Read Rongmei Naga JOSHUA 14 Bible Online

JOSHUA 14 - Rongmei Naga bible

JOSHUA 14

¹Amuh Eleazar, Joshua khatni Isaraelmei kaikhwang guay tuang gaanvthaih nunc rui Jordan neihkey khou naimei Kanaan ramv tei Isaraelmei nunc khang heikumna nzanhlou the.

²RINGHPOUC rui Mousi khou saloumei kumcna Jordan neihkey thangc bammei kaikhwang chakiu khatni kaikhwang akhat tuang kapaek ramv tei kaikhwang kathuic rui san zaucna laa the.

³Mousi rui kaikhwang kanei khang khatni kaikhwang akhat tuang kapaek khang Jordan tuang neihpat biak ramv tei nzanhlou the tiki Levimei nunc khang thu ramv nzanhlou mak khe.

⁴Josep kikta ta kaikhwang kanei khang twmei thu Manase khatni Ephraim kaikhwang khang twna damclou the. Levimei nunc khang thu ramv kabamv akhat na sini nzanhlou mak khe kaniw rui lungc bam khang kaidai asaekc khatni kaniw tuang khouringh byn bamv khang ramvpuk asaekcna tiilou the.

⁵RINGHPOUC rui Mousi khou saloumei thei suicna Isaraelmei nunc rui mi ramv tei nzanh the.

⁶Gilgal zypui khou bammei douc, zaeng neih khat Juda kaikhwangmei nunc Joshua khou guangna kaniw pang khou Kaleb twna kawmeipu, Kenizzi puinacmei Jephunne rui puanhmeipu rui kumna sa the, “Kades Barnea khou bammei douc aney lam khou RINGHPOUC rui Ravguangcmei Mousi khou sa kanmei tei nang thay e.

⁷Mi kandic gwan hei rumh khang RINGHPOUC bangc Mousi rui Kades Barnea khou rui ata thoucloumei douc tei atingkwm 40 the. Ai rui kakhou lat ling guang dinclou khwan e.

⁸Ai lev tat nchamcmei nunc tei rui thu meic nunc ta sa pinglou khwan e. Tiki ai thu RINGHPOUC khou lwmloupary khwan e.

⁹Heikum tipui zaeng rui, aphay baclou kanmei kandic tei ai khatni anac nunc khang RINGHPOUC rui tiilou puni twna Mousi rui akhou latdyng swlou the.

¹⁰Tiki zauclo, RINGHPOUC rui Mousi khou kumna latdyng swlou kanmei tangv tei ntaw thu tingkwm 45 tangc the. Hei tei ai sypungramv khou tatna bammei douc the, kumna RINGHPOUC kamei rui latdyng swloumei theilayna, ntaw nganvna ata tiringclou bam e. Ata zauc tho! Ai hei atingkwm 85 tangc the.

¹¹Tiki Mousi rui ata thouc patmei douc tei kumcna tanc bam di he. Ai rih ni tat ngam diw he, tabui tabui ni sw ngam diw he.

¹²Kumhpui zaeng rui mi nungc tei RINGHPOUC rui akhang ni nrianhloumei chyngramv tei ntaw thu tiilou tho. Kalam thu Anakimmei zaat kaniw tuang kaidai heidi daihmei tei pih raeng piangh piangna bammei ta RINGHPOUC rui nkhavlou e thei RINGHPOUC kamei rui samei kumcna ai rui kaniw ta alay ganc ngam puni twna samei tei nang chu kan e”.

¹³Joshua rui Kaleb khang suaihiam neylouna Hebron kaidai tei kakhang tiilou the.

¹⁴Hebron hei ntaw nganvna Kenizzimeipu Jephunne nac mpouh Kaleb kikta tuang swna bam e. Mi hei kamei RINGHPOUC, Isaraelmei Racguangc ta lwm kak kakna lwmmei paan rui e.

¹⁵Mi hu khou thu Hebron hei Arba tuang kaidai twna kaw bam khwan e. Arba twmeipu hei Anakimmei khou daic liangmeipu e. Ntaw thu mi kandic tei rih bamv khou rui nchu-nzaenghna bam the.