Read Rongmei Naga JOSHUA 13 Bible Online

JOSHUA 13 - Rongmei Naga bible

JOSHUA 13

¹Ntaw thu Joshua tei gaanvthaih sih the. RINGHPOUC rui kakhou heikumna sa the, “Nang hei karahpouc di the, tiki laa nimei kandic thu geicna nai di he:

²mi kiu thu Philistinmei ramv guay khatni Geshurmei ramv kaguay,

³Izip tuang ramvrei Shihor duithuak khou rui Kanaanmei ramv dihpy Ekron nganv Philistinmei kaipouc panguh tuang ramv; Gaza, Asdod, Askelon, Gat khatni Ekron khatni Avvimmei tuang guay,

⁴Kanaanmei kandic kaguay khatni Meara (Mi hei Sidonmei ramv e), Amormei ramvrei khou Aphek kaidai nganv nai he.

⁵Gebalmei ramv khatni Lebanon ramv Baalgad tuang neihpat biak Hermon chyngbut khum Lebo Hamat nganv laagut khang nai di he.

⁶Lebanon khou rui Misrephot Maim nganv chyngramv khou lungc bammei nunc Sidonmei kaguayna ta Isaraelmei mav khou rui ai rui alay ganclou puni, ai rui nang khou latdanv tiilou kanmei kumcna mi ramv tei Isaraelmei nunc, khang nzanhlou nina e.

⁷Hei zaeng rui ntaw thu Isaraelmei kaikhwang chakiu khou khatni Manase kaikhwang kapaek khou tei kaniw ramv sw bam khang nzanhlou o.”

⁸RINGHPOUC bangc Mousi rui Jordan neihpat ramv hei Reuben, Gad khatni Manase kaikhwang baihmei paek akhat khang nzanhlou kan the, kumna kaniw rui hei tei sin kan the.

⁹Kaniw tuang ramv hei dihba neihpat biak thangc rui Arnon nzaengc tin khou naimei Aroer kaidai nganv e. Hei khou tei Arnon nzaengc chung khou naimei kaidai tei lev dihba thangc Medeba kaidai khou rui Dibon kaidai nganv khou naimei chyngbut nzaengc ramv tei kazauh the.

¹⁰Amormei guangc Sihon rui, Heshbon kaidai khou rui guanghtuna sinloumei kaidai guayna khatni Amonmei ramvrei nganv pat the.

¹¹Mi khou tei Gilead, Geshur lev Maaka, Hermon Chyng kaguay, Bashan ramv kapwm Saleka nganvna kazauh the.

¹²Mi khou tei Rephaimmei zaat guangh Og, Ashtarot kaidai lev Edrei kaidai sinmeipu tuang guangcdic ni kazauh the. Mousi rui mi nunc ta ngamlouna alay gancloumei tuang the.

¹³Tiki Isaraelmei nunc rui Geshur lev Maaka khou bammei nunc ta thu alay ganh mak ge, kaniw Isarael kandic khou aseic nganv lungc bam e.

¹⁴Mousi rui Levimei kaikhwang khang thu ramv akhat na sini nzanhlou mak ge. Kalam thu kaniw tuang dam thu RINGHPOUC Isarael Ravguangc tuang ravchapaeng khou rawna khaengmei zanc tei kadam swna laa nina e twna RINGHPOUC rui Mousi khou dinclou khwan e.

¹⁵Mousi rui ramv langv akhat Reuben kaikhwang khang kaniw tuang swna bam khang tiilou the.

¹⁶Kaniw tuang ramv hei Arnon nzaengc tin khou naimei Aroer kaidai nganv khatni mi nzaengc chung khou naimei kaidai tei nganv, khatni Medeba kaidai daeng khou nai nkuay bammei chyng nzaengc ramv kapwm tei e.

¹⁷Mi khou tei Heshbon kaidai khatni mi tuang chyng nzaengc ramv khou naimei kaidai guay: Dibon, Bamot, Baal, Beth Baalmeon,

¹⁸Jahaz, Kedemot, Mephaat,

¹⁹Kiriathaim, Sibma, chyng tuang nzaengc khou naimei Zeret Shahar,

²⁰Bethpeor, Pisga Chyng khum khatni Beth Jeshimot hei guay hei kazauh the.

²¹Chyngbut nzaengc khou naimei kaidai guay khatni Amormei guangc Sihon Heshbon kaidai khou rui dih sinloumeipu tuang guanghdic kaguayna kazauh the. Mousi rui mi guangc ta tei khatni Midianmei guangc nunc: Evi, Rekem, Zur, Hur, khatni Reba mi guay ti hei rih ngamlou the.

²²Isaraelmei nunc rui swluaimei pang khou Beor nac mpouh Balaam, mang amuc sw bammeipu ni kazauh the.

²³Reuben kaikhwang tuang neihkey ramvrei hei thu Jordan duithuak hei the. Mi guay hei Reuben kaikhwangmei kaikhunh nunc khang kaniw tuang sw khang tiiloumei kaidai khatni namvdai guay the.

²⁴Mousi rui ramv langv akhat Gad kaikhwangmei khang ni kaniw tuang sw bam khang nzanhlou the.

²⁵Kaniw ramv tei Jazer kaidai khatni Gilead ramv khou naimei kaidai guay kazauh the.

²⁶Kaniw kaidai tei Heshbon kaidai khou rui Ramat Mizpa lev Betonim kaidai nganv, Mahanaim kaidai khou rui Lodebar ramvrei nganv e.

²⁷Jordan nzaengc khou Beth Haram, Bethnimra, Sukkot, khatni Zaphon kaidai guay Heshbonmei guangc Sihon tuang guanghdic nsaekcloumei guay tei kazauh the. Kaniw tuang neihkey ramvrei rui Jordan duithuak Galili Zeiclat nganv e.

²⁸Mi kaidai guay hei Gad kaikhwangmei khang tiiloumei kaidai guay e.

²⁹Mousi rui ramv kalangv akhat Manase kaikhwang kapaek akhat khang kaniw tuang swna bam khang tiilou the.

³⁰Kaniw ramv hei Mahanaim khou rui Og rui guanghtuloumei Bashan ramv kapwm khatni Jair rui kaganv khat khou laalou khwanmei Bashan khou naimei namv kang 60 tei ni kazauh the.

³¹Mi khou tei Gilead ramv kapaek, Bashan kandic khou guangh Og tuang kaidai nei Ashtarot lev Edrei ni kazauh the. Mi ramv guay hei Manase nac mpouh Makir kikta kapaek akhat khang tiilou the.

³²Mousi Moab tuang nzaengc khou bammei douc rui Jeriko khatni Jordan tuang neihpat ramv guay heikumna nzanhlou the.

³³Tiki Mousi rui ramv akhat na sini Levi kaikhwang khang nzanhlou mak ge. Kaniw tuang dam thu RINGHPOUC Isaraelmei Racguangc khang katloumei khaengmei puat tei the twna kaniw khou kadylou the.