Read Rongmei Naga 1 THESALONIKAMEI 5 Bible Online

1 THESALONIKAMEI 5 - Rongmei Naga bible

1 THESALONIKAMEI 5

¹Chanathiu, kakwm kaganv lam khou thu nangniw khou hy dat khang kage maek khe.

²Kalam thu Poubauhmei guang nimei hei kaihouhmei zingbangc guang kumc guang puni twmei nangniw thay the.

³Meic nunc rui “Meic guayna nchu nrina bam de, ramhkhat sini sw ni tu hamh e,” twna sa bammei ganv khou tei thay mak liangna swkamut kamaimei kaniw khou meicpui narui thau kumc guang puni. Kaniw duak dat ngam lak khe.

⁴Tiki chanathiu, mi tingmik kiu nangniw khang thu thay mak liangna kaihouhmei guang kumc patlou lak ge; nangniw thu zinghmei khou bam mak ge.

⁵Nangniw thu gaanhmei nac nunc de; kalaanv nac nunc de. Aniu thu zingbangc mei hamh e; zinghmei mei hamh e.

⁶Hei zaeng rui, meic baihmei nunc kumcna aniu zipri bam lak nina e. Aniu rakna, ntak nrakna bam nina e.

⁷Zipmei nunc tei zingbangc zip tuang de; zouh mbamei nunc tei ni zingbangc mba tuang de.

⁸Tiki aniu thu kalaanv tuang mei nunc de. Kumna aniu thu ntak nrakna bam nina de. Lwmmei khatni nzianmei rui ngaengvthuapc swna, khatni kanloumei ta rigwnmei tei rui rihpyrun swna piuna bam nina e.

⁹Ravguangc rui aniu ta kalungpuam keylou nimei nunc khang kapahlou mak ge; tiki aniu Poubauhmei Jisu Khrista paan rui ringhbamv laa khang kapahlou tuang de.

¹⁰Kamei guang khou, aniu theic bam pw ni, ringc bam pw ni, kamei lev lungc nchamc khang kamei aniu khang theiclou the.

¹¹Hei zaeng rui, nangniw sw bammei tei kumcna khat khat ta katiu thau kary o khatni kasiamh thau kary o.

¹²Chanathiu, nangniw pang khou taanv taancloumei, Poubauhmei khou nangniw ta chaengzayloumei khatni nchamloumei nunc ta tei chakhwang champouh sw khang aniw rui nangniw khou zaenghuay e.

¹³Kaniw tuang taanv zaeng khang tei rui kaniw ta nzianna nkunna chakhwang champouh swlou o. Nangniw latzan gayna lungc bam o.

¹⁴Chanathiu, aniw rui nangniw khou zaenghuay e: aliauhmei nunc ta mphutlou o; kalung nnaumei nunc ta katiuthaulou o; suanmei nunc ta nkhavlou o, meic kathuicna khou khaengvlou o.

¹⁵Simei khang simei khangh riu; nangniw khat khat khou khatni meic guayna khou gaymei taanclou khang karamc tanh tan bam o.

¹⁶Neihla tanh tan bam o.

¹⁷Taek makna huayney bam o.

¹⁸Si khou ni, gay khou ni thuancku bam o. Nangniw Khrista Jisu khou bammei panty khou hei tei nangniw khang Ravguangc rui kahawmei e

¹⁹Bumaengh Nthanmei ta swmit riu.

²⁰Ravmundinhmei ta ramh sak mak tuang sw riu.

²¹Tiki kaguayna tei simei gaymei zauc o. Gaymei tei laalou o;

²²kumna simei guay tei ganc o.

²³Nangniw pumc, bumaengh, du kapwm hei Khrista guang pwkhou nthuihmei, khanvbamv maekmei sw khang chuzaenghmei tiiloumei Racguangc rui nangniw ta sw nthanlou pw diu.

²⁴Nangniw ta kawloumeipu hei thu suai makmeipu e; kamei rui mi hei taanclou puni.

²⁵Chanathiu, aniw khang ni huayneylou o.

²⁶Chana punav nzianmei tuang lyanna khat khat khang dwan gay kady kary o.

²⁷Poubauhmei zanc khou ai rui nangniw khou sa tuang e: mi tatdyn hei chana punav guay khou pac o.

²⁸Aniu Poubauhmei Jisu Khrista tuang zauzian rui nangniw ta bam nduanghlou diu.