Read Rongmei Naga JOSHUA 2 Bible Online

JOSHUA 2 - Rongmei Naga bible

JOSHUA 2

¹Nun nac mpouh Joshua rui gwanrummei gaanv nei Shittim zypui khou rui nkamhna Kanaan kandic, nthukna Jeriko kaidai gwan zauc tat ro twna thouclou the. Kaney mi kaidai khou tei guangna kapumc zuanhmeipui Rahab twna kawmei kai khou bangvlou the.

²Isaraelmei gaanvsaekc mi kandic gwantei rumh khang mi nungc zingbangc tei guang e twmei Jerikomei guangc rui chu lana

³kamei rui Rahab khou meic thouc guangna sa the, “Nang kai khou guangmeipu nei tei mi kandic gwanrum khang guangmei tuang e! Mi nei ta tei adaeng khou tiguang o!”

⁴Tiki mipui tei rui mipu nei ta kiuc nkamhlou the. Kumna kamei rui daw the. “Akai khou gaanv nei guang e” “Tiki kaniw tabui thangc rui guang tu cho ai thay mak ge.

⁵Neihkey mak khou raenghkat mbangh mak khou kaney tat dat kan de. Kaney tabui thangc tat kan cho twmei ni ai thaylou mak khe. Tiki katumcna lay nthau e thei nymtow dat pwng de.”

⁶Rahab rui gwanrummei nei ta tei kainam thangc kawkuna napgou pung khou nkamhlou the.

⁷Guangh latdiumei nunc tei kaidai khou tei rui tatpat dat kan pwkhou raenghkat mbangh dat the. Kaniw tei Isaraelmei gwanrummei nei ta tei Jordan kaanpatmei chaengmun nganv suic key the.

⁸Gwanrummei nei tei zip key mak khou, Rahab tei kainam khou ku lana

⁹kaney khou sa the, “RINGHPOUC rui mi kandic hei nangniw khang tiilou the twmei ai thay e. Mi kandic khou bammei kaguayna rui nangniw ta ping the.

¹⁰Nangniw Izip mpatlouna tat thaumei douc tei RINGHPOUC rui akumhna Ntou duipui tei nangniw hu khou rui tiluangc ntamvlou kan tu cho twmei aniw chu the. Jordan neihpat thangc Amormei guangc nei, Sihon khatni Og ta nangniw rui akumhna swluai kan tu cho twmei ni aniw chu the.

¹¹Hei tei chu pwkhou aniw ping the, gaanv khat na sini bauc pat dat ngam mak khe. RINGHPOUC nangniw Racguangc hei tingpuk kandih kaipouc kiu bu the.

¹²Ai rui nangney ta zauc nzianloumei kumcna nangniw rui akai kaikhunc ta zauc nzianlou puni de twmei RINGHPOUC ta singna akhou latdyng swlou o, kumna ai lwmlou nuhmei tuang madanhmei tuang ramhkhat tiilou o.

¹³Apui apu, achaic akainac nunc, khatni kaniw kaikhunc nunc ta kanlou ni de twmei latdyng swlou o. Aniw ta tiswluailou rio.”

¹⁴Mi nei tei rui kakhou sa the, “Aney rui samei kumcna aney taanh mak ge thei Ravguangc rui aney panty laa kan di tho. Aney rui sw bammei hei nang rui meic gaanv khat na khou sini dinclou mak ge thei, RINGHPOUC rui mi kandic hei aniw khang tiilou pui nungc kiu, aniw nang ta zauc nzianlou puni twna nang khou latdyng swloumei tuang the.”

¹⁵Rahab tei kaidai raengh rui sw binloumei kai khou lungc bam khwan e, kumna kamei rui mi nei ta tei kailat khou rui riang rui mpat key the.

¹⁶Kamei rui sa the, “Chyngkauh chaeng tat ro kum mak ge thei guangh tuang mei nunc ta nangney sowriu pwng e. Kaniw guang dat kan mak saanv mi bamv khou tei zaeng neih thumh nkamh bam o. Mi tangv tei nangney tat nimei chaeng tat dat tho.”

¹⁷Mipu nei tei rui mipui khou tei sa the, “Nang rui aniw ta tiswloumei latdyng tei aniw ngaek puni e.

¹⁸Nang rui taanc nimei mi hei e. Aniw rui nangniw kandic khou rih key pwkhou kiu nang rui aney ta mpat keymei kailat khou hei mi langcriang haenghmei hei thaengclou o. Nang pui nang pu, nang chaic nang kainac nunc, khatni nang pu kai kaikhunc kapwm nang kai khou guang kariu bam o.

¹⁹Thowkumhmei rui kai khou tei rui tatpat re thei, kamei theihmei tei kakhuay di the, aniw manv hamh e; tiki nang kai khou bammei thowkumhmei ta kabiu e thei, hei tei aniw manv e.

²⁰Tiki aney rui sw bammei hei meic kai akhat khou salou e thei, nang rui aney ta tiswloumei latdyng hei aniw ngaek lak ge.”

²¹Hei tei kamei nuh the kumna kaney ta thouc ganclou kan the. Kaney tat kanmei tangv, kamei rui langhriang haenghmei tei kailat khou thaengclou the.

²²Gwanrummeipu nei tei chyngkauh thangc kuna dup kan the. Guangh tuang mei nunc tei rui zaeng neih thumh ramvpuk khou tei kaney ta phu the, tiki kaniw phutow lamakna kaniw Jeriko thangc hanc dat kan the.

²³Mi tangv tei mi pu nei tei chyngkauh thangc tei rui key dat lana, Jordan kaanpatna Joshua daeng khou guang dat the. Pat kanmei kaguayna tei kaney rui kakhou raclou the,

²⁴Kaney rui sa the, “Mi kandic kapwm tei RINGHPOUC rui aniu khang tiilou the twmei nthanna thay the.” Mi bamv thangc bammei meic kaguayna tei aniu ta pingna bam the.