Read Rongmei Naga KOLOSSIAMEI 1 Bible Online

KOLOSSIAMEI 1 - Rongmei Naga bible

KOLOSSIAMEI 1

¹Ravguangc rui ningmei thei layna Khrista Jisu tuang latdiutatmei Paul khatni aniu chana Timothi rui—

²Kolossiamei Ravguangc mei nunc, Khrista Jisu khou lwmnuhmei chana punav guay khou hymei: Aniu Pu Ravguangc rui nangniw khou zauzian khatni chuzaenghmei tiilou diu!

³Aniw rui nangniw khang huayneymei kathuic, aniu Poubauhmei Jisu Khrista Pu, Ravguangc ta thuancku tanh tan bam e.

⁴Kalam thu nangniw Khrista Jisu khou lwmmei lam khatni nangniw rui Ravguangc mei nunc ta nzianmei lam tei aniw chu the.

⁵Hei tei kahunungc nangniw chu kanmei kalingmei Gaychamv rui tii guangmei tingkauh thangc nangniw khang nai bammei rigwnmei khou tei rui guangmei lwmmei khatni nzianmei tei e.

⁶Nangniw mi Ravguangc zauzian chamv hei chu lana kabah thaylou nungc tei rui thauna, nangniw khou swlou bammei kumcna, mbaanv kapwm khou ni mi gaychamv hei kathai nthai bam e khatni baanc lik pat bam e.

⁷Aniw lev siamruai taanv taanc nchamcmei, Khrista khang lwmnuhmei taanvruaimei, aniw phaan[1] gaychamv dincloumeipu Epaphra khou rui nangniw Ravguangc zauzian lam tei thay kan the.

⁸Bumaengh rui nangniw khou tiiloumei nangniw ramzian lam tei kamei rui aniw khou dinclou the.

⁹Hei zaeng rui, nangniw lam khou chu rap khou rui thauna aniw rui nangniw khang taek makna huayney bam e. Bumaengh rui tiiloumei kabahthaymei khatni ningting paan rui Ravguangc rui ningmei ta thaymei hei nangniw khou padikna nai khang huayney bam e.

¹⁰Kum pwkhou nangniw Poubauhmei rui ningmei khou lungc ngam puni khatni kamei rui kahawmei taanc ngam puni. Nangniw panty khou gaymei taanv guay taanc pat puni khatni nangniw Ravguangc ta thaymei mbu thau puni.

¹¹Nangniw ramh lam katana khou neihlana khaengv ngam khang, katuang hymdaihmei pumtan nangniw khou tiilou diu o.

¹²Ravguangc rui kamei nunc khang gaanhmei guangcdic khou chamdaanvloumei tei lay laa biuhpui mei nangniw ta tiswloumei aniu Pu ta thuancku o.

¹³Kamei rui aniu ta zinghmei pumtan khou rui kanlouna, kamei rui nzianmei kaNac Mpouh tuang guangcdic khou phungc guanglou the.

¹⁴Khrista rui aniu ta thuakpatlou the, aniu paap guay kuaklou the.

¹⁵Khrista hei mik rui how makmei Racguangc lwnlung e. Kamei hei damcloumei katana ruc khou nareimei e.

¹⁶Kalam thu, tingpuk kandih khou nai bammei howmei, how makmei ramh katana; guanghbamvpaeng guay, pumtan guay, dihsinmei guay, khatni ngamv guay kazauhna kapaan rui khatni kakhang rui damclou the.

¹⁷Ramh khat na sini nai mak khou rui kamei nai bam khwan the, kumna kakhou ramh guayna bang kariulou the.

¹⁸Kamei hei kapumc phwamling tuang py e; kapumc hei ringh khang kakhou rui tii guang e khatni kamei hei nareimei, theihmei khou rui ringcthau datmeipu e. Mi hei kamei ramh kaguayna ruc khou kapysinghmei sw khang e.

¹⁹Kakhou Ravguangc tuang lwnlung kapwmna naimei hei Ravguangc rui ningmei e.

²⁰Kumna kanac mpouh paan rui mbaanv kapwm ta kakhou phungc guanglou datmei hei Ravguangc kamei rui ningmei e. Kanac mpouh kros khou theicloupui paan rui tingpuk kandih khou naimei ramh katana ta kakhou guatcswlou dat the.

²¹Nangniw tuang simei lungning khatni simei taanv guay zaeng rui, nangniw Ravguangc tuang zauczihmei swna kakhou rui ntamv ducna bam khwan e.

²²Tiki ntaw thu, kanac mpouh theicloupui paan rui, nangniw ta Ravguangc rui kakhou zay kariulou dat the. Mi hei nangniw nthanmei, khanvbamv maekmei khatni khuay maekmei swna kahu khou guang khang e.

²³Hei zaeng rui, nangniw gaychamv chuna lwmlou kanmei tei pat pat gut gut tuang sw makna, nangniw lwmmei khou tei ntipna khatni chalingc dingna bam tanh tan nina e. Mi gaychamv kiu thu mbaanv khou meic katana khou dinc bammei, Paul ai mi tuang taanvruaimei sw bammei gaychamv hei e.

²⁴Ai nangniw khang ryanra khaengv bammei hei ai neihla e. Kalam thu apumc ryanramei hei rui, Khrista rui kapumc phwamling khang ryanra nimei dam naimei tei ai tiguang nthuihlou khang nkhav bam tuang e.

²⁵Ravguangc rui ata phwamling tuang siamruaimei tiswlou the. Mi kiu thu, Ravguangc tuang lat hei nangniw khou dinc ntanghna dinclou khang e.

²⁶Mi kiu thu, tat kanmei kin guay khou dinclou makna lou bammei, ntaw kamei nunc khou ndauhloumei lat hei e.

²⁷Ravguangc kamei rui meic guay khang chamdaanvloumei daic kanmei khatni hymdaihmei meic thay makmei raeng hei kamei nunc khou tithaylou khang kamei rui ningmei e. Mi meic thay makmei lat kiu thu Khrista nangniw khou bam e twmei hei e. Mi kabac kiu thu nangniw Ravguangc hym lay laa puni the twmei tuang e.

²⁸Hei zaeng rui, aniw meic kathuicna khou Khrista ta dinclou e. Khrista khou meicphamei akhat swna kaniw kathuic ta Ravguangc khou phungc guanglou nuh khang ningting naimei guay sinswna kaniw ta pingthay khang dinclou e khatni thay khang nchamlou e.

²⁹Kumna akhou tiilou bammei ngammei pumtan hei sinswna, mi khang rui ai taanc ranvna karamc bam e.