Read Rongmei Naga JOSHUA 11 Bible Online

JOSHUA 11 - Rongmei Naga bible

JOSHUA 11

¹Hazormei guangc Jabin rui Isaraelmei baengtanc rihliangcna guangmei chamv chu pwkhou kamei rui Madonmei guangc Jobab, Shimronmei guangc khou khatni Akshapmei guangc khou rih sw khang kabaipui lat tii the.

²Kamei rui dihpy chyngramv khou guangh nunc, Galili dihba khou Jordan nzaengc khou bammei guangc nunc chyngphay khou khatni Dor kaidai daeng khou duipui tin khou bammei guangc nunc ta kabai the.

³Kamei rui Jordan neihpat neihkey khou lungc bammei Kanaanmei, Amormei, Hittimei, Perizimei, chyngramv khou lungc bammei Jebusimei, khatni Mizpa kandic khou Hermon chyngphay khou lungc bammei Hivimei hei guay ti hei ni kabai the.

⁴Kaniw rui phay ricmei, takuanh gari ricmei, takuanh mpeyna nduanghna guang the. Duipui paengc khou naimei syniang zu rihmei nunc tei guang the.

⁵Mi guangc nunc tei Isaraelmei ta adow khang guang kariuna Mirom duithuak khou zypui swna bam the.

⁶RINGHPOUC rui Joshua khou sa e, “Kaniw ta ping riu. Nthuanh kiu hei kumhmei ganv khou hei ai rui kaniw kaguayna ta swluai puni the. Nangniw rui kaniw tuang takuanh nunc kappai ram o, khatni kaniw tuang takuanh gari guay tei mai ntei o.”

⁷Kumna Joshua rui katuang ricmei kapwm ta nduanghna thay mak daek khou Mirom duithuak khou adow the.

⁸RINGHPOUC rui Isaraelmei nunc baanc khou kaniw ta tiilou the. Isaraelmei rui kaniw ta adow the kumna dihpy thangc Misrephot Maim khatni Sidon nganv khatni neihpat thangc Mizpa nzaengc nganv nthau tangclou the. Zauczihmei nunc ta tei dowluaiparylou mak saanv adow the.

⁹RINGHPOUC rui samei theilayna kaniw rui kaniw tuang takuanh nunc tei kakap ram the khatni kaniw tuang takuanh gari guay tei mai ntei the.

¹⁰Joshua rui Hazor kaidai khou hanc guang datna rih key the khatni kaidai tei nuam laa the kumna guangh ta tei dowluai the. Kalam thu kahu nungc Hazor kaidai rui guanghdic kaguay ruc khou tei kapy sw khwan e.

¹¹Mi kaidai khou tei meic gaanv khat na ta sini nsaekclou makna dowluai ngam the; kumna mi kaidai tei mai thoulou the.

¹²Joshua rui mi kaidai guay ta tei laa the. RINGHPOUC bangc Mousi rui latdanv tiimei kumcna mi guangc nunc khatni meic kaguayna ta nsaekc makna dowluai the.

¹³Joshua rui Hazor kaidai mai ntei kanmei hamhna chyngbut ruc khou swloumei kaidai akhat na ta sini Isaraelmei nunc rui mai ntei kan mak ge.

¹⁴Mi kaidai guay khou naimei kamanv kunghmei puat khatni khouringh khounah kaguayna Isaraelmei nunc rui laa the. Tiki maansei ta thu daeklou makna meic kaguayna ta dowluai the.

¹⁵Mi latdanv hei RINGHPOUC rui kabangc Mousi khou latdanv tiilou the, hei tei kumcna Mousi rui Joshua khou kadylou the. RINGHPOUC rui Mousi khou latdanv swna tiimei guay tei Joshua rui nthuihna piu the.

¹⁶Joshua rui mi kandic kapwm tei laa the chyngramv khatni chyngphay ramv, dihpy khatni dihba ramv, Gosen ramv kaguay khatni mi tuang dihba thangc phuimei ramv, khatni Jordan nzaengc kaguay tei laa the.

¹⁷Joshua rui Halak chyng khou rui Seir biak thangc Hermon chyng khum khou naimei Lebanon nzaengc Baal Gad nganv laagut the kumna guangh guay ta nymna dowluai ngam the.

¹⁸Joshua lev mi ramv tuang guangc nunc tei kaganv tingsaengc sihna rih sw bam khwan e.

¹⁹Isaraelmei lev latdyng swmei thu Hivimei tuang kaidai Gibeonmei na khwan e. Kaidai baihmei guay ta thu Isaraelmei rui kuakna laa ngam khwan e.

²⁰Kaniw ta tei zauzian maekna swluai mutsutlou diu khang rui RINGHPOUC rui kaniw lung titanclouna Isaraelmei ta ti-akhangv the.

²¹Hebron, Dabir, Anab khatni Juda khatni Isaraelmei chyng khou lungc bammei nunc liantuangh Anakimmei zaat ta ni Joshua rui guangna sw kamut kamailou the. Joshua rui kaniw ta khatni kaniw tuang kaidai guay ta swmaan mutsutlou kan the.

²²Gaza, Gat, khatni Asdod kaidai khou lungc bammei meic gaanvsaekcna ta hamhna Anakimmei zaat akhat na sini mi kandic khou tei nsaekclou mak khe.

²³RINGHPOUC rui Mousi khou latdanv tiimei kumcna Joshua rui mi kandic kapwm tei laa the. Joshua rui ramv tei Isaraelmei kaikhwang kathuicna khang kadam kadam swna nzanhlou the. Mi tangv tei Isaraelmei nunc tei suc-rih luaina nthaekc kan the.