Read Rongmei Naga KOLOSSIAMEI 3 Bible Online

KOLOSSIAMEI 3 - Rongmei Naga bible

KOLOSSIAMEI 3

¹Nangniw Khrista lev ringcthau dat nchamc thena, Khrista Ravguangc tuang baanzat thangc dungc bammei bamv tingkauh thangc naimei puat khou tei nangniw lung lou o.

²Nangniw lungning mi mbaanv tuang puat khou hamhna, tingkauh thangc naimei puat khou tei gutlou o.

³Kalam thu nangniw theic tang the, nangniw tuang ringcpaan hei Khrista lev Ravguangc khou rylou bam the.

⁴Nangniw tuang ringcpaan ling kiu thu Khrista hei the. Kumna kata ndauh patpui nungc kiu, nangniw ta ni ndauh patna kamei hymdaihmei kumcna hymdaic puni.

⁵Hei zaeng rui, nangniw khou nai bammei mbaanv tuang kahawmei guay tei titheic o. Mi kiu: lungcmaanv lungcmowmei, mphuam mphamei, nthah boulahmei, simei ta kahawmei, khatni agaamv agahmei (mi hei ravmaengc kalummei e) mi guay hei e.

⁶Mi guay zaeng rui[4] Ravguangc lungpuam key puni.

⁷Nangniw ta mi guay hei rui zyn bampui ganv khou tei, nangniw mi guay hei taancna lungc bam khwan e.

⁸Tiki ntaw thu, nangniw lungh puamhmei, lungnut naimei, khatni meickai ta karaengmei, mi guay hei ganc nina e. Meickai ta sakasicmei lat khatni nroucpui lat nangniw mwang khou rui pat lak nina e.

⁹Nangniw khat khat khou saraamh riu. Kalam thu nangniw meic raan ta tei katuang kheiliak kazauhna luak ganc kan the,

¹⁰kumna meic thanh tei nulou dat the. Mi hei nangniw kata thay nthan khang, Damcloumeipu Ravguangc rui kata luihmei khou tikathanclou dat bammei meic thanh e.

¹¹Hei zaeng rui, Zentelmei khatni Jihudimei, gihruamhmei khatni gihruamh makmei, daicthaumei zaat khatni daicthau makmei zaat, bangh khatni nyngswmei twmei nai dat mak khe. Kadai thu Khrista hei di the, kumna kamei meic guayna khou bam e.

¹²Nangniw hei Ravguangc tuang mei nunc e; kamei rui nzianmei kapahloumei nunc e. Hei zaeng rui, zianthaymei, zauzianthaymei, niamhmei, lungh zaenghmei khatni khaengvthaymei rui pheybaan piu kumc piu o.

¹³Khat khat ruc khou khaengvlou kary o khatni nangniw thowkumhmei ruc khou pian makmei tuang nai e thei, khat khat ta kuaklou kary o. Poubauhmei rui nangniw ta kuakloumei kumcna, nangniw khat khat ta kuaklou nina e.

¹⁴Mi guay ruc khou rui, nangniw khat khat ta nzian o. Mi hei rui nangniw ta lungh khat swna bang kariulou puni.

¹⁵Khrista tuang chuzaenghmei tei rui nangniw lung ta chaengzay bam kan di tho. Kalam thu nangniw ta pumh akhat khou kaw kariuloumei hei mi kumna chuzaenghna lungh khang e. Kumna thuancku o.

¹⁶Khrista tuang lat nangniw lung khou chingkhiuhna nai nina e. Ningting padikna khat khat ta ncham nchei kary o. Kalumlu, hymthuanhlu khatni nthanmeilu suan o. Nangniw lung khou thuanckuna Ravguangc khou suan o.

¹⁷Taanv khou pw ni, latsav khou pw ni, nangniw samei, taanhmei guay tei Poubauhmei Jisu zanc khou sa o khatni taanc o. Kapaan rui Pu Ravguangc ta thuancku o.

¹⁸Nowthiu, nangniw gaanv bangc khou bam o; mi hei Poubauhmei mei swna sw nipui zi e.

¹⁹Gaanvthiu, nangniw now ta nzian o; kaniw ta bangh ta kumcna sw riu.

²⁰Alaucthiu, ramh lam katana khou nangniw pui pu lat piu o; mi hei Ravguangc rui kahawmei e.

²¹Puthiu, nangniw nac nunc ta tilunghpuamh riu; kaniw lungh tangkhyn pw ramc e.

²²Banghthiu, nangniw kaipouc nunc lat kalam kaguayna khou piu o. Kaniw mikzaw khou tipianlou khang na hamhna, Poubauhmei ta pingna, lungning nthanna taanc o.

²³Maansei khang taanc bam tu e twna ning makna, Poubauhmei khang taanc bam tu kumcna nangniw taanhmei guay lungh gutna taanc o.

²⁴Poubauhmei rui kamei nunc khang chamdaanvlou bammei tei nangniw khang swan swna tii puni. Kalam thu nangniw rui siamruai sw bammei kaipouc ling kiu thu Khrista hei e.

²⁵Nkhuaimei taanhmei nunc tei nkhuaimei taancloumei phy tei laa puni; Ravguangc thu zawkhu zawru zauh mak ge.