Read Rongmei Naga KOLOSSIAMEI 4 Bible Online

KOLOSSIAMEI 4 - Rongmei Naga bible

KOLOSSIAMEI 4

¹Kaipoucthiu, nangniw tuang kaipouc ni tingkauh thangc nai e twmei ningtowna, nangniw bangc nunc khou kaniw khang swlou zipui tuang tei nchumhna swlou o.

²Taek makna huayney bam o; ntak nrakna huayney bam o. Ravguangc ta thuancku bam o.

³Katuang rylou bam khwanmei Khrista chamv hei dinc ndauh khang Ravguangc rui chaeng laanclou khang aniw khang ni huayneylou o. Hei zaeng rui ntaw ata kangkai khou bangclou bam e.

⁴Mi chamv hei dinc nimei athouc hei, chamv hei nthanna dinclouna taanc ngam khang huayneylou o.

⁵Khristian hamhmei nunc hu khou tei nangniw ningtyngna lungc o. Kadouchamei ariwmei tei swmaan riu.

⁶Nangniw latsav tei kaganv kathuicna mangui puypui lat khatni meic nuh gaypui lat sa o; kumna meic kathuicna khou kazipui lat daw thay o.

⁷Poubauhmei taanv taanc nchamcmei, lwmnuhmei siamruaimei, nzianmei chana Tukhika rui ai akumh bam tu cho twmei nangniw khou raclou puni e.

⁸Aniw guayna akumh bam tu cho twmei nangniw khou raclouna, nangniw lung tineihlalou khang ai rui kata nangniw khou ndiulou tuang e.

⁹Nangniw pang khou bammei, lwmnuhmei nzianmei chana Onesima ni kamei lev tat nchamc kan e. Mi khou hei akumh bam tu cho twmei kaguayna kaney rui raclou puni e.

¹⁰Ai lev kang bam nchamcmei Aristarkha khatni Barnabas tanpui nac Mark rui nangniw khang dwan gay kady e. (Kamei nangniw daeng khou guang pw e thei, kata laalou o twna nangniw khou salou kanmei Mark tei e.)

¹¹Justa twna ni kawmei Joshua rui ni nangniw khang dwan gay kady e. Jihudimei lwmloumei pang khou rui ai lev Ravguangc guangcdic khang taanv taanc nchamcmei mi nunc gaanv thumh na hei de. Kumna kaniw rui ata mpeyna nkhavlou the.

¹²Nangniw pang khou kazauhmei, Khrista Jisu bangc Epaphra rui ni dwan gay kady e. Nangniw meicphamei swna ding ngam khang khatni Ravguangc rui ningmei nthanna thay ngam khang, kamei nangniw khang ranvna huayney bam e.

¹³Kamei nangniw khang khatni Laudikiamei lev Hierapolismei khang taanc ranvna bammei tei ai thay e.

¹⁴Nzianmei ravtow amuc Luk khatni Dema rui nangniw khang dwan gay kady e.

¹⁵Laudikia khou bammei chana nunc khou, Numpha khatni kakai khou kariu bammei phwamling khang aniw rui dwan gay kady e.

¹⁶Mi tatdyn hei nangniw pac tang e thei, Laudikiamei phwamling ta tipac o. Kumna Laudikia khou rui tii guang nimei tatdyn tei ni nangniw pac o.

¹⁷“Poubauhmei tuang taanv nang khou tiilou kanmei tei taanc luailou o,” twna Arkhippa khou salou tio.

¹⁸Mi hei abaanc kahak rui hy tuang e: Paul rui dwan gay kady e. Atuang kangriang ti hei amuc rio! Ravguangc zauzian nangniw khou naimei sw diu!