Read Rongmei Naga JOSHUA 20 Bible Online

JOSHUA 20 - Rongmei Naga bible

JOSHUA 20

¹RINGHPOUC rui Joshua khou kumna sa the,

²“Ai rui Mousi ta nang khou tisalou kanmei tei kumcna paklouna duploumei kaidai khang kadah tho.

³Hei tei rui thowkumhmei rui meicdow maanvloumei tuang nai e thei khwm laa nimei khou rui paklouna duploumei bamv khang e.

⁴Maanvpui mei tei hei kumhmei kaidai akhat khou hei paklouna kaidai raenghmun daeng khou naimei sanghbamv khou tei guangna gaanvthaih nunc khou tei kamei rui kalam guay tei raclou puni. Kum e tw e thei mi kaidai khou tei tigut lana lungc bam khang kabamv tiilou puni.

⁵Kata khwm khangc nimei hei khou tei nthau guang pwsini kaniw rui mi kumhmei pu ta tei tipat lak nina e. Kaniw rui kata tei gaeklou nina e kalam thu kamei maanvmei tuang de, sw niina swmei tuang hamh e.

⁶Kata peikai khou latzan swmak saanv khatni latzanpouc tingkuh daihmei tei rui theih mak saanv kamei rui kaidai khou tei bam khang e. Mi tangv tei thu kakai thangc, kamei rui pak guangmei kaidai thangc tei tat dat nuh e.”

⁷Kumna Isaraelmei nunc rui paklouna duploumei kaidai guay khang kadah pat the, mikiu thu Galili khou Naphtali chyngramv Kedes, Ephraimmei tuang chyng ramv khou Sekem akhatni Juda tuang chyngramv khou Hebron hei guay hei the.

⁸Neihpat thangc rui, Jeriko tuang neihpat khou naimei sypungramv nzaengc khou, Reuben tuang ramv khou Bezer; Gad tuang ramv khou Gilead khou Ramot; Manase tuang ramv khou Bashan khou Golanv mi kaidai guay hei the.

⁹Mi kaidai guay hei Isaraelmei guayna khatni kaniw pang khou lungc bammei gin guay khang ni pakloumei kaidai guay the. Thowkumhmei maanv mowna meic dowlou nangc e thei khwm khangc nimei nunc khou rui duak khang mi kaidai guay khou hei paklou nina the; charuangc khou latzan sw rey makna kata swluai nuh mak ge.