang kunghmei hamh e; nangniw suai mak khang e.

²Simei taanv taanc bammei si nunc, gihruamh khang na rui sw bammei nunc khou tei rui ramhthayna bam o.

³Kalingmei gihruamhmei nunc kiu thu kaniw tei hamh e; Ravguangc ta Bumaengh paan rui kalummei nunc, Khrista Jisu khou neihlana bammei nunc, meic pumc tuang khou ngangvlou makmei nunc, aniu hei e.

⁴Meic pumc tuang khou ngangvlou kho tw e thei, akhang ni nai de. Thowkumhmei rui meic pumc tuang khou kamei ngangvlou khang nai e twna ning e thei, kakhang suangc ai na mbu de.

⁵Zaeng tachat nungc ai gihruamc e; ai hei Isaraelmei e; Benjamin kaikhwangmei e; Ibrimei ling e; Riakdanv ngaekmei khou Pharisimei e.

⁶lungh gutmei lam khou sa pwkhou, phwamling ta swmaan khang swmeipu e. Riakdanv ngaekna ravchaptatmei lam khou, ai khanvbamv maekmeipu e.

⁷Akhang gaengmei e twna ai chaklou bam khwanmei guay tei Khrista khang rui nsa tuang di the twna ganc the.

⁸Mi guay hei na hamh e; Poubauhmei Khrista Jisu ta thaymei hei ramh ta kida dat khang maek khe; ramh guayna nsa di the twna ai chak the. Ai kakhang rui mi guay hei ganc the; mi guay hei nsa tuang di the twna ai ganc the. Mi hei ai Khrista ta laatowna,

⁹ai kamei lev akhatna sw bam khang e. Riakdanv piumei paan rui ai rui ntaanvloumei ravchaptatmei zaat tei akhou nai dat mak khe. Khrista khou lwmpui paan rui tiiloumei, lwmpui paan rui Ravguangc rui tiiloumei ravchaptatmei tei akhou nai the.

¹⁰Ai rui kahawmei thu Khrista ta thay khang, kumna ringcthau datmei Khrista tuang pumtan tei akhou nai khang, kamei ryanra akhaengvmei khou lay theih khang,

¹¹kumna ata theihmei khou rui tiringcthau dat khang twmei hei e.

¹²Mi guay hei ai laatow ngam the, ai nthuih the twna ai sa mak ge. Hei tei akhang laatow khang ai karamc e. Kalam thu Khrista rui ata kakhang nymlou the.

¹³Chanathiu, ai hei tei laatow tang the twna ning mak ge;[5] tiki ai rui sw bammei kiu thu, thei thangc nai duc kanmei ta tei amuclouna, hu thangc naimei tangclou nipui bamv khou tei guang tangh khang ngammei kasang karamcna pak bam e.

¹⁴Mi zaeng rui, swan tei laatow khang tangclou nipui bamv tei nzwan chupna ai pak bam e. Mi swan kiu thu tingkauh thangc lungh khang Ravguangc rui Khrista khou kawloumei hei e.

¹⁵Bumaengh panty khou alauc hamhmei aniu thu mi kumhmei lungning hei nai nina the. Thowkumhmei khang mi lungning hei tamzuan makpui tuang nai e thei, Ravguangc rui mi hei tithay nthanlou puni.

¹⁶Kum bam khwan sini, aniu ntaw nganv tat guangmei riak khou, hu thangc tat gut di kho.

¹⁷Chanathiu, nangniw ni athei layluaih o. Aniw rui nangniw khou lungc lyanlou kanmei ta tei nzeicna lungc bammei nunc ta tei zauc o.

¹⁸Mi hei ai kahunungc ni mpeyna sa kan the, kumna ntaw ni mikdui keyna sa datpui tuang e: Khrista tuang kros ta zauczihmei swna lungc bammei meic mpeyna nai e.

¹⁹Kaniw khang nganvlou nimei kiu maanmei e. Kalam thu kaniw bung tei kaniw tuang rav the. Kaniw zak nimei tuang khou tei kaniw gaenghsw the, khatni mbaanv tuang khou kaniw lunghlou the.

²⁰Tiki, aniu thu tingkauh mei nunc de; mi khou tei rui aniu ta kanloumeipu, Poubauhmei Jisu Khrista guangmei ta nkhwan bam e.

²¹Ramh katana ta kabangc khou lou khang kakhou naimei pumtan tei rui aniu tuang suanmei pumc ti hei katuang hymdaihmei pumc kumhmei khou tigwanlihlou puni.