Read Rongmei Naga KOLOSSIAMEI 2 Bible Online

KOLOSSIAMEI 2 - Rongmei Naga bible

KOLOSSIAMEI 2

¹Nangniw khang, Laudikiamei nunc khang khatni ata zawthay zawhow makmei baihmei guay khang ni adih ranvna karamc bam cho twmei nangniw thay kanmei ta laa nii e.

²Mi kiu meic guay ta katiuthaulou khang khatni nzianmei rui bang kariulouna kamanv kungc kanmei lwmsimei nai dat makmei tei meic guay khou nai khang, mi kumna meic thay makmei Ravguangc tuang raeng,[2] Khrista ta thay khang e.

³Ningting khatni thaymei tuang lanv hei kakhou nai e.

⁴Meic nunc tuang lat sa thaymei tei rui nangniw ta guat mak khang ai mi hei sa tuang e.

⁵Ai nangniw pang khou apumc kahak bam mak sini, abumaengc bamna, nangniw maniatna Khrista khou lwmmei khou chalingc dingna ntipna ding bammei ta howna ai neihla e.

⁶Nangniw Khrista Jisu ta kaipouc swna laaloupui thei layna, kakhou lungc bam o.

⁷Nangniw khou nchamlou kanmei tei kumcna, nangniw maan kakhou zangc nthuk key o, nangniw panty kakhou kasiamh thau o, khatni lwmmei khou ntip bam o. Thuanckumei rui padikna bam o.

⁸Khrista khou rui hamhna, maansei tuang rac kadai keymei pary khou rui khatni mbaanv sinmei bumaengc nunc khou rui guangmei tuang gaeng makmei meicguatmei maansei tuang ningting tei rui nangniw ta bangh tisw dat mak khang ramhthay o.

⁹Maansei swmei Khrista khou Ravguangc lwnlung kapwm nai e.

¹⁰Kumna Khrista khou nangniw khang nthuihmei ringcpaan tiilou the. Kamei hei bumaengh tuang dihsinmei khatni ngamvsinmei kaguay tuang kapy e.

¹¹Khrista khou nangniw hei gihruamhmei nunc the. Hei tei maansei baanc rui ruamhmei tuang hamh e; Khrista rui paapc tuang lwnlung tei luak gancloumei tuang gihruamhmei e.

¹²Nangniw duilup khou tei Khrista thei tarou khou lay mbeihlou the, khatni Khrista ta tiringcthauloumeipu Ravguangc tuang pumtan khou lwmloupui paan rui nangniw ta Khrista thei tiringcthaulou dat the.

¹³Nangniw gihruamh makmei khatni twanlyampui mei swna theicna bam khwanmei nangniw ta, ntaw thu Ravguangc rui Khrista thei tiringcthaulou dat the. Ravguangc rui aniu paap guay kuaklou the;

¹⁴aniu tuang pow guay hykaduailoumei, khatni mi lam khou hyloumei latzan latdanv guay tei kazauhna kamei rui thut maanlou kan the, khatni hei tei kros khou hianbinlouna laa ganclou kan the.

¹⁵Khrista rui kros khou bumaengh tuang dihsinmei nunc khatni ngamv sinmei nunc tuang pumtan guay tei luak ganc lana[3] rihngamna kaniw ta kathei khou tilwan pat kanmei tei meic guay khou lyanlou kan the.

¹⁶Hei zaeng rui, tu zangvmei lam khou, nthanmei tingmik lam khou, Bwthanh Ngai lam khou, khatni Sabbathneic lam khou meic gaanv khat na rui sini nangniw ruc khou latzan sw dat mak kan di tho.

¹⁷Mi guay hei thu thei thangc guang punimei maengc de; kaling kiu thu Khrista hei the.

¹⁸Kaniw tuang ndawman khou phaydyng swna, kaniw ta tikauhlouna, kandih chwn khou rui kalam cha makna gaenghswna, ramhkhe swna liw keymei khatni kauh baanchara nunc ta kalummei hei sw nina de twna katiu bampui mei nunc tei rui nangniw ta nkhuaimei tiswlou mak khang sw o.

¹⁹Mi kumhpui mei tei kapy Khrista khou alamv bam makpui mei e. Kalam thu kapumc kapwm tei kapy khou karyan karuc khatni thuriang rui duanc alamvlouna Ravguangc rui kahawpui thei layna daicthau bam tuang e.

²⁰Nangniw Khrista lev theic nchamc the kumna mi mbaanv sinmei bumaengc guay khou rui theic the. Kum e thei nangniw tabui swna mi mbaanv tuang kumcna lungc bam tu cho?

²¹“Mi hei sin riu”, “hei tei mbap riu”, “hei tei kahi riu”, twmei riak guay hei tabui swna ngaek bam tu cho?

²²Mi guay hei kaganv akhat khou tat bam khwanmei, maan kanmei, maansei rui kasiamhmei riak khatni latdyn e.

²³Mi kumhmei riak guay hei kauh baanchara nunc ta kalum nina de twna sa khang, kachangc hamhmei liw keymei khang, khatni meic pumc ta rai khang thu ningting kumcna ninglou e; tiki meic pumc rui kahawmei ta sinriap khang thu hei tei rui gaeng tuang maek ge.