Read Rongmei Naga 1 THESALONIKAMEI 2 Bible Online

1 THESALONIKAMEI 2 - Rongmei Naga bible

1 THESALONIKAMEI 2

¹Chanathiu, aniw nangniw khou guangmei tei nsa taan mak khe twmei nangniw thay bammei tei the.

²Aniw Thessalonika khou gut nimei hu khou tei Philippi kaidai khou aniw ta sw kasicna swzak kasiclou the. Kumna aniw ta thinghmei azuh nai khwan sini, Ravguangc tuang gaychamv tei nangniw khou dinclou khang, Ravguangc rui aniw ta tibauclou the twmei nangniw thay bammei tei the.

³Aniw rui nangniw ta gaychamv laalou khang katiumei tei nangniw ta zay mbiangh khang rouhsina, guatna sa tuang hamh e.

⁴Tiki Ravguangc rui aniw ta lwmna gaychamv tei nsinloupui thei layna aniw sa bam tuang e. Aniw meic nunc ta tipian khang sw tuang hamh e; tiki aniu lung zauhmei Racguangc ta tipian khang de.

⁵Aniw meic nuh gay khang duancna sa tuang hamh e twmei nangniw thay e. Aniw khang gaeng khang sw bam tuang hamh e twmei ni Ravguangc rui thay e.

⁶Nangniw rui pw ni, meic baihmei rui pw ni, maansei rui thuancloumei ta aniw kahaw mak ge.

⁷Hei tei sw nina e twna aniw Khrista tuang latdiutatmei nunc swna sa nuh khwan sini, aniw sa mak ge. Tiki nahpui rui kanac nunc ta makuat kumc, aniw nangniw pang khou lungh niamhna bam kan e.[1]

⁸Aniw nangniw ta nzianpui zaeng rui, nangniw khang Ravguangc tuang Gaychamv tiiloumei na hamhna, aniw panty kahak tiilou the. Aniw nangniw ta heidikamv nzian e.!

⁹Chanathiu, aniw akumhna taanc ruaicna lungc kan tu cho twmei nangniw ningtow bam kan e. Aniw nangniw khang Ravguangc tuang Gaychamv dinh khang nangniw khang puatcrith tiilou nii makpui zaeng rui, aniw zingbangc kalaanv taanv taancna lungc kan e.

¹⁰Lwmloumei nangniw khou aniw rui nkhuailou kanmei khatni nchumh makmei tuang swlou kanmei maek ge twmei nangniw ni, Ravguangc ni thay e.

¹¹Pu akhat rui kanac nunc khang swloumei kumcna, aniw rui nangniw kathuic khang swlou kanmei tei nangniw thay e.

¹²Aniw rui nangniw ta katiulou kan e, lungh tithaulou kan e, khatni katuang guangcdic khatni hymdaihmei laa khang nangniw ta kawloumei Racguangc ta tipianna lungh khang nangniw ta katiu ranvna salou kan e.

¹³Aniw Ravguangc ta thuancku bammei lam akhat dat rui, nangniw aniw khou rui Ravguangc lat chupui ganv khou tei, maansei lat re twna laa makna, Ravguangc lat re twna laalou the. Kalingna mi hei lwmloumei nangniw khou taanv taanclou bammei Racguangc lat re.

¹⁴Chanathiu, Judia kandih khou bammei Ravguangc tuang phwamling mei nunc, Khrista Jisu mei nunc khou pat kanmei kahak tei nangniw khou ni pat bammei tuang e. Kaniw Jihudimei baanc bangc khou ryanramei ariw kanmei kumcna, nangniw ni nangniw zaat makaamv baanc khou ryanramei ariw the.

¹⁵Jihudimei nunc hei rui Poubauhmei Jisu ta khatni muhzwng nunc ta swluai the, kumna aniw ta ni sw kasic khang sw the. Ravguangc rui ni, maansei rui ni zauczihpui taanv kaniw taanc the.

¹⁶Zentelmei nunc khou ni kaniw khang ringhbamv phungc guang nimei chamv tei dinh mak khang, aniw ta thingh khang kaniw sw the. Mi kumna kaniw paap guay tei lou padik mak saanv kanganv tanghmei paap taanc the. Kumna nkhamh khou kaniw khou Ravguangc lungpuam keylou the.

¹⁷Chanathiu, aniu lungning khou ntamv mak sini, pumh khou matak khat ntamvna bammei khou hei, aniw nangniw ta ningna, nangniw zaw how dat niina karamc ranv sih bam e.

¹⁸Aniw nangniw daeng khou guang dat niina, Paul ai karamc dat dat the, tiki Seitaan rui aniw chaeng thingc bam e.

¹⁹Aniw khang rigwnmei, neihlamei, khatni Poubauhmei Jisu Khrista guang pwkhou kahu khou zawkauhmei pyrun sw nimei kiu nangniw hei the.

²⁰Aniw zaw tikauhlou nimei khatni aniw ta tineihlalou nimei kiu nangniw hei the.