Read Rongmei Naga JOSHUA 18 Bible Online

JOSHUA 18 - Rongmei Naga bible

JOSHUA 18

¹Hei tangv tei, Isaraelmei meic kaguayna Shilo khou guang kaduaina RINGHPOUC tuang pheykai tei katingh thau the.

²Khoutei kadam laatow makmei Isaraelmei kaikhwang chanei nai he.

³Joshua rui Isaraelmei nunc khou sa the, “RINGHPOUC nangniw pupouc Racguangc rui nangniw khang tiiloumei ramv tei gut laa makna asaanh nkhwan bam ni hena cho?

⁴Kaikhwang akhat khat khou rui meic gaanv thumh gaanv thumh kadah patna adaeng khou nduangh guang tho, kaniw rui ramv guay tei guan lana mi khou tei ariwmei ramvguan thiak guay tei ni nthan thiakh thiakna adaeng khou phungc guang dat diu khang ai rui kaniw ta ndiu puni.

⁵Ramv kapwm khou tei rui kadam chanei khang damcpat nina e. Juda kiktamei nunc thu dihba thangc bam tanh tan khang e. Kumna Josep kiktamei rui dihpy biak thangc bam tanh tan khang e.

⁶Ramv tei kalangv chanei khang damcloumei khou tei hei nunc tuang lam chanei tei hy lana akhou phungc guangna lyan nina e, mi khou tei ai rui RINGHPOUC aniu Racguangc mav khou nangniw san zauc puni the.

⁷Tiki Levimei nunc thu ramv tei laa khang kaniw dam maek ge. Kaniw dam thu amuh nunc swna RINGHPOUC tuang siamruai swmei tei the. Gad, Reuben, khatni neihpat thangc bammei Manase kaikhwang kapaek thu RINGHPOUC bangc Mousi rui kaniw khang tiiloumei Jordan neihpat ramv tei laa kan the.”

⁸Kadah patloumei nunc khou tei Joshua rui sa the, “Mi ramv kapwm tei ruan likna mi ramv tei hy keylou tho. Kumna nangniw rui hyloumei tei akhou phungc guang dat tho, kum e thei mi ramv tei nangniw khang akumhna nzanh nina cho twmei RINGHPOUC mav khou san zauc puni the.”

⁹Mi nunc tei ramv kapwm khou tei tatna mi ramv tei kalangv chanei khang tamc pat the. Kumna kalangv akhat akhat khou naimei kaidai guay zanc tei ni kaniw rui hy pat the. Kum lana kaniw Shilo khou Joshua daeng khou hanc guang dat the.

¹⁰Joshua rui RINGHPOUC chwn thanvna san zauc lana Isaraelmei kaikhwang chanei khang tei ramv tei nzanhlou the.

¹¹Benjamin kaikhwangmei nunc tei puinac puinac theilayna san zauc pat the, kumna kaniw khang ni Juda kaikhwang lev Josep kaikhwang kanei kak khou naimei ramv tei nzanhlou the.

¹²Kaniw tuang dihpy ramvrei hei neihpat thangc Jordan baek khou rui kahouhna Jeriko tuang dihpy biak suic nganghna neihkey biak karih keyna chyngramv kaan keyna Bethaven tuang tazikramv khou keylou the.

¹³Mi khou tei rui Luz kaidai (Bethel twna ni kaw e) tuang dihba chyng khum kaan patna Atarot Addar khou keylou the, kumna kabangc mei Beth Horon kaidai tuang dihba chyng khou keylou the.

¹⁴Mi chingc tuang neihkey biak khou tei rui dihba biak karih key datna Kiriath Baal, Kiriath Jearim twna kawmei, Juda tuang kaidai khou keylou the. Mi hei neihkey ramvrei the.

¹⁵Dihba biak ramvrei hei Kiriath Jearim tin khou rui kahouhna Nephtoa tuang duipuakkai khou keylou the.

¹⁶Mi tangv tei Rephaim nzaengc tuang dihpy thangc naimei chyng tuang phayba, Hinnom nzaengc kahouhmei tin khou tei keylou the. Hei khou tei rui Hinnom nzaengc sow padak keyna dihba biak karih keyna Jerusalem dihba biak khou naimei luanghtwan khou keylouna khou tei rui Enrogel duipuakkai khou patlou the.

¹⁷Mi khoutei rui dihpy biak karih ngangh datna Enshemes khou nganghlou the. Khoutei rui Gelilot khou, Adummim chaeng phaengcrwnmei khou tei nganghlou the. Hei tangv tei Reuben nac mpouh Bohan tuang taukhuan khou keylou the,

¹⁸kumna Jordan nzaengc phaengc arwnmei luanghpy khou patlou the. Hei khou tei rui nzaengc thangc key datna,

¹⁹Beth Hogla luangc tuang dihpy khou kaan patna, Theihmei duipui khou Jordan duithuak key tuanlou rap twmei mun khou tei nganvlou the. Mi hei dihba biak ramvrei the.

²⁰Jordan rui neihpat ramvrei the. Mi hei Benjamin kaikhwang khang tiiloumei ramv tuang ramvrei the.

²¹Benjamin kaikhwang khang tiiloumei kaidai guay thu Jeriko, Beth Hogla, Emek Keziz,

²²Beth Araba, Zemaraim, Bethel,

²³Avvim, Para, Ophra,

²⁴Kepharammoni, Ophni, khatni Geba, mi kaidai 12 khatni kadaeng khou naimei namv guay the.

²⁵Heina hamhna Gibeon, Rama, Beerot,

²⁶Mizpa Kephira, Moza,

²⁷Rekem, Irpeel Tarala,

²⁸Zela Haelep, Jebus (hamh e thei Jerusalem), Gibea, khatni Kiriath Jearim; mi kaidai 14 khatni mi daeng khou naimei namvdai guay lev twna kaniw tuang the. Benjamin kaikhwang khang tiiloumei ramv kiu mi hei the.