Read Rongmei Naga JOSHUA 1 Bible Online

JOSHUA 1 - Rongmei Naga bible

JOSHUA 1

¹RINGHPOUC bangc, Mousi theic kanmei tangv, Nun nac mpouh, Mousi ta nkhav bammeipu Joshua khou RINGHPOUC rui sa the,

²“Abangc Mousi theic kan the. Nang khatni Isaraelmei guay hei thau tho, kumna mi Jordan duithuak hei kaanpatna ai rui nangniw khang tiiloumei kandic khou tei gut tho.

³Ai rui Mousi khou nrianhlou kanmei kumcna, nangniw phay baclou pw nimei kandic kapwm hei ai rui amei nunc nangniw khang tiilou kan the.

⁴Nangniw tuang ramvrei hei dihba biak thangc sypung ramv khou rui dihpy biak thangc Lebanon chyng nganv, neihpat thangc Euphratis duithuak nganv, Hittimei ramv kapwm mi khou tei rui neihkey biak thangc Mediterranean duipui neihkey kanmei ta phaengctowmei nganv sw puni.

⁵He Joshua, nang ringc bam saanv meic gaanv khat na rui sini nang ta ngam dat lak khe. Ai rui Mousi ta nduanghloumei kumc nang ta ni nduanghlou puni. Kaganv kathuic ai nang ta nduanghlou puni; ai nang ta ganclou zat lak ge.

⁶Lungdyng ntipbo khatni bauc o, kalam thu nang rui nduanghna amei nunc hei ai rui kaniw pupouc khou tii khang nrianhloumei kandic hei guang laa puni.

⁷Nang lung ding ntip bo khatni bauc o, kalam thu abangc Mousi rui nang khou tiiloumei Riakdanv kapwm tei piu nthuih o. Hei tei kalangv akhat na ta sini ntaamvloumei tuang sw ri o, kum pwkhou nang rui tatpui bamv kathuic zaw kauh puni.

⁸Nang rui kalummei ganv khou mi Riakdanv buk hei pac tanh tan nina e, mi khou tei hyloumei guay tei nthuihna piu khang hei tei zingbangc kalaanv kathai o kum e thei nang lungc thau puni khatni karamhmei guay guang tangc puni.

⁹Nang ta lungning ding ntipbo khatni bauc o twna ai rui latdanv tii kanmei tei ningtow o. Ping riu khatni lung tangkhyn rio, kalam thu RINGHPOUC nang Racguangc ai rui nang tatloumei bamv kathuic khou nduanghlou puni.”

¹⁰Mi tangv Joshua rui taanvpy sinmei nunc khou tei kumna sa the,

¹¹“Zaeng neihthumh puinungc nangniw Jordan duithuak kaanpatna RINGHPOUC Ravguangc rui nangniw khang tiiloumei kandic tei gut laa puni the, kum thena mi khang tei taektw chamdaanv tho twna zypui kai guay khou tatruanlouna meic nunc khou sa ti tho.”

¹²Joshua rui Reuben khatni Gad kaikhwangmei khatni Manase kaikhwang kapaek khou kumna sa the,

¹³“RINGHPOUC nangniw Racguangc rui nangniw lungc bam khang mi Jordan tuang neihpat biak kandic hei tii puni twna RINGHPOUC bangc Mousi rui sa kanmei tei ningtow o.

¹⁴Nangniw nownac nunc khatni nangniw tuang khouringc khounac thu mi khou hei lou duc tho, tiki nangniw rihphyan guay thu rihpwan piuna, nangniw chana punav swmei nunc hu khou Jordan kaanpat reyna kaniw ta nkhavlou nina the.

¹⁵RINGHPOUC nangniw Racguangc rui kaniw khang tiiloumei Jordan neihkey kandic khou tei kaniw gut tangc kan mak saanv kaniw ta nkhavlou nina the. RINGHPOUC rui Isaraelmei khwang guay ta tei giuga makna khou tei tilungclou kan pwkhou, nangniw guang datna RINGHPOUC bangc Mousi rui nangniw khang tiiloumei Jordan neihpat ramv nangniw kandic khou hei lungc dat ro.”

¹⁶Kaniw rui Joshua khou kumna daw the, “Nang rui samei guay aniw taanc ni khatni nang rui thoucloumei khou aniw tat ni.

¹⁷Aniw rui Mousi lat piu tanh tan guangmei kumcna aniw nang lat ni piu ni khatni Mousi ta nduanghloumei kumcna RINGHPOUC nang Racguangc rui nang ta nduanghlou diu!

¹⁸Thowkumhmei rui nang latdanv khou latsw lat nai pw e thei khatni lat liammei nai e thei mi kumhmei ta tei swluai puni, kadai kiu thu nang lungdyng ntipbo khatni bauc o twmei hei de.”