Read Rongmei Naga 1 THESALONIKAMEI 3 Bible Online

1 THESALONIKAMEI 3 - Rongmei Naga bible

1 THESALONIKAMEI 3

¹Nkhamh khou aniw khaengv ngam mak khena, aney rana Athen khou bam duc lana,

²Khrista tuang gaychamv dinhmei khou Ravguangc tuang siamruai sw nchamcmei chana Timothi ta ndiuloumei gay the twna aniw ning the. Kumna nangniw ta lwmmei khou titanclou khang khatni katiulou khang kata ndiulou kan the.

³Mi kiu, mi rairiumei zaeng khou tei rui nangniw gaanv khat na sini hanc dat mak khang e. Mi kumhmei rairiumei hei ni aniu khang Ravguangc rui ningmei akhat de twmei nangniw thay e.

⁴Aniu rairiumei ariw puni de twna aniw nangniw daeng khou bammei ganv khou tei salou kanmei tei, kachangcna guang tangclou the twmei nangniw thay e.

⁵Nthiammeipu rui nangniw ta nthiam bowna, aniw lakh nsa taan pw ramc e twna lungh geicna, ai reih reina bam ngam mak khena, nangniw ramlum akumh bam tu cho twmei thay niina Timothi ta ndiulou kanmei tuang e.

⁶Ntaw Timothi nangniw khou rui guang datna, nangniw lwmna khatni nzianna bam de twmei gaymei chamv phungc guang the, khatni nangniw aniw ta nzianna ning bam de, kumna aniw nangniw ta how dat niimei kumcna, nangniw ni aniw ta how dat niina bam e twna kamei rui raclou the.

⁷Chanathiu, aniw ryanramei khatni katuakcmei ariw bam khou nangniw rui aniw ta tineihlalou e. Nangniw lwmmei khou ntipna bammei tei rui aniw ta tineihlalou e.

⁸Nangniw Poubauhmei khou ntipna bam e thei, aniw chaengc ringc bam puni.

⁹Ntaw nangniw zaeng rui Ravguangc ta thuancku e. Nangniw zaeng rui kahu khou neihlana bammei khang rui sa dat khang thay makna neihla e.

¹⁰Aniw nangniw zaw how datna nangniw khang lwmmei khou kage naimei tei ti-nthuihlou khang, zingbangc kalaanv Ravguangc khou aniu lungsyng khou rui huayney bam e.

¹¹Aniw nangniw daeng khou guang dat khang aniu Pu Ravguangc khatni aniu Poubauhmei Jisu rui aniw khang chaeng laanclou pw diu o!

¹²Aniw rui nangniw ta nzianmei kumcna nangniw ni khat khat ta khatni meic guayna ta nzian khang Ravguangc rui nangniw khou nzianmei ti-mbu thaulou pw diu.

¹³Mi kumna, aniu Poubauhmei Jisu kamei guay[2] lev guang pwkhou, aniu Pu Ravguangc hu khou nangniw nthuihmei khatni nthanmei sw khang kamei rui nangniw khou pumtan tiilou khang e.